Biatraglsteing
| Der Artikl is im Dialekt Obaboarisch gschrim worn. |
S' Biatraglsteing is a ned gonz ernstgmoante Sportart. S' gehd do drum an meglichst hohn Turm aus Biatragl aufzumstäin. Dazua kraxlt da Sportler auf seim eigna Turm oiwei häha und kriagt s'naxte Tragl zuagreicht. Aufgheard werd erst wenn da Sportler obefoid.
De Freid an so am Schmarrn is des Wichtigste an dea Gschicht. S' is aba ollemoi sportlicha ois as Biakastllaffa.
S' Biatraglsteing wor am 8. Oktober 1988 ois Wette bei "Wetten dass" im Fernsehn.
Da Rekord liagt bei 38 Tragl. Da Bruxe Philip hod in Sowerby Bridge (GB) am 26. August 1991 an Turm vo 9,65 Meta aufgstäid. Am 24.07.2008 hod Müller Michaela in Mauern a an Turm aus 38 Tragl baut. Ihrane Tragl warn a bissal gressa, desweng war der Turm 10,94 Meta groß.
Inhoitsvazeichnis |
[drå werkln] Sichern
Damit beim Obefoin nix passiert werd da Sportler gsichert, dazua trogt a an Klettergurt und hängt an am Seil, des an am geeigntetn Punkt iaba eahm umglenkt werd und vo na weidan Person ghoidn werd. Dea dea sichert hod a an Klettergurt, an dem des Seil iaba an Abseilachter eighängt is. Wega da Reibung im Umlenkpunkt hod ma so a de Meglichkeit jemand zum sichern, der schwara is ois der, der eam sichert. Des is de gleiche Ausrüstung, de a beim Freikraxln heagnumma werd.
[drå werkln] Biertragl-Nachschub
Am Ofang ko a Helfa dem Kraxla de Biatragl oafach so gem. Wenn dea oiwei häha naufkimmt ko ma's eam mit na Stanga hireicha. Adiam werd a a zwoats Seil zum Aufeziang vo de Tragl heagnumma.
[drå werkln] Physik
Da Turm foid ned um solang da Schwerpunkt vo dem Turm samtm Kraxla senkrecht iaba da Standflächn is. Deszweng muaß da Kraxla se om iaba de Spitzn driababeung. An kloana Vorteil hod ma, wenn der Turm a kloa weng schiaf baut werd, de Spitzn soidad dann vom Kraxla wegzoang.
Dea Turm is elastisch, zum oana wega dem Plastik aus dem de Tragl gmacht han, zum andarn wega dea losn Vabindung. Zsammad mit dem Gwicht vom Kraxla dagibt se a schwingungsfähigs Feder-Masse-System, des vo jeda Bwegung vom Kraxla ogregt werd. Durch de Schwingbwegung ergibt se a Biegemoment auf den Turm. Do dea Turm nua zsammgsteckt is kenna nua Druck-, aba koane Zugkräfte ned iabtrong wern. Soboid des Biegemoment greassa is ois de Gwichtskraft, de den Turm zsammdruckt bricht a ob.
[drå werkln] Gfahren
Obgesng dofo, daß der Kraxla gscheid gsichert gheard is der Turm beim Umfoin a ned grod ungfährlich. Do miassn de Zuschauer scho gscheid auf se aufpassn. Bessa no soidad da Vaanstalta dafia sorgn, das de Zuschauer ned znah dro stenga. Fia de Leid de sichern und de Tragl zuareicha is a Helm koa schlechte Gschicht.
