Auwiesen (Linz)

Aus Wikipedia

Auwiesn oda Auwiesen is a Stodteu im Sidn vo Linz.

Uaspringlich hed Auwiesn a Musterstod wean soin, heit is owa a Wengl a Problemviadl mit ana hochn Jugendkloakriminalitätsratn. [1][2]

Auwiesen liegt im Siden vo Linz und grenzt direkt an Kloamünchen und Öwisbeag. Mit umma 8000 Einwohna is des ana vo de greßan zaumhengadn Wohngegandn vo da owaöstareichischn Laundeshauptstod Linz.

Auwiesn is ois a Gaunz ois a neicha Schtodteu plant gwest. Fria san duat industriebautn aus da Kaisazeid gschtaundn. Af de gaunze Leng hod se westli vom Traunfluß de Traunau mid vü Ghötz ausbroat. Des is nua vom Mühlboch untabrocha gwest. Vom Schtodteu Kloaminchn, im Nuadn, is ma iwan Redlaweg glei bei da Rodfeabarei gwest. Do draht Heid de Schtroßnbauhn a Umkeahschleifn. Im Sidn is da Oatsteu Schörgnhub mid seim großn Freibod und im Nodwestn is de Grenz de Wieneaschtroßn de duat iwa de Traunbruckn in Schtodteu Öwisbeag (Ebelsberg) ummilaaft. Dea Stodteu dastreckt si iwa mera ois wia zwoa Kilometa vom Westn nochm Ostn. Vom Nuadn afn Sidn zua sans netta a boa hundad Meta.

Dea Schtodteu is noch de domois leztn schtödebaulichn Eakenntniß eabaut woan. Es gibd koane Wohnungssilos, sundan de Moastn Haisl haum 6 Wohnnungan. Drunta hod ma de Autos in de Tiafgaragn vabaunnt. De Haisa san Olle in Greanflechn eipockt und dea gaunze Schtodteu mocht an sauwan und gmiadlign Eidruck. Es san vü Greanflechn sunnaseitig mid Kindaschpüplätz und enlaung vom Traunkanal laft da Schpuat und Radlweg vo da Schtod Wös bis zua Traunmündung in de Donau. Im Westn zua Autobauhn A 7 hie is dea Weg nu mid Kloagoatnaulogn und Schpuataulogn ogschiamt. Oiso de bestn Vuaraussetzungan fia a gsunds und a scheens Wohna und Lebm.

Leida hods do koan Vagobeplan gebm via de Wohnungsvagobn. Weu de Wohnaulogn haum Mera vaschiedane Wohnungsgsöschoftn earicht und de san daun noch eahnan Guaddünkn vagebm woan. Und so san vo olle Flichtlingsschtröm de Leid, ohn se vü dabei z`denga, doat augsiedld woan.

Olle meglign Leid, vo Afrika bis Afghanistan und aus hoibads Sidosteiropa. Dafia das do so vü zaumgwüafite Leid wohnan is recht friedli und de Leid kemman guad midanaunda aus und es mecht a södn wea weggaziagn.

Owa kuiturö liegt dea Schtodteu fia de Jugand a Wengl oglegn. Es hod zwa an Jugendklub gebm. Des woa natiali zweng. Und weu a boa bsoffane Hoibschtoake doat de Jingan augschtenkad haum, hod ma des, triebm vom Diktat da laarn Kassn, zan Auloß gnumma, das ma den Klub glei gaunz zuadraht. Das des foisch woa hod ma daun a eigsegn und ma vasuacht iazt fia de Jugend mera zan Aubiatn.

Beleg[Werkeln | Am Gwëntext werkeln]

  1. Artikl iwa Auwiesn. Archiviert vom Original [1] am 5. Meaz 2016; abgerufen am 3. März 2015.
  2. Iwa de Krimineulität in Auwiesn. Archiviert vom Original [2] am 23. Juli 2014; abgerufen am 3. März 2015.