Konrad Adenauer

Aus Wikipedia

Da Konrad Adenauer (* 5. Jänner 1876 in Köln; † 19. April 1967 in Rhöndorf, åm Stådtteil vo Bad Honnef, eigentli Conrad Hermann Joseph Adenauer) war vo 1949 bis 1963 ersta Bundeskanzla vo da Bundesrepublik Deitschland und vo 1951 bis 1955 aa glei no Außnminista.

Adenauer war in da Kaisazeit und in da Weimara Republik Mitglied vom Zentrum. Er war seit 1917 Obaburgamoasta vo Köln und is 1918 Mitglied vom Preißischn Herrenhaus auf Lemszeit worn. Ois langjähriga Vorsitzenda vom Preißischn Staatsrat war er zerscht Anhänger von am rheinländischn Separatismus und – nem am Wilhelm Marx – da wichtigste demokratische Gegna vom sozialdemokratischn Ministapräsidentn vo Preißn, Otto Braun. Nach da Machtübanahme vo da NSDAP håt er si ins Privatlem zruckzong.

Adenauer håt ois ersta Bundeskanzla nach'm Kriag maßgeblich de politische Ausrichtung vo da Bundesrepublik in da Nachkriagszeit prägt. Er håt dabei auf de Westbindung gsetzt, verbundn mit da Eiropäischn Einigung und mit da Eigliederung in des westliche Verteidigungsbündnis vo da NATO. Geng an starkn Widastand aa innahoib seina Partei håt er des System vo da Sozialn Marktwirtschaft durchgsetzt. Er war a rheinischer Katholik und Antikommunist, aba er war aa a Realpolitika, der de Aufnahme vo diplomatische Beziehungen zua Sowjetunion arrangiert håt und er war a recht pragmatisch, wenn's um oide Nazis ois Funktionsträga fia an Wiedaaufbau vo da Bundesrepublik ganga is.