Bevökarungsdichtn

Aus Wikipedia

D'Bevökarungsdichtn gibt ãu, wiavüi Eiwohna in am bestimmtn Gebied duachschnittli auf ana bestimmtn Flächneinheid, meistns am Quadratkilometa, lem. Ausgrechnt wiad de Zåih, in dem ma d'Bevökarungszåih vu ana Region duach'd Owaflächn vu dera Region teud. An hochn Weat hãm voa oim de Städt.

S'Umgekeahte, d'duachschnittliche Flächn pro Eiwohna in am Gebied, nennd ma Arealitätsziffa, de meistns mid m²/Leid åis Einheid ãugem wiad.

De hechste Bevökarungsdichtn vu da Lända vu da Wööd håd Monaco mid üwa 18.000 Leid pro km², in da Mongolei san's ned amåi 2 Leid pro km². Grönlãnd is nu dünna besiedlt, åwa ka söbstständiga Stååd aa ned; duat is de Bevökarungsdichtn 0,025 Leid pro km². Da vamutlich hechste Bevökarungsschnitt, den's je gem håd, woan de 1.900.000 Leid pro km² in da Walled City, heid a Teu vu Hong Kong.

D'Aussågekråft vu dem Weat is oft ned sondalich hoch. In Ägyptn zum Beispüi is da Lãndesschnitt 72 Leid pro km², åwa da Großteu vum Lãnd is a Wüstn und üwahaupt ned bewohnt, Kairo is dafia stöinweis extrem dicht besiedlt.