Braka
Aus Wikipedia
| Der Artikl is im Dialekt Hausrukfiatlarisch gschrim worn. |
A Braka is Weakzaig mid dém ma an Débich sauwa griagt in dém ma in Schdaub und dé Müm aussa brakt. Auf Hochdaidsch sågt ma zu dém Drum a "Teppichklopfer", auf Holendisch "mattenklopper" und auf Englisch "carpet beater".
[dro werkln] Funkzion
Wãn a Depich oda a Foahãng z'gros und z'schwa is, das man wåschn kãn, da kã ma in Schdaub und in Drég a mechanisch aussa griang, in dém ma mid am Braka gschaud drauf hoazt. Fia dés hengt ma in Débicham auf a Schdãng und haud dãn gschaid drauf - jé fésda, desdo béssa. Dés soitad ma am gschaidan draust im Goatn måcha und dé bésde Zaid fum Joa dafia is da Winta, wai im Winta, wãn a frischa Schne ligt, dãn wiad da Débich a ned dréki, wãn man am Bon dahî schloaft. Wea de Schdaubmüm komplet ausn Matrial drausn håm wü, kãn in Débich im Winta nu dazua iwa d'Nåcht draust låssn und wãns gschaid kåid is und gfread, dãn dafreads de Müm.
So a Braka is moasdns aus Widhöözl gmåcht, oda aus an Ratan und dé Zwaigal wean ois a frisch brokde gflecht und schbéda drikat. A so griagt ma an fésdn Braka, dea a elasdisch is und fåst a so ausschaun soi wiar a Denis-Schlega.
[dro werkln] Kuituagschichtlichs
Da Braka woa bis in de 70ga Joa de Schdandard-Ausrüstung fia dés das ma an Depich oda an schwan Foahãng sauwa griagt. Bai de dipischn Beton-Wonblok-Ãnlång fu deara Zaid woar oiwai a im Goatn a Schdãng zan Depich braka mid âi plant. Ois Altanativn zan Braka håds schã saidn schbådn 19tn Joahundat a so Depichrola gém, dé si åwa nia so gãns duachgsézt hãm.
Eascht wia Schdaubsauge a biliga woan han und so ziaka åb de 1970ga Joa fåst in jédn Haus õana då woa, håd si d'Fawendung fu de Braka mea oda wénga aufghead.
Oft han soichane Braka åwa a fia an ãndan Zwek misbraucht woan und es woa lãnge Zaid fabrait, das Kinda fu eanare Ötan mid'n Braka gschlång woan han, wãn's schlim gwén han. A bai familiere Schdraidarain is goa ned so södn zan Braka grifn woan und déswéng woa dåmåis dés Weakzaig foa oim in Holãnd, Daidschlãnd, Ésdaraich und Italien so wås wia a Simbol fia néd-gewåitfraie Metodn fum Kinda aufziang.
