Eismauna

Aus Wikipedia
(Weidagloadt vo Aismãna)
Wexln zua: Navigation, Suach
Der Artikl is im Dialekt Hausrukfiatlarisch gschrim worn.
A Diafdruk-Zyklon iwa Islaund
Reif

De Eismauna han drai Hailige, de fum 12tn bis zan 14tn Mai hintaranaund eanan Faiadog haum und da Foiksmund sogt, das zu denane Dag fost a jeds Joa nu oa Moi gschaid frisch wiad und's a nu a lezds Moi ba da Nocht bfrean kau. Desweng sogt ma, da ma fia de Eishailing koa Gmias ausezn soi, wos koa Ködn ned fadrogt und a de Dobfbleama liawa nu im Haus losst, bis de Dag ummi han. Zu de drai Aismauna dazua ghead oisa fiate nu as koide Soffal, de am 15tn Mai ian Faiadog hod. Wea auf Numma-Sicha gee wü mid dea Bleami und Bledschn, dea woat bis noch da Soff.

Eismauna-Schbrichal[VE | Weakln]

  • Pankrazi, Servazi, Bonifazi san frostige Bazi. Und zum Schluss do föd nie, de koide Sophie[1]
  • Fua Bonifaz koa Somma, noch da Soff koa Frost[2]
  • Wea saine Schof schead foa Bonifaz, dem is de Woi liawa ois wia's Schof[3]
  • Pankraz und Servaz san zwoa bese Briada, wos da Lanzing brocht hod, des zaschdean de zwoa wida
  • De drai Eismauna ohne Regn, bringan im Wainschdok fü Segn
  • Waunn's an Pankratius gfriad, wiad da Goatn ruiniad
  • De koide Sophie, mocht ois hie[4]

Wissnschoftliche Daklearung[VE | Weakln]

De oide Bauanweisheid fu de Eismauna is koa bleda Owaglaum, sondan wissnschoftli fu da Meteorologie bschdedigt. A waunn's im Abrü und Aufaung Mai schau recht woam sai kau, kaun nöadli fu de Oipn oiwai nu a Wedaumschwung kema. Waunn iwa Noadairopa a Diafdrukgebied is, schaufit des so richdig de koide Luft fu da Arktis iwa de Noadsee bis zu uns. In schdadistische Untasuachungen is aussagfunden woan, das zu de Dag fu de Eismauna wiakli a sgnifikant hechane Woaschainlichkaid bschded, das so a Noadairopa-Zyklon nu amoi aufdaucht und koide Luft zu ins bringt. Natiali bassiad des ned a jeds Joa, owa as Risiko bschded. Des Phänomen gibt's owa nua in Middlairopa neadli fu de Oipm, wo aundas güt de Bauanrögi ned.

A de Heiling[VE | Weakln]

De drai Eismauna san:

  • da Pankraz, am 12tn Mai
  • da Servaz, am 13tn Mai
  • da Bonifaz, am 14tn Mai
  • as koide Soffal, am 15tn Mai

Olea drai Eismauna und a d'Soff woan friachristliche Meatiara, de zweng eanam Glaum as Lem haum lossn miassn. Ois Glaumszaign gödn de Eisheiling ois bsondas reschpektwiadig. Wai's owa sunst a weng unbekaunnte Heilige san, iwa de de meisdn Laid nix wissn, haum's a wos mysteriöses, unbekaunnts aun sich. Des is fia so Losdoghailige grod recht. Zwoa fu eana, da Pankraz und de Soff, san in da Zaid fum Kaisa Diokletian, dea fu 284 bis 305 regiad hod, in Rom umbrocht woan. In Bonifaz hod de Diokletianische Kristnfafoigung im Joa 306 in da Provinz nu dawischt, in Tarson in Kilikien, des haid in da Diakai liegt. Da Servatius is fu ana schbedan Genarazion, wia as Kristndum schau auneakaunnt woa in Rom. Ea woa Bischof fu Tongern im haidign Hollaund und is noch da Üwaliefarung im Joa 384 fu haidnische Barbarn in Maastricht daschlogn woan.

Beleg[VE | Weakln]

  1. osttirol.at: Die Eisheiligen, 19. Mai 2012
  2. bauernregel.net: Die Eisheiligen
  3. brauchtumsseiten.de: Die Eisheiligen - Eismänner
  4. Oberösterreichische Nachrichten: Die „Eisheiligen“ halten sich heuer an den Kalender, 12. Mai 2012