Bsundaheitn im boarischn Vokabular

Der Artikl is im Dialekt Westlichs Nordboarisch gschrim worn.

De boarische Sprouch hout se wej ålle lewendinga Sprouchn iwer d Jorhundert entwicklt und entwicklt se aa su waiter. Es git an girbtn Wortschoz, asserdean wern wej in praktisch jeder Sprouch Werter as åndere Sprouchn (z.B. französisch, jiddisch, tschechisch...) mit afgnumma und braucht, wej wenn's ainge warn (assimiliert). Gem tout's asu aftolt Erbwerter, Lenwerter und Fremdwerter.

A åndere Aftalung gejt nouch de Bsunderhaitn in Wortschoz. Dou git's speziöll boarische Kennwerter, dej wou's blous in boarische Dialekte git. Waiters Werter, dej wou es Boarische gmoansåm mit åndere owerdaitsche Dialekte hout. Und es git Werter, dej wou's mit da Houchsprouch gmoansåm hout. Dej ålle natirle in mejer oder wenger boarische Entwicklungs- und Lautforma.

Der Artikl ejtz gejt afn unterschiedlinga Wortschoz zwischa Boarisch und Standarddaitsch a.

Boarische Kennwerter (speziöll boarischer Wortschoz)

(sää dazua aa an Artikl Bairische Kennwörter)

Bål d Sprouchwissnschåftler vo boarische Kennwerter ren, nou moana's Werter, dej wou de boarischn Dialekte (historisch) vo de Nåchbardialektgruppm ogrenzn. Des hoisst ower niat umbedingt, das dej Werter eanere Wurzln in Boarischn hom mejn, und niat, das's dej Werter nejchads sunst in daitschn Sprouchraum gem kå oder frejers gem hout kinna, oder das's ålle Werter in gsåmtn boarischn Sprouchraum git oder gem hout mejn. Oa Werter han schou asgstorm, oa kenna ner nu de öltern Lait, und oa git's ner nu in a por ålte Låndmundortn oder ner nu in a por Gechadn. Åndere dageng wern nu braucht, und a por han sugor in d Standardsprouch afgnumma worn. A Aswol vo boarische Kennwerter, mit eanerer Sprouchgschicht:

Kennwerter in Schriftdaitsch	Standarddaitsch	boarische Dialektforma, naiere und regionåle Werter	Hintergrund, Wurzln, Herkumma
aft	nachher, dann	åft, aa: MB: nå(cha), NB: nòu(cha); naier aa: dånn	germanischs Irbwort, vgl. bspw. englisch after
Anterer	Erpel	Ànterer	mhd. ant, ænt; ahd. anut
Änze	Gabeldeichsel	Ànzn	slawischs Lenwort, vgl. bspw. tschechisch ojnice
aper	schneefrei	åper, àper	mhd., ahd. āber, worschains a ålpmromanischs Lenwort wos vo latainisch apricus = offa, unbedeckt herkummt, oder eaba a germanischs Reliktwort ā-bar = wos niat (Schnej) trågt, vgl. bspw. norwegisch afberr = afglaint
Brein	Hirse	Brein, naier: Hirse	mhd. brī(e), Genetiv brīen, ahd. prī
Budel	Ladentisch	Budl, Lònbudl
Bussl	Kuss	Bussl	lautmolad bu-/bus-, wej's aa åndere Sprouchn hom
Dachel	Dohle	Dàchl	mhd. tahel, tæhel
Dult	Jahrmarkt	Dult	mhd. dult, ahd. tuld(î), vawåndt min und kummt worschains asn gotischn dulþs = Fest In Båssa und Rengschbuag gibts d'Mai-Dult und d'Herbst-Dult. Asonstn soagt ma eha Volksfest dazua.
Fasching	Fasching	Fåsching; NB/westlichs WMB: Foosenoocht, NB: Foosnat (und åndere, enliche Forma)	zerscht belegt in da Passauer Weberordnung vo 1283 åls vastschanc, vaschanc = Asschånk von Fåstntrunk, umdaitt zo vastganc = Umzuch vor da Fåstnzait Des Wort hout se in Bayern vo Sidostn her asbroitt und es öltere Fas(e)nacht vadrengt. Des gült ower niat åls boarischs Kennwort, wal des aa de åndern owerdaitschn Dialekte hom.
Fürtuch	Schürze	Firda	mhd. vortuoch, frnhd. fürtuoch = ainggle Touch wou firbundn wird
Göt, Gote	Pate, Patin	Ged, God(l), NB: Ded, Dod(l)	mhd. göt(t)e, got(t)e, ahd. gota, gode
ees, enk, enker	ihr, euch, euer	ees, enk, enker; naier aa: ihr, aich, ai(ch)er	ejmols Dualforma (ner zwoa Lait han ågsprocha worn)
Erchtag, Ertag, Ergetag	Dienstag	Irda, Erchda (und åndere Forma); naier: MB: Deansda, NB: Dejnsda	mhd. ergetac, ertac (vo erjotag as arjotag), ålt-boarisch erintag, asn gotischn areinsdags, des asn kirchagrichischn areōs hēméra = Toch von Krejchsgot Ares, umdaitt vo de Gotn åls Toch von Bischof Arius
Har	Flachs	Hår, naier: Flåchs	mhd. har, harwes; ahd. haro
iterucken	wiederkäuen	naier: hiidrucka, irdrucka, wiederkaun, eikaun und åndere	iterucken gejt af ålthouchdaitsch ita- + -rukjan/-ruchen zruck, wos wieder- + -speia, -koppm hoisst. hiidrucka und irdrucka han Umdaitunga af drucka, wal d Lait ejchadwenn de urspringliche Bedaitung von åltn Wort nemmer gnaisst hom.
kentn	zünden	ôkentn, naier aa: ôzindn	germanischs Reliktwort; vgl. bspw. schwedisch kinda, englisch to kindle
Kirchtag	Kirchweih	Kirda, NB: Kirwa
Kranewit	Wacholder	Krånawittstaudn, NB aa: Kråmpatstauan	mhd. kranewite; ahd. kranawitu, vo krano = Krånich + witu = Hulz; mhd. wit, wite; boar. Wid = Raiser, Gråssat
Kuchel	Küche	Kuchl, NB aa: Kucha; naier aa: Küch, Kich	dej ålle asn Mittllatainischn, vo coquere = kocha
Längess	Frühling, ölter: Lenz	sidlicher boarischer Sprouchraum: Lànggess (und enliche Forma); aa ölter: "Auswärts": Auswàrts, Àswàrts, Àssats; naier: Friajohr, NB naier: Frejjòuer	mhd., ahd. langez, vo westgermanisch langa-tīn(a)- = quase långer Toch, wal in Frejjouer d Tach lenger wern. Es ålte Wort in ower- und mittlhouchdaitschn Sprouchraum schou in da ålthouchdaitschn Zait wor "Lenz", ner in sidlinga boarischn Sprouchraum wor's aa "Längess". "Auswärts" is in da mitthouchdaitschn Zait in an Tol von boarischn Sprouchraum dazoukumma. "Frühjahr" is erscht in da naihouchdaitschn Zait dazoukumma und vadrengt de åltn Werter immer mejer.
Maut	Zoll	Maut	mhd. maut, in 6./7. Jhd. entlent as gotisch mōta = Zoll, des as germanisch mōta, boar. schriftle åls mūta in 9. Jhd. Des is aa in d Standardsprouch iwernumma worn.
Pfait	Hemd	Pfoad, naier: Hemad	asn gotischn paida, des asn grichischn baíté
Pfinztag	Donnerstag	Pfinzda, naier: Dunnerschda	mhd. pfinztac, asn grichischn pemptē hēméra = da fimfte Toch, durchs Gotische ins Boarische kumma. Des ner in ahd. belegte pferintag = Fraita is ower valorngånga.
Rauchfang	Kamin, Schornstein, Rauchfang	Rauchfång, Raufång	Schau untn in Gsatzl Variantn in boarischn Wortschoz.
schauern	hageln	schauern	mhd. schūr, ahd. scūr = Sturm, Rislschauer, as westgermanisch skūra-
Scher	Maulwurf	Scher	mhd. scher(e), zo scheren = schnain ålso ainggle der wou Ern durchschnaidt
tenk	links	denk, naier: links	a germanischs Reliktwort, vgl. bspw. ostgermanisch-langobardisch þankuz, altnordisch Ɵekkr = guat
Wagense, Wagensun	Pflugschar	Wångsn, naier:: Wågeisn	a germanischs Reliktwort, vgl. bspw. altnordisch vangsni. Mhd. wagense, ahd. waganso, asn germanischn wagansōn. Frejers etle mundortliche Variantn, aa in Orts- und Famüliennåman, baispülswais Wagensonner
Waier	Leitseil beim Fuhrwerk	Woier(er), Waier(er)	entlent asn Slawischn; mhd. weijer, asn tschechischn vajir
Walger, Walker	Nudelholz, Teigrolle	Nudlwòiger, NB aa: Nudlwàlzl	vo mhd. walken, germanisch walk-a-
Zecker, Zeger(er), Segerer	a Ort (gflochtane) Trochtåschn oder Trochkorb	Zeger(er), Segerer	asn Tschechischn

Waiterer unterschidlicher Wortschoz zwischa Boarisch und Standarddaitsch

De gnenntn Werter in de Tabölln kinna frale ner a kloane Aswol vo de etle tausad boarische Werter saa. Gej tout's douda niat um Werter mit Lautunterschid, sundern wenn in Boarischn gånz åndere Werter fir de standarddaitschn oder gmoandaitschn stenga.

Adjektive

Standarddaitsch / Umgångssprouch	Boarisch
dumm	debbad, dàmisch
fettig süß	gail
geil	ôhabi/auhabig, gàmsi(g)
glatt, rutschig	hai, NB: hàl
hässlich	schiach, greislig, grauslich, NB: schejch, wejst, greisle
kross	resch, knuschprig
lecker (vo Niederdeitsch: lekker)	guad, gschmackig, fein
mühselig	zàch
nötig	notwendig, noutwende
scharf	ràss
taub	dârrad, dearisch, dorad
verwirrt, wirr, närrisch	zwirt
wählerisch	gschleckad, hoaglad, hoaglig

Griaß

Standarddaitsch / Umgångssprouch	Boarisch
hallo	griaßde, séas/servus, habedére
auf Wiedersehen, ciao, tschüss	pfiade, servus, habedére

Artikl

D Bsunderhait ba de Artikl han niat d Werter ån sich, sundern das es Boarische betonte und unbetonte Forma hout. Dou ejtz wern's ner kurz dorgstöllt, mejerer stejt af da Saitn zu da boarischn Grammatik.

Standarddaitsch / Umgångssprouch	Boarisch
der, die, das	betont: der, de/dej, des unbetont: da, d/de, es/as/s
ein, eine	betont: oa/aa/oi unbetont: a

Demonstrativpronomen

Standarddaitsch / Umgångssprouch	Boarisch
dieser, diese, dieses	dea (..) do, dé (..) do, dés (..) do (gean aa in Vabindung mit oam ins Neutrum brochtn Ausdruck z.B. dés Monnsbuijd do, des Weibaleit do, dés Kindl do; in Vabindung mit Neutrum Singular unn 'in' oda 'an': dera oda aa dera (sei, ia, eana))

Relativpronomen

Standarddaitsch / Umgångssprouch	Boarisch
welcher, welche, welches der, die, das	dea wo, dé wo , dés wo (oda dea wås, dé wås, dés wås)

Adverbien und åndere

Standarddaitsch / Umgångssprouch	Boarisch
beide	de zwoa, ålle zwoa, boade
bereits	scho
damals	dselm, zejm; NB: durtmòls, sölmòls
danach	Boarischa Woid: åft; nouchad
eher	enda, era
einige	a bår; oa; an etla
extrem	gààch, z.B. do gèhts gààch òbe (starke Hangneigung)
hinab	Boarischa Woid: åi
hinauf	aui, auffi; Boarischa Woid: eu
häufig	oft, ollavai
manchmal	MB: adiam; NB: ejamòl (= ië-einmal)
nur	WMB: bloß, sched; OMB: neta, grod; tirolerisch: lei; NB: ner, (ner)blòuß, (ner)grod
nicht	ned, Niederboarisch: iat; NB: niat
rückwärts	arschlings

Substantive

Standarddaitsch / Umgångssprouch	Boarisch
Dohle	Dàche
Dummschwätzer, Schwätzer	Schmarra, Schmatza, NB: Schmarrer, Wåwl(er), Schmaderer
Geschwätz, Gewäsch	Gschmatz, NB: Gschmarre, Gschmader, Gwaf
Heulsuse	Reerbeidl, Drenzbeidl, NB: Greinmaichal
Mütze	Haubm, Kappn
Pfütze	Lackn/Lâckan/Locka/Latschn
Ramsch	Glumpad, Glump
Tier	Viech
Toilette, Klo	Heisl, Òòdrid/Åbdrid
Topf	Hofa/Hofm/Hefa/Hefm; Degl; Scherm (irdaner Hofa)
Unsinn, Quatsch	Schmarrn, Grambf, Kàs, Schààs

Kulinarischs

Standarddaitsch / Umgångssprouch	Boarisch
Brötchen	Semme; Loabal/Lààbal/Loiwe; Weckal
Frikadelle	Fleischpflanzal, Fleischgrapfal, Fleischlààbal; NB: Fleischkejchl, Fleischpflànzal
Kartoffel	Eadåpfe; Eachdling; Grun(d)birn; Westnordboarisch: Er(d)birn
Limonade	Grahal/Grachal, Springal
Pflaume	Zwetschgn/Zweschbm, Pflaam
Quark	Topfn/Dopfa; in nordboarischn Raum je nouch da Gechad aa: Dopfkàs, Ziwalkàs, Quark
Rote Bete, Rote Rübe	Råna; NB: Ròute Roum; Österreich: Róde Ruam
Rotkohl	Blaugraud; Österreich: Ródgraud
Saure Milch	Soibern/Söibern, Gschtecklte
(Schlag)sahne	Altbayern: (Schlòg)ràhm, Österreich: (Schlåg)obers

Verbn

Standarddaitsch / Umgångssprouch	Boarisch
anfassen	åglanga, ågreifa, odatschn (grob anfassen)
beischlafen	schnàgsln, bimpern, zambacka, mausn
etwas erreichen	in ... okemma (Ort); ebbs (wås) schaffn, dagrejn (Züi); ebbs (wås) durchdrucka (durchsetzn)
erschrecken	intransitiv: dakema; transitiv: (ebban / wen) daschrecka
fliehen	davolaffa, davorenna, obhaun, ahpaschn, se schleicha
heulen, weinen	reern, reerbeidln, drenzn, woana/wààna, rotzn; NB aa: hejna, blern
hochgehen - hochkommen, hinaufgehen - heraufkommen	a(u)ffegeh/naufgeh - a(u)ffakema/raufkema - (im Boarischn gibts an Untaschied zwischn hinauf und herauf)
jemanden erreichen	ebban (wen) dàglanga/dàwischn
kleckern	drialln, drenzn, dröldan, påtzn
sabbern	drenzn
Unsinn reden, faseln	Schmarrn vazàpfn
vermissen	Zeitlang ham, wahlweis Umschreibung: ebbs fehlt oam, ebbs gäjht oam oo

Nama

Dialekt: Obaboarisch

Vornama

Wia in andane Sprachn a gibt's an haufn Vornama, de zwar woandas a heagnomma wean, oba lokal a eigne Ausproch oda Kuazfoam hobn.

Im Boarischn wead eiganlte fast a jeda Nam vaküazt. Heifig g'schicht des duachs weglassn vo am Teil hint' oda voan und duachs ohenga vo da Vakloanarungfoam. Des geht dann aso: Ludwig --> wig (des "Lud" wead wegglassn) und dann vakloanat mit "-al" --> Wiggal. Beim Ludwig gibts a no a wengal schwera erkärbare Foam: Ludwig --> Lug (des "dwi" lasst se scho sakrisch schwar ren mit 6 Hoiwe!) --> Luggi.

Buama

• Da Done is da Anton (Preißn deafn a Toni song, head si sunsd wia "Danone" o)
• Da Klausi hoaßt vielleicht Klaus, kunt aba a da Nikolaus sei
• Da Jackl hoaßt Jakob
• Da Schorsch hoaßt Georg
• Schosi håd da Schorsch ghoaßn wiara no kloa gwen is
• Da Hias(l) hoaßt Matthias, wobei des "ia" zsamzong ausgsprocha werd
• Da Stachus is da Eustachius
• Da Wâstl is da Sebastian
• Da Gust(l) is da August oder da Gustav
• Da Lugge, da Luze oda da Wiggerl is da Ludwig
• Da Vesti is da Sylvester
• Da Voitl is da Valentin
• Da Lenz is da Lorenz
• Da Flori is da Florian
• Da Nazi is da Ignaz
• Da Sepp oda Bebbe hoaßt einglich Josef oda Joseph
• Da Hansi hoaßt einglich Johann oda Johannes
• Da Fonse hoaßt in da Hochsproch Alfons
• Da Hausl is da Balthasar
• Da Moatl oda Martl is da Martin

Madl

• D'Lisi, S'Lisal und a d'Sisi hoaßn olle Elisabeth
• S'Anamirl hoaßt Anna-Maria
• D'Fanni odas Fanndal oda Zisse hoasst d Franziska, moderna songs Franzi dazua.
• D'Zenze kimmt vo Kreszentia
• D'Resl wiedarum kimmt vo da Theresia
• D'Rosl ko d' Rosemarie, d' Rosa oda a d' Roswitha sei
• D'Vroni kimmt vo Veronika
• Wer a Katl (a Katharina) hod, dea braucht koan Humd am Hof, song d'Bauan
• D'Nessi haßt Agnes (z'mindest im Ostn)
• De Schoschi is de Georgine
• De Vevi oda s' Veverl is de Genoveva
• De Beppi (oder Peppi) is de Josephine
• S'Nandl hoaßt Anna
• D'Mari kimmt vo Maria
• D'Zili hoaßt Cäcilie
• S'Hannel hoaßt eigentlich Johanna

Zu friahrane Zeitn hom de Pfarrer in manche Gegndn vo Baiern des kirchliche Recht recht restriktiv ghandhabt und am ledig geborna Kind an Nam vom Dogheilign der grod zu da Geburt im Kalenda dro war gem. Warn grod zwoa Heilige dro, hots da ausgfoinare sei miassn. (D'Pfarrer woitn damit d'Muatta unds Kind füa d Sünd strafa) Des hod in Baiern manch säitna Vornam zu am ziemlichn Aufschwung vahoifa, wia zum Beispui am Sylvester oda am Eustachius.

Zwoa recht scheene Nama, de aba durch de neiere Gschicht international mit recht negative Sachn verbundn wern und deswegn kaum mehr benutzt wern san foigende:

• D' Stasi schreibt se Anastasia, heitztog denkt aba jeda ans "Ministerium für Staatsicherheit" aus da friaran DDR
• Da Naz schreibt se Ignaz, heitztog denkt aba jeda an an Anhänga vo da NSDAP, am Hitler oder sonst oana rechtsextremen Padei

Bei da Deitschn Wikipedia steht beim Naz, daß wega da Vabreitung vo dem Nama Ignaz im Böhmischn und in Estareich d' Leid aus Estareich und Böhmen friara umgangssprachlich Nazi gnennt woan san.

Schau aa: Listn vo boarische Vornam

Nachnama

Freili gibt's im boarischn Sprachraum ned nur Vornama, sondan a Nachnama. Und das ned so oafach is a no an Ruafnama und manchmoi a an Hausnama. Wenns'd oan froagst wiara hoaßt, sogd a da wahrscheinli sein richtign Vornama, wiara im Pass steht. Wenns'd wissn mogst, wia sei Nachnama laut, frogstn wia ra si schreibt, wei der werd einglich nur zum Untaschreibn hergnomma. Ruafn duad ma d'Leid entsprechend de oban Beispui. Aufm Land de Bauernhöf ham oft a no an Hausnama, dann nennd ma d'Leid noch dem Hof, vo dems kemman. Kunnt oiso durchaus vorkomma, das oana so seine Nama daklärt: "I bin da Bernwieser, schreib mi Huber, hoaß Nikolaus und werd Niki gruafn"

Abircherte Werter as åndere Sprouchn

Asn Franzesischn

Schou vor lengerer Zeit hom se an Haffa franzesische Asdrick ins Boarische abirchert. Es houd åls vornem goltn, wem'ma dej hernumma hout, wal vor ålln d Aristokratn åm Hof franzesisch gsprocha hom. Ner d Assprouch is a wengal åpasst worn.

A Tol vo de gånzn franzesischn Werter wird haintzadoch ower nemmer su oft und vo wenger Lait braucht wej frejers. Dou hejert oans nou åndere boarische Werter oder Werter as da Standardsprouch, bsunders vo de jingern Lait.

Standarddaitsch	Boarisch	Franzesisch
Der Regenschirm	Da Baraplui	le parapluie
Der Bürgersteig, der Gehsteig	Des Trottoàr	le trottoir
Die Zimmerdecke	Da Blafon	le plafond
Der Nachttopf	As Botschàmperl, da Botschamper	le pot de chambre
Das Federbett	As Blümo	la plume, le plumeau
Der Geldbeutel	As Portmonnä	le portemonnaie
Das Sofa, die Couch	As Kanapee	le canapé
bequem	kommod, kammodt	commode
gegenüber	wisawi	vis-à-vis
zurück	retur	retour
Rinderschmorbraten	Böfflamott	boeuf à la mode
danke	mease	merci

Asn Latainischn

Aa von Latainischn hout es Boarische Werter, dej wou in Boarischn efters zon Hejern han åls wej de niatlatainischn oder d Entsprechunga in Standarddaitschn.

Standarddaitsch	Boarisch	niat-boarische Form/Herkumft
Arzt	Dokter	Doktor
es eilt	es pressiert	es pressiert
geschehen, sich ereignen	påssiern	passieren
genau; ausgerechnet	aggràtt	akkurat. "Aggràtt" hoisst quase "gånz genau" bis "iwergenau".
hallo!, tschüs!	servas! / servus!	servus = Diener, Sklave. "Servus" is aa vatraulicher wej standarddaitsch "hallo", "tschüs" oder fränkisch "adé"
Schnupfen	Kàtàrr (je nouch Gechad aa: Strauchn)	Katarr(h)
quälen; piesacken	seggiern	sekkieren
versuchen	prowiern	probieren
Brötchen	Semme	simila hoisst "Weiznmej"

Asn Italienischn und åndere romanische Sprouchn

Sidlich von boarischn Sprouchraum ligt da italienische (romanische). Su hout es Boarische aa Werter vo durtn afgnumma.

Standarddaitsch	Boarisch	niat-boarische Form/Herkumft
Blumenkohl	Kàrfiol	italienisch: cavolfiore
Lust auf etwas; Geschmack	Gusta(rer) / Gusto	italienisch: gusto
Liebschaft; Geliebte(r), Freund(in)	Gspusi	italienisch: sposa, sposo = Braut, Bräutigam
sich herumtreiben	strawànzn	italienisch: stravaganza = Extravaganz
Zwetschge, Pflaume	Zwetschgn	asn Romanischn, wej in norditalienisch: davascena, vo latainisch: damascena = Frucht as Damaskus

As slawische Sprouchn

Estlich und sidestlich von boarischn Sprouchraum ligt da slawische. Aa vo durtn hout es Boarische Werter afgnumma, bsunders es Boarische in Esterraich.

Standarddaitsch	Boarisch	niat-boarische Form/Herkumft
a Ort gfüllte Toachtåschn	Buchtl, Wuchtl	tschechisch: buchta
Mais	Kukuruz (haptsechle in Esterraich)	serbisch: kukuruz, vaglaich aa tschechisch: kukuřice
Merrettich	Kren, Krêê	tschechisch: křen, russisch: хрен
schön, gut	dober (im Boarischn Wold)	tschechisch: dobrý/dobře
Spitztüte	Stranizn, Stanizl, Stanizn	russisch: страница = Buchseite

Assprouch vo Fremdwerter

Dialekt: Obaboarisch

Im Boarischn san Wöata aus andane Sprachn eigentlich fast imma a soo ausgsprocha worn, wia mas schreibt. Oiso zum Beispui Klaud(e)-Lorrein-Strass statt frz. Clood-Lorä'-Strass oda Emeil statt engl. Iimääil. De äitane Generation hoit an dera Weis imma no fest. De jüngan Leid gengan dazua üba, de nei zuagroasstn Wöata a soo auszprecha, wia sas im Fernsehn hern oda in da Schui lerna, oiso meistns korrekt in da jeweilign Landessprach - mit aran kloana Schuss boarischa Aussprach drin.

Variantn in boarischn Wortschoz

In Boarischn git's an Haffa Variantn, des hoisst, das's fir jewals oa Såch mejer wej oa Wort git. A jede Variantn hout quase ira Gai und ira Gschicht. De druntere Tabölln stöllt a por Variantn fir, min jewalinga Raum wou's braucht wird.

Standarddaitsch	boarische Variantn	Hiwais
Kamin, Rauchfang, Schornstein Kaminkehrer, Rauchfangkehrer, Schornsteinfeger	estl. Esterraich, sidestl. Åltbayern: Rau(ch)fång westl. Esterraich + Sidtirol: Kemat sidwestl. Åltbayern: Kåmin, Kåmĩ Nordbayern: Schlòut mittlestl. Åltbayern: Kintl Da Må wou d Schlout kirt is wou's Kåmin hoisst: da Kåminkirer wou's Rau(ch)fång hoisst: da Rau(ch)fångkirer wou's Schlòut hoisst: da Schlòutfecher	Rauchfang is in Esterraich es Gmoanwort aa in da Standardsprouch, in Daitschlånd kummt des aa in da Standardsprouch fir, durtn is ower a Rauchfang ner da Tol untn ower a Faierstöll, wou da Rauch ozejgt. A Kamin d Faierstöll untn, a Schornstein da Tol bis afs Doch affe åm Haus oumat. Und a Schlot a Rauchåbzuchsturm vonara Fabrik. Kamin kummt asn latainischn camīnus = Faierstöll, Herd, Rauchåbzuch, ahd. kemīn, chemīn, mhd. kamīn, kemīn, de naiere Form asn italienischn camino. Kemat kummt von latainischn camera caminata = Stum wouma hoizn kå (vgl. Kemenate). Dej Forma asn Latainischn hom aa in de Dialekte in schwebischn und alemannischn Raum ainegfunna, in da Schwaiz is ålte Wort Chemi, Chämi.Schlòut is aa is Dialektwort in ostfrenkischn Raum. Des wor in Mittlålter vül waiter sidlich vabroitt und des kummt vo mhd./ahd. slāt, slōt = Kamin, Ufaluch und Darr. Schornstein, des is in vaschidane Forma es Dialektwort in Nord- und in Westmittldaitschlånd und gült haintzatoch åls Gmoanwort in da Standardsprouch in Daitschlånd. Des wor zerscht da Stoa, der wou en Rauchfång af da oana Saitn gstitzt hout (mittlniderdaitsch schōre = Stitzn, Stempm), spejter de gånz Faierstöll. Kintl kå zåmmahenka min glaichghoissana kluma Herdhulz oder min boarischn Kennwort kentn. In da Ålltochs-/Umgångsprouch zoigt se haintzatoch in boarischn Sprouchraum wider a ånders Büld åls wej in de Dialekte und in da Standardsprouch, nemle in Åltbayern newa Kamin aa Schornstein (ejers ner es erschte), und in Esterraich aa in Ostn newa Rauchfang aa Kamin (des wej in Westesterraich, Sidtirol und Åltbayern), gechadwais dej zwoa Werter mitara weng a åndern Bedaitung.
Pferd	Roß nordwestl. Åltbayern: Gal nordestl. Åltbayern: Pfaa	Roß is es Dialektwort aa in alemannischn Raum. Des Wort git's aa in da Standardsprouch, durtn is ower stülmasse gehobm und niat es Naitralwort. Wej Ortsnåman und Reliktwerter zoing, hout des Wort ejmols schaints in gånzn daitschsprouchinga Raum goltn. Gal = Gaul is åls Dialektwort aa in ost- und sidfrenkischn, in schwebischn und in zentralmittldaitschn Raum vabroitt, durtn åls Naitralwort, derwal stejts in da daitschn Standardsprouch fir an minderwertinga Gal, boarisch Haiter. Pfaa = Pferd is es Dialektwort in Nord-, Westmittl- und Ostmittldaitschland und dazou es Naitralwort in da Standardsprouch. Des Wort kummt von mittllatainischn paraveredus (Beipferd zum Postpferd auf Nebenlinien).
Topf, Hafen	Westn: Hofa, Hofm Ostn: Hefa, Hefm nordestl. Åltbayern: Duapf, Duupf	Hofa, Hofm = Hafen und Hefa, Hefm = Häfen han d Dialektwerter in gånzn owerdaitschsprouchinga Raum. Dej han aa åls Gmoanwort in da Standardsprouch in Esterreich afgnumma worn. In da Standardsprouch in Daitschlånd gült ower Topf, des stammt asn ostmittldaitschn Dialektraum, åls Gmoanwort. Iwernumma ins Boarische is blous in nordestlinga Nordboarischn in da durtinga Dialektform. In Boarischn git's aa nu Scherm = a irdaner Hofa und Tegl = a (grousser) Hofa.
Gurke	nordwestl. Åltbayern: Kimerling sidl. Åltbayern: Gugummer nordestl. Åltbayern + westl. Esterraich + Sidtirol: Gurka, Gurkn estl. Esterraich: Murkn, Umurkn	Gurka, Gurkn = Gurke kummt asn Slawischn, des is aa es Wort in da daitschn Standardsprouch worn. Murkn, Umurkn kå aa asn Slawischn oglaitt wern. Gugummer und Kimerling kumma asn latainischn cucumer. Enliche Forma wej Gugummer hom aa de schwebischn, alemannischn und westmittldaitschn Dialekte, enliche Forma wej Kimerling aa de ostfrenkischn Dialekte. Vo de Werter kå'ma af d Wech schlejssn, wou Kimerling herkumma: Oamol vo de Romanen, vo Kloa-Asien iwer Grejchalånd iwer Rom schou frej, und oamol spejter von Ostn iwer de Slawn.
Schreiner, Tischler	Åltbayern: Schrainer Esterraich + Sidtirol + nordestl. Åltbayern: Tischler	Schreiner is in da jewalinga Form es Dialektwort in da Schwaiz, in gånz Siddaitschlånd und in Westn vo Daitschlånd, Tischler es Dialektwort in Esterreich, in Ostn und inn Nordn vo Daitschlånd, durtn ower one es "l". Dej zwoa Werter kumma vo dean wos d Zimmerlait söllmols in Mittlålter ågferticht hom, und dej hom ållzwoa in d Standardsprouch ainegfunna.

Åbkirzunga

• MB = middlboarisch

• WMB = westmiddlboarisch
• OMB = ostmiddlboarisch

• SB = südboarisch
• NB = noadboarisch

Schaug àà unta

• Boarische Sproch
• Wikipedia:Boarische Umschrift
• Boarische Dialekte im Vagleich
• Boarische Grammatik
• De boarische Wocha
• Latein im Boarischn

Quölln und Literatur

• Ludwig Zehetner: Bairisches Deutsch, Heinrich Hugendubel Verlag/edition vulpes, Kreuzlingen/München/Regensburg, 2005, ISBN 3980702871

• Ludwig Zehetner: Das bairische Dialektbuch, Verlag C.H.Beck, München, 1985, ISBN 3406305628

• Manfred Renn, Werner König: Kleiner Bayerischer Sprachatlas, Deutscher Taschenbuch Verlag, München, 2006, ISBN 3423033282

• Werner König: dtv-Atlas deutsche Sprache. Deutscher Taschenbuch Verlag, München, 2004, ISBN 3423030259

• Friedrich Kluge, bearb. v. Elmar Seebold: Etymologisches Wörterbuch der deutschen Sprache/Kluge, Walter de Gruyter, Berlin/New York, 2002, 24. Auflage, ISBN 3110174731

Weblinks

• "Mein liebstes bairisches Wort" auf br-online
• Bayrisches Wörterbuch zum Nachschlagen, Lachen oder Schmunzeln

Der Artikl gheart zu de berign Artikl in da boarischn Wikipedia.