Ala I Commagenorum

Der Artikl is im Dialekt Owaöstareichisch gschriem worn.

A parthischa beritana Bongschiz, Skulptua aus Tuarin, Italien

D Ala I Commagenorum Antoniniana Milliaria Sagittaria (easchde antonianische Dausndschoft fu beritane Kommagena Bognschizn) woa a römische Auxiliararme de uaschbrüngli in Mesopotamien aufgschdöd woan is und im 2. Joahundat noch Grisdus ins heitige Estareich kema is und doat an da Donaugrenz schdazioniad woa. De Ala I Commagenorum hod iam Naum a im remischnLoga "Comagenis", wos de heitige Tulln in Nidaestareich is.

Ala Sagittaria

In da remischnArme hod de Kavalari am Aufaung koa so a wichdige Roin gschbüd, und a beritane Bognschizn-Ainheit woa nu mea wos bsondas. In de schdending Griag mid de Partha im 1. Joahundat, san de Röma in Mesopotamien owa oft auf soichane Einheitn ois Gegna gschdessn. Im Ostn woa da Aungrif mid beritane Bongschizn a fabraite Kaumpfdaktik, de Röma haum owa eana Legion aundas aufbaud ghobt und es hod nua Bongschizn-Infantri ois Auxiliarii gem. Bis ins 4. Joahundat hod s koane beritanen Bongschizn in da remischnArme gem, aussa deara Ala I Commagenorum. [1][2]

Gschicht

Egiptn

Mereo am Nil, im heiting Sudan

D Ala I Commagenorum is untam Kaisa Tiberius (14-37 noch Grisdus) aufgschöd woan. Im Joa 48 woa a Ainheit mid dem Naum am Nil in Egiptn schdazioniad, wos duach archeologische Fund festgschdöd woan is. Da Naum Commagenorum kimt owa uaschbrüngli fu ana Gegend am Eufrat, wos dafia schbricht, das de Einheit doat grindd woan is. Oanzöne Teie fu deara Ala (Flügi-Arme) haum des Kastel Talmis in Nubien bewocht und so Egiptn geng s nubischn Reich Meroe fataidigt.

Da lezde Hinwais dafia, das de Ala Commagenorum in Egiptn gwen is, fint si in am Milideadiplom fum Joa 83 noch Grisdus. Danoch is iagendwaun fasezt woan und daucht in de Beleg a weng schbeda in Noricum, im heiting Estareich auf.

Noricum

Ob n Joa 106 woas ma das de beritane Bongschizn-Ainheit an de Donaugrenz falegt woan is. Woaschainli iss duchn Donaugriag fum Kaisa Domitian (81-96) in de Gegend kema. S Hauptquartia fu da Ala I Commagenorum woa s Milidealoga fu Comagenis, zwischn Favianis und Vindobona gleng baim heiting Tulln in Nidaestareich. Des Loga hod in Naum fu deara Ainheit iwanuma, obwoi ma woas, dass es schau foahea gem hod. Aus ana Bauinschrift (tabula ansata) is bekaunt das schau im Joa 104 des Loga ned neta ois Hoiz sondan in Schdoabauwais gem hod. [3]

Ob 106 noch Grisdus woa d Ala Commagenorum an da Donaugrenz

Im Joa 130 wiad de Ainheit zan easchdn Moi mid dem uns heit bekauntn Naum Ala I Commagenorum milliaria sagittaria gnent, woduach ma a woas, dass umara aus 1.000 Maun (milliaria) bschdaundn is. Im Römischn Reich hod s a glaichzeitig nia mea wia 7 Alae in deara Gress gem, wos zoagt, das des a wichdige Drupn woa. De Bezaichnung Antoniniana kimt owa eascht schbeda untam Kaisa Caracalla (211-217) dazua. [4]

Im 2. und 3. Joahundat hod de Ala I Commagenorum de gaunze Zeid ia Hauptquartia in Noricum ghobt und neiche Soidodn san aus deara Gegend rekrutiad woan. Obwoi genaue schriftliche Beleg fön, hod de Bongschizn-Drupn fu Tulln sicha Hüfseinhaitn noch Virunum in d Brovinzhauptschdod fu Noricum im heiting Keantn gschikt. Woaschainli woan a Vexilationes bai aundane Griag dabai, obwoi zum Baischbü fu deara Einheit nix bekaunt is, dass baim Kaisa Trajan sein risign Födzug geng de Daka dabai gwen wa. Fum Joa 154 noch Grisdus woas ma owa, das ole 3 Alae fu da Brovinz Noricum Drupn noch Noadafrika gschikt haum, um doat an Aufschdaund zan bekempfn.

Untam Kaisa Marcus Aurelius (161-180) iwafoin de Markomanen fu da nöadlichn Seitn fu da Donau de Brovinz Noricum und ziang blündad umadum. S Kastel Comagenis hod si owa aunschainend eafoigreich fataidign und exisdiad schbeda a nu, obwoi s genau in da Krisnzone gwen sei muas. Noch n Kaisa Gallienus (253-268) wiad de Ala I Commagenorum fu da Grenz obzong und zu da mobiln Födarme dazua gem und aundare Einheitn bewochn Comagenis. Danoch faliad si de Schbua fu deara Einheit, obwoi grod zu deara Zeid de Römische Arme oiwai mea auf n Kaumpf mid schnöla Kavalari umschdaigt.

Woaschainli is de Ala I Commagenorum bai da Milidea-Refoam fum Kaisa Diocletian (284-305) umstrukduariad oda in kleanare Einheitn aufgschboitn woan und losst si desweng neama in de Beleg findn. Es san owa nu in da Notitia Dignitatium fum Aunfaung fum 5. Joahundat Equites sagittarii, des hoast beritane Bognschizn, in Lentia (Linz) und Lacus Flelix (Draunse) iwalifat. [5]

Schau aa

• Ala I Britannica
• Legio I Noricorum
• Legio II Italica
• Comagenis

Beleg

• www.imperiumromanu.org Ala I Commagenorum
• Die römischen Truppen in Niederösterreich Artikl fum Mag. Martin Mosser
• Notitia Dignitatium in Partibus Occidentis - römischs Beamtn- und Milideafazaichnis fu ziaka 425-433 noch Grisdus.
• Österreichisches Bundesdenkmalamt - Bauinschrift aus dem römischen Reiterlager Comagena (Niederösterreich, Tulln)