Boarische Grammatik (Adverb)

Der Artikl do gheart zua Artiklsammlung iba'd Grammatik vo da Boarischn Sproch. A Ibasicht iba olle Artikl zum Thema findt ma in Boarische Grammatik.

Der Artikl is im Dialekt Owaöstareichisch gschrim worn.

auf Boarisch: õa Adweab (Sg.), zwoa Adweam (Pl.)

D Adweam san a Grupn fü Wöata dé Zaidwöata, oiso Weam, neha definian, åwa genau kinan si si a auf Partizipe, ãndare Adweam oda gãnze Sez beziang.

Unfaendalichkaid

Adweam san ned dekliniaboa und ned konjugiaboa, dés hoast se faendan si ned nåch Geschlecht, Zåi, Fåi oda Zaid, sondan san oiwai glaich.

	Baischbü - Unfaendalichkaid
m	Ea ged lãngsãm
f	Si ged lãngsãm
Pl.	Mia gengan lãngsãm
Fåi (Akk.)	Siagst du dé lãngsãm foaradn Autos?

Adjektif und Adweam

Im Gégnsåz zu ãndane Schbråchn kã auf Boarisch jéds Adweab a Adjektiv wean, wãn si si auf a Substantif, oiso Hauptwoat, beziagt. Es gibt kõane Adweam dé si fum faglaichboan Adjektif in da Foam untaschaidn, aussa ém dass unfaendalich san. In ãndane Schbråchn gibz dés schã.

Schbråch	Adweab	Adjektif	Adweab	Adjektif
Englisch	well	good	badly	bad
Franzesisch	bien	bon/bonne	mal	mauvais(e)
Schbanisch	bién	bueno/buena	mal	malo/mala
Italienisch	bene	buono/buona	male	malo/mala
Latein	bene	bonus/bona/bonum	male	malus/mala/malum
Boarisch	guad	guad	schlecht	schlecht

Baischbü: Ea kãn guad kocha. Saine Rezepte san guad. Ea is guad.

Adjektife wean åwa im Gégnsåz zu Adweab schã an s Geschlecht, de Zåi und in Fåi fu eanam Bezugswoat ãbasst.

Baischbü: Ea is a guada Koch. Si is a guade Kéchin. Mia san guade Kéch. Dé guadn Kéch san oiwai gfrågt.

Oatn fu Adweam

Es gibt faschidane Oatn fu Adweam, jé nåchdém wöche Funkzion dass in am Såz iwaneman. Ma untaschait:

• Tempoaral Adweam (Wãn?)
• Lokal Adweam (Wo?)
• Kausal Adweam (Wiaso?)
• Modal Adweam (Wia?)
• Intarogatif Adweam (Fråg)
• de Boarischn Richtungsadweam (Wohî?)

Tempoaral Adweam

Tempoaral Adweam beschdiman de Zaid neha in dea a Hãndlung bassiad. Sé san im Boarischn bsondas wichdig, wai damid oft dé Benuzung fu da Fagãngenhaid oda fåst oiwai fu da Zukunft fum Weab, oiso fum Zaidwoat, famidn wean kãn. S Boarische måg nemlich kõane kompliziadn gramatikalischn Åbwãndlungen, sondan nimd dafia liawa Adweam hea. S Frågewoat fia de Tempoaraladweam is Wãn?

Baischbü fia Tempoaraladwean (OMB) san:

Dåg	Joa	Moment	Zukunft	Fagãngenhaid
haid	haia	jéz/iatz	glai	gråd
moang	negsts/naxt´s Joa	sofoat	dãn	voahea/voring
iwamoang	iwanegsts/ibanaxt´s Joa/Jåh	gråd	båid	zeascht
gésdan	voarigs Joa	nia	schbéda	dåmåis
voagésdan	voavoarigs Joa	oiwai	nåcha	fria

Es gibt natiali nu fü ãndare Tempoaral-Adweam, wia: oft, södn, ima, etc.

D Temporal-Adverbien und de adverbialn Asdrick af Nordboarisch:

Hiwais: Gnennt han ålle bekånntn Forma, dej kinna je nouch da Gechad ånderscht sa, oder in da sölm Gechad newarånand stej (von nerdlinga oder n sidlinga Boarischn Sprouchraum, oder traditionölle und standarddaitsch-nejchtere).

• Ån wölchan Toch?
  • vorgestern • gestern
  • haint, hait
  • marng, morng, moing • ån åndern Toch, en åndern Toch • iwermarng • iwern åndern Toch, ån iwernejchstn Toch
  • in åcht Toch, iwer åcht Toch, in ara Wocha • in da åndern Wocha, de ånder Wocha

• In wölchan Jouer?
  • vorfern, vorfernd, vorferd, vorferdn, vorvoigs Jouer • fern, fernd, ferd, ferdn, voigs Jouer
  • haier
  • in åndern Jouer, es ånder Jouer, nejchst Jouer • iwernejchst Jouer

• Da Åfång oder es End
  • zerscht, zejerscht
  • zletz(t) • af d Letz(t)

• Vor wos? Nouch wos?
  • ejerer, ejender, eerer, eender, frejer • frej
  • nou, noucha(t), nåcha(t) • spejter, spouter, spater • spejt, spout, spat

• D Zait
  • ejchadwenn, irchadwenn • amol
  • frejers, ejers, durtmols, söllmols • letz(t)ing, nale, nalings, durtamol • voing • grod
  • grod • ejtz, ejtza(t), sufurt
  • dawal, derawal
  • glai • bål(d)

• Wej lång? Wej oft?
  • nej
  • söltn • ejamol, hinawider, månchsmol
  • a weng • a wal
  • efters • oft, gern
  • zmejerscht, zmeerscht, zmea(n)st, zmoast, zmoist, zmaist, (z)maistns • de mejerscht, meerscht, mea(n)st, moast, moist, maist Zait
  • ållawal, åwl, åwa, immer, ummer • ållamol • de gånz Zait, in oaner Tur • furter

• Toch und Nocht
  • untertogs • ban Toch
  • iwernocht • ba da Nocht
  • d Frej: in da Frej, z marchads, z morchads • gestern, haint, marng frej
  • da Vormittoch: (z) vormittogs, åm Vormittoch • gestern, haint, marng (z) vormittogs, vormittoch
  • da Mittoch: (z) mittogs, åm Mittoch • gestern, haint, marng (z) mittogs, mittoch
  • da Noumittoch: (z) noumittogs, (z) nåmittogs, åm Noumittoch, åm Nåmittoch • gestern, haint, marng (z) noumittogs, noumittoch, (z) nåmittogs, nåmittoch
  • da Oumd: (z) oumds, åm Oumd, af d Nocht • gestern, haint, marng (z) oumds, oumd, af d Nocht • nachtn (= gestern z oumds)
  • d Nocht: (z) nåchts, in da Nocht • gestern, haint, marng (z)nåchts, nocht

Lokal Adweam

Lokal Adweam prezisian in öatlichen Rãmen fu ana Hãndlung. Wo bassiad dés iwa dés gråd grét wiad? Lokale Adweam beziang si auf an beschdimtn geografischn Punkt und Richtungsadweam (schau untn!) beziang si auf de Richtung in dé a Hãndlung oda a Bewegung ged. S Frågewoat fia de Lokaladweam is Wo?

Baischbü fia Lokaladweam san:

Englisch	WMB	OMB	NB	SB
here	då	då	dòu	då
there	dort/dot	dort/durt	durt, dur(t)n	dort / zelm
over here	hearént / heri(b)m	hearént	heream	herentn / heribm
over there	drént / drim / entn	drént /drüm	dream	entn / drent(n) / dribm
down there	untn	untn	unt(n)	unt(n)
nowhere	nirgads / nindascht		nejchads / nirchads
everywhere	iweroi		iwerol
somewhere; anywhere	irgadwo / anort(s)		ejchadwòu / irchadwòu / wòu

Nu mea Baischbü waradn: links, rechts, draust, drin, hearin,hidãnt, hibai, om, unt, hint, foan, …

Kausal Adweam

Kausal Adweam kém an Grund oda Zusãmenhãng ã, in dém oda zwéng dém a Hãndlung bassiad. S Frågewoat fia de Kausaladweam is Wiaso, auf wøche Oat?

Baischbü san: déswéng, drozdém, nemli, sunst, aso …

Modal Adweam

Modal Adweam gém ã auf wöcha Oat und Wais a Hãndlung bassiad. S Frågewoat fia de Modaladweam is Wia?

Baischbü san: filaicht, gean, laida, rechd, néd, håibwegs / haifde, hibsch, …

A por Modaladverbien vastirka'se bedaitungsmasse, bål'ma's betont:

• gånz: Des is gånz gut = Des is orch guat; Des is gånz guat = Des is niat schlecht, ower nuniat guat
• recht: Da Gångstaich is recht schmol = Da Gångstaich orch schmol; Da Gångstaich is recht schmol = Da Gångstaich is zwor schmol, ower es gejt nu
• gwis: Des is gwis olt = Des is sicher olt; Des is gwis olt = I denk'ma, das des olt is, ower i woiss niat sicher, ob des olt is

Intarogatif Adweam

Intarogarif Adweam braucht ma, damid ma a Fråg iwa a Hãndlung ailaitn kã.

Baischbü san: Wo?, Wãn?, Wås?, Wea? Wia?, Warum?, Wiaso?, Wohî?, …

d Boarischen Richtungsadweam

Im Boarischn gibt s a recht ausdifarenziads Sisdem fu Richtungsadweam, dé ned neta ãzoang wohin a Bewegung géd (z. B. gê, kema, foan, fliang, graxln, schwima, rena, etc.), sondan a wo de Peason si befint, dé wo de Aussåg måcht. Es måcht an Untaschiad ob ma sågt: Ge ins Haus aina, oda ge ins Haus aini. Dés õane Måi is dé Peason, wo dés sågt, im Haus drin, dés ãndane Måi iss draust. S Frågewoat fia de Richtunngsadweam is Wohî?

Dés Sisdém fu de Richdungsadweam kimt uaschbringlich ausn mitlhochdaidschn Boarisch und in Rudiment gibt s dés auf Umgangsdeitsch a nu, wiad åwa doat néd so konsequent fawent. (Geh ins Haus herein! / Geh ins Haus hinein!). Im Hochdeitschn owa legt ma ah an starkn weat drauf (Komm herein/Geh hinein)

Oladings muas ma sång, das de Richdungsadweam ned im gãnzn boarisch Schbråchraum ainhaitlich san, sondan es gibt jewails mearane faschidane Foamen im Mittlboarischn und wida ãndare im Noadboarisch und im Sidboarischn. Déswéng is dés fia ned-Boarisch-Schbrecha håibwegs schwa zum faschdê. Boarisch-Schbrech søwa faschdengan åwa maistns a de Foamen fu ãndane boarischn Dialekte wia eanam aigenen.

A Baischbü fia s Mitlboarisch (MB) is dé Tabøn:

Englisch	hea	hî	då	doat
inside	aina	aine	hearin	drin
outside	aussa	ausse	hearaust	draussn
up	aufa	aufe	hearom	drom
down	åwa	åwe	hearunt	druntn
forth	fiara	fiare	heafoan	foan
behind	hintra	hintre	hintn	dahinta
over there	dãna	dãne	headãnt	hidãnt
over here	uma	ume	hearüm, hearént	drüm, drént
closer	zuwa/zuara	zuwe/zuare	heabai	hibai
through	duacha	duache	duach	duach

Orts- und Richtungsadverbien af Nordboarisch:

Standarddaitsch	her	hii	dou	durt
herein + hinein + drin	aina, aicha	aine, aiche	herinn, herinna(t)	drinn, drinna(t)
heraus + hinaus + draußen	assa	asse	herass(n), herasst	drass(n), drasst
herauf + hinauf + droben	affa	affe	heroom(at), heruum, heruam	droom(at), druum, druam
herunter + hinunter + drunten	ora, owa	oi(che), owe	herunt(n)	drunt(n)
vor + vorn	fira	fire	hervorn	vorn
hinter + hinten	hint(r)a	hint(r)e	herhint(n)	hint(n)
nach	noucha	nouche
herüber + hinüber + drüben	iwa, iwara, umma	iwe, iware, umme	heream, heriim(a), herent	dream, driim(a), drent
auf … zu + her, hin	zoua	zoue	her(a)	hii
heran + dran	åna	åne	heråå	dråå
weg	weg(ga)	wegg	wegg	wegg
durch	durcha	durche	durch	durch
weg … zu, weg … von	dåna	dåne

• dåne, dåna: „dan-hin“, „dan-her“; Owerdaitsche Houchsprouch frejers: hindan, herdan (schau ar af Daitschs Werterbouch). In Naihouchdaitschn hout'se ner nu von dannen dahåltn.
• -a und -e: Dej Endunga han Vaschlaifunga vo -her und -hii, ålso beispülswais aina = ain-her, aine = ain-hii.

Åbkiazungen

• MB = middlboarisch

• WMB = westmiddlboarisch
• OMB = ostmiddlboarisch

• SB = südboarisch
• NB = noadboarisch