Augustiner-Bräu

Aus Wikipedia

Augustiner-Bräu is de äiteste Brauerei vo Minga im Freistaat Bayern, de wo no existiat.

Inhoitsvazeichnis 1 Gschicht 2 Übas Untanehmen 2.1 Wiafui vakaffa de so? 2.2 Wås braun de so? 2.3 Wo gibts en des zum Beispiel? 2.4 Tradition und Gmoanutz 3 Links

[dro werkln] Gschicht

Seit 1294 hom um Minga rum scho de Augustiner Menche glebt. So um 1315 rum hams eana Kloster inna Stodt fertig ghabt. Sicher is heitzdog, des de Menche scho seit 1328 Bier braut ham.

1803 hod da Freistaat Bayern wega da Säkularisierung vom Napoleon as Kloster und de Brauerei kriagt. Letztere hod ma damois recht schnell privatisiat. 1829 hod de Familie Wagner de Brauerei ibanomma. As "J.W." im Wappen moant an Wagner Josef, der wo da Sohn vo de Wagners gwesen is.

[dro werkln] Übas Untanehmen

Heit firmiat de Brauerei ois Augustiner-Bräu Wagner KG. 51 % vo dena Unternehmensantei entfoin aufgrund ana testamentarischen Vafügung vo de letztn Onghearign vo da Wagner-Familie auf de gmoanützige Edith-Haberland-Wagner-Stiftung. De weitan 49 % vatein si auf mehrare Kommanditisten, darunta da Münchna Unternehma Dr. Jannik Inselkammer.

[dro werkln] Wiafui vakaffa de so?

Augustiner Bier is bsundas in Minga und drum rum sehr verbreitet. 2002 hot de Brauerei ca. 850.000 Hektoliter heagstellt. Augustiner wead außerdem ar in Berlin immer bliabter und is in mehran Wirtschaften und Bars zum ham. Mittlerweile sans scho seit a paar Jahr über de Million Hektoliter drüber ganga.

[dro werkln] Wås braun de so?

Augustiner braut insgsamt 8 unterschiedlich Biere:

• Augustiner Hell, as meistverkaffte Augustiner Bier. Manche nennas a wegam Etikett „Grianer August“, „Grianer Mench“, „1328 Grian“ oder einfach August, Gustl, Kini August oder Auge. As Etikett hod se seit Joazehnten scho nimmer g'ändert.
• Augustiner Edelstoff: Da Edelstoff is a häis Exportbier.
• Augustiner Oktobafestbier is as Wiesnbier vo da Augustiner Brauerei. Obwois fia d Wiesn is gibts as a in Floschn z kaffa. Af der Wiesn gibts außerdem fei nua no as Augustiner Bier vom Fass. Olle andan nehma Container her.
• Augustiner Weißbier: A typisches boarisches Weißbier.
• Augustiner Pils: Augustiner måcht ar a Pils, des aber net sehr bekannt is.
• Augustiner Dunkles: A dunkles nåch Minchner Brauårt.
• Augustiner Maibock, a Bockbier, wås es nua im Mai und Juni gibt.
• Augustiner Maximator, a dunkles Starkbier, wås es nua währnd da Fastenzeit gibt.

Alkoholfreis und ähnliches Zeigs werd bei Augustiner net heagstellt.

[dro werkln] Wo gibts en des zum Beispiel?

• Im Bräustüberl in da Brauerei säiwa. (Landsberger Strass)
• Königlicher Hirschgarten
• Augustiner-Keller (Arnuifstrass) (zwischen da Hackerbrückn und am Hauptbahnhof)
• Historische Großgaststättn inner Neuhauser Strass (Fuaßgengazone)
• Im Neanbeaga Brodwuaschtgleckal am Dom in Minga
• In Nürnberg a, nämich im O´Sheas
• In Rengschburg im Wiatshaus Zum Goidn Fassl (Des is a Wiatshaus in da Spiaglgassn 10)

[dro werkln] Tradition und Gmoanutz

S'Augustiner-Bräu gheat ana Stiftung, de an untanehmerischn Gewinn zua gmoanutzign Förderung im Münchn und da Umgebung einsetzt.

Augustiner-Bräu is de oanzige Münchna Brauerei, de s'Bier no in Euro-Glasfloschn vakafft. Es is aa s'letzte Bier, wos zum Oktoberfest no in traditionellen Holzfassln ongliefat wiad.

S'Augustiner-Bräu in nehman staatlichn Hofbräuhaus de letzte Brauerei in Minga, de unobhängig is und no ned vo an internationalen Konzern gschluckt worn is und fuiht si bsondas da boarischn Bierbraua-Tradition vabundn. Des wiad aa vo vuin tradionsvabundanen Bierliabhoban gschätzt.

[dro werkln] Links

• Hoamseitn vom Augustiner-Bräu