Bãnhofsbüfe Olten

Da Bãnhof in Olten

S'Bãnhofsbüfe Olten is a Bãnhofsresti in da Schwaiz, wo si wéng saina zentraln Låg in da Mit fu da Schwaiz oft Laid fu Farain, Fiamen, Boatain und Gweakschåftn dréfn und doat eanre Sizungen hãm. In Olten keman a boa fu de wichdigsdn Aisnbãlinien fu da Schwaiz zãm und aso is's in dén Oat mid da Bã ungefea glaich guad zan hîkema, egal ob ma fu Bern, fu Zürich, fu Basel oda Luzern kimd. In dém Resti is a schã oft schwaiza Gschicht gschrim woan und unta ãndam han foigende Farain und Fiamen bai am Dréfn doat grünt woan:

• da Schwaiza Alpen-Club (1863)
• da Schwaizerische Gweakschåftsbund (1880)
• d'Fraisinig-Demokratische Boatai (1894)
• da Schwaizarische Fuasbåifabãnd (1895, ois Schwaizarische Football-Association)
• da Schwaizarische Efangelische Kiachnbund (1920)
• da Schbråchatlas fu da daidschn Schwaiz (1935)
• d'Schriftschdölafarainigung Gruppe Olten (1971)
• s'Oltener Bündnis, a Farainigung dé géng s'Wödwiatschåftsfoarum in Davos gricht is (2001)
• d'Wikimedia CH, da Schwaiza Dail fu da Wikimedia Foundation (2006)

A in Olten, åwa néd im Bãnhofsresti sondan im doating Foikshaus is a s'Oltener Aktionskomitee grünt woan, dés 1918 an Genaralschdraik in da Schwaiz oaganisiad håd.

Bahnhofbuffet-Olten-Dialekt

In da Schwaiz sågt ma zu am Wischi-Waschi-Schwytzerdütsch, bai dém ma néd genau aussa kent, fu wo de Peason hea is, Bãnhofsbüfe-Olten-Dialekt, wai doat oiwai an Haufn Schwaiza aus faschidane Regionen zãmkeman und dãn bai dé Sizungen oft so a Dialekt-Duachanãnda grét wiad. Es woa a schã fåst a jéda eawågsane Schwaiza schã amåi bai iagend am Dréfn im Bãnhofsbüfe doat und woas déswéng aus aigana Eafoarung, wia's doat årent.

„"Das Bahnhofbuffet Olten ist die Brutstätte des Schweizer Wohlergehens. In seinen Sitzungsräumen werden Visionen zu Statuten, und alles Chaos findet einen Bundesordner. (...) Es soll Schweizerinnen und Schweizer geben, die noch nie an einer Zusammenkunft in Olten waren. Viele können es nicht sein."“

– Neue Zürcher Zeitung/NZZ Folio 7/2003

Schbråchwissnschåftlich wiad a oft behaupt, das dé regionaln Dialekt in da Schwaiz am Faschwindn han und oiwai meara so a iwaregionals Schwytzerdütsch entschded. Dafia gibt's åwa dawai kõane linguisdischn Bewais und ma head oiwai nu aussa, ob õane fu Zürich oda fu Basel is, oda fu Bern und Luzern. Bai de schwaiza Beagdialekt so wia's Appenzellarische, s'Bündna Daidsch oda s'Wallisarische head sogoa a néd Dåsiga sofoat, das dé ãndas glingan.

Weblinks

• Restaurant-Buffet Olten
• Im Sog der Mitte, Artikel im NZZ Folio 7/2003 über das Bahnhofbuffet Olten