Diahåppn

Der Artikl is im Dialekt Obaboarisch gschrim worn.

Diahåppn
	48.56666666666710.916666666667
Basisdatn
Bundesland:	Bayern
Regierungsbezirk:	Schwom
Laundkreis:	Augschburg
Heach:	430 m ü. NN
Flejchn:	39,15 km²
Ejwouna:	3.777 (31. Dez. 2010)
Bevöikarungsdichtn:	96 Eiw. pro km²
Sonstige Datn
Bouschtleitzoi :	86672
Vorwoi: en	08271, 08276
Kfz-Kennzeichn:	A
Gmoaschlissl:	09 7 72 207
Adress vo da Marktvawoitung:	Marktplatz 1 86672 Diahåppn
Hoamseitn:	www.thierhaupten.de
Politik
Birgamoaschta:	Franz Neher (SPD)
Log vom Markt Diahåppn im Landkroas Augschburg

Diahåppn (Betounung auf da easchtn Süüm, standarddeitsch Thierhaupten) is a Markt im schwàbischn Laundkreis Augschburg. Diahåppn ligg ejschtlich vom Leech und is im schwàbischn Laundkreis dia oanzige Gmoa, wo boarisch grejdt werd.

Erdkunde

Geogràfische Loong und Geologie

Diahåppn ligg an da ejschtlichen Leechloatn genau zwischn Augschburg und Doanawüdd. S'Untadarf ligg im Leechtoi, s'Oubadarf scho im Higlland. Dia Ortschaftn Ejtz und Oitnbooch liing in da Leechebne, Kejnigschbrunn hoibert auf da Leechloatn, Naiküücha, Weidn, Höizarn und Spoomasejck liing im Higllånd.

Im Wejschtn vom Gmoagebiet grenzt da Leech ou, aba ee ligg außahoi vo da Ortschaft. Düüch Diahåppn fliaßt d'Friedberger Ooch va Siidn nooch Nordn. Ausm Weidner Toi va Siidouschtn hee kummb d'Biiz und fliaßt in d'Friedberger Ooch. D'Ooch toit si sidlich va Diahåppn in'n Liaßgroom und in'n Müügroom, dia si na im Ort wieda vereinign. 2007  is beschloussn woan, dass's im siidlichen Gmoagebiet a Hoachwåssarückhoitebejckn und an Damm an da Ooch errichtn wöjn, dass da Ort nimma vom Hoachwåssa hoamgsuacht werd. Oo da Leech hoot in Richtung Diahåppn a boor Dàmm, wei's "Pfingschthoachwåssa" 1999 fascht zua a Kataschtrophn gfiat hoot.

Am heakschtn z'Diahåppn is da Kiahberg (499,1 m NN) z'Naiküücha. Diahåppn söwa hoot blouß an Kraizberg (478,7 m NN) mit'm Laundschåftsschutzgebiet "Kraizberg va Diahåppn". Hoach sejn oo nou da Winschnberg (453,7 m NN) nerdlich vo Naiküücha und da Ejslsberg (483,7 m NN) sidlich vo Diahåppn.

Natuaraimlich gheart Diahåppn zur "Doana-Üüa-Leech-Blattn", dia a Toi vom "Oipnvorland" is, oana va dia "Natuaraimlichn Hauptejheitn va Daitschland". Diahåppn ligg in dia Unterejheitn "Leechtoi" und "Oaingama Terràssntreppn".

Im Leechtoi bestengan dia Bejn aus Oolågerunga va postglazialem Schoutta in am broadn Kauschtntoi. Dia Flussterràssn bestengan aus dia sougenanntn Niedaterràssn und dia Hoachterràssn. Dia Niedaterràssn sejn z'Diahåppn mit Auna und dia charakteristischn Heidn mit Koichmoogaråsn- und Strààwiesnpflaunzngsöischåftn bewåchsn. Am Leech sö is nou a Stroaffa Auwoid, der mit da Oitnet zam "Natuaschutzgebiet Leechaun" hoaßt. Vüü Huiz gibt's ja schunsch ejt im Leechtoi, nur a poor Hejckn und Wöidlan. Dia "Leechtoiheidn" "Diahåppama Heidn" und "Ejtzama Heidn" stenna unta Schutz. Dia Hoachterràssn, dia sou 8-10 Metta heacha sejn wia d'Niedaterràssn, sejn scha lössbedeckt und gejnga in's Higllåund va da "Oaingama Terràssntreppn" iba. Wenn ma d'Lechloatn naufschteig und in'd "Oaingama Terràssntreppn" kummb, find ma scho an Haufa Huiz. Dia Ortschåftn Diahåppn und Kejnigschbrunn sejn umgebn vo groaße Huizgebiet (vo Nord nooch Sid: Braund, Naiküüchama Huiz, Wuifschloog, Diahåppama Huiz, Ziaglberg, Ednhausama Forscht). Hinterm Huiz is da Kiahberg vo Naiküücha, mit Wein, Höizarn und Spoomasejck, hinta dejm's na ins Toi vo da Kloan Påår noogeaht. D'Lössschicht is do gaunz schea dick, wejsweeng dejs Laund do si recht guat zum Àckern eignet.

Nachbargmoana

• Oaing (Laundkreis Oacha-Friedberg) mit dia Ortschaftn Ednhausn, Eisingaschdååf und Biicha
• Båår (Landkreis Oacha-Friberg) mit dia Ortschaftn Båår und Hoampaschdååf
• Öigau (Laundkreis Augschburg)
• Meitinga (Laundkreis Augschburg) mit dia Ortsschåftn Meitinga und Woitashoufa
• Minschda am Leech (Laundkreis Douna-Rias) mit da Ortsschåft Hemadn
• Bejmas (Laundkreis Oacha-Friedberg) mit da Ortschåft Oaschtazhausn
• Doadaweis (Laundkreis Oacha-Friedberg) mit dia Ortschåftn Booch und Saund

Ortsgliederung

Da Markt hoot acht Ortsteil:

• Ejtz
• Höizarn
• Kejnigschbrunn
• Naiküücha (Gemarkung)
• Oitnbooch
• Spoomasejck
• Diahåppn (Gemarkung)
• Wein

Gschichtn

Da Nauma kummb vo dia Germanen, dia wo doo an dera Stejn a Siedlung ghoot hobn. Schaug so aus, ois ob de Kepf oda Hapta vo Viecha ausgschtejt hom: Tiahaupt => Diahåppn. Im Joo 1776 homs oo nou an Viechschejl aus Saundstoa ausgrobn.

Doo gibt's a oite Soong, dass da boarische Herzog Tassilo III., a Agilolfinga, im Joo 750 z'Diahåppn a Kloaschta gründet hoot. Er wår in dera Gegnd auf da Jågd und hoot si nimma auskejnnt. Na hoot er gschworn, dass er an dera Stöi, wo er sei Gefolge wieda findt, zum Daunk a Kloaschta wüü baun låssn. Auf oamoi is eahm a Hiaschkuah (d'Jaga sogn do "Tia" dazua) erschiena und hoot eahm wieda zruckgloatt. Sou is nou hejnt aufm Diahåppama Wåppn a Hirschkuah drauf.

Im Joo 955 is dia "Schlåcht auf'm Leechföjd" gween und do hom hoid oo vüü Oanzlgfechta ejschtlich vom Leech zwischn Diahåppn und Mering stattgfuuna. Do gibt's oo nou a poor Rejschtlan va dia Wållouloong auf'm Ejslsberg, dia zua a gaunzn Kejn va "Ungarnwoia" ghearn.

S'Benediktinakloaschta z'Diahåppn is oans va dia öitaschtn in Bayern und hoot scha im Mittloita a ziemli wichtige Ruin in dera Gegnd gschpüüt. S'Kloaschta hoot dia niadare Grichtsbårkeit kriagg und da Ort Diahåppn s'Mårktrecht. Oiso hoot's z'Diahåppn scha domois Joor- und Viechmårkt geem. Im Joo 1830 hom's as Kloaschta in da Säkularisation privatisiat und s'Huiz außnrum is vastaatlicht worn. Da lejtschte Abt, da Schmid Edmund, hod na d'Kloaschtaküücha St. Peter und Paul kafft und da Gmoa va Diahåppn gschejnkt. 1983 hoot na dia Gmoa dia ibrign ehemålign Kloaschtagebaid kafft, dia wo bis dohii a Guat wårn und hoot's saniert.

Diahåppn hoot in seina långn Gschichtn scha vüü mitgmåcht. Im 10. Joohundat va dia Ungarn und im Dreißgjààrign Kriag hoot's gaunz schea woos ookriagg. Oo im 2. Wöjtkriag hobn's n'Ort schwààr trouffa.

Bis 1972 hoot Diahåppn zum Laundkreis Naiburg an da Doana gheart, is na aba bei da Kreisreform zum Laundkroas Augschburg dazuakejmma. Bis hejnt is Diahåppn dia oanzige Gmoa vom Landkroas, de wo rechts vom Leech ligg und wou ma oo boarisch rejdt. Da Rejscht vam Laundkreis rejdt schwàbisch.

Politik

Da Gmoarot hod 16 Mitglieder:

• CSU 6 Sitze
• SPD 4 Sitze
• Freie Wähler 4 Sitze
• Unabhängige Bürger 2 Sitze

(Stand: Kommunalwoi 2008)

Biagamoaschta is seit 1996 da Neher Franz vo da SPD.

Friahare Biagamoaschta (seit 1946)

• Edmund Hölzl (1946-1949)
• Xaver Brugger (1949-1969)
• Heinrich Schieder ( 1969-1978)
• Fritz Hölzl (1978-1996)
• Franz Neher (seit 1996)

Wåppn

Blasoniarung: Untam Schüddhapt mit dia boarischn Rautn in Blau da Rumpf va oana roatzungtn guiddign Hiaschkuah.

Kultua und Sengaswiadigkeitn

Musäen

• Hoamat- und Trachtnmusäum
• Kloschtamüümusäum, mit Moimüün, oam Hadanstampfwerk, oana Öjmüü und am Modej va oana Sejgmüü.

Bauwerka

• Kloaschta Diahåppn, a ehemåligs Benediktinakloaschta
• Kloaschtaküücha St. Peter und Paul
• Pfårrküücha St. Vitus Neikirchn

Fejschte und Feian

• "Fejschtwoucha Diahappn", Vuiksfejscht mit Fejschtzug mit Rejssa und Bloamawoong (um an 15. Auguscht)
• Leonhardiritt Höizarn
• Kunschthaundwerkahouf mit Gårtnfejscht in da Kloaschtaouloog va Diahappn
• Gårtnfejscht vom Musikvaraii (meischtns oa Woucha vorm Kunschthaundwerkahouf)
• Fischafejscht vom Fischavaraii im Kloaschtakuahstoi, mit vüü Fischspezialitätn (meischtns in da easchtn Novembawoucha)

Büddung

• Akademie fir Haundwerkafortbüddung
• Bayrisches Bauarchiv
• Pfårrgmoabiacharei St. Peter und Paul
• Grund- und Haptschui
• Jugendfreizeitstejttn
• Kindagårtn Naiküücha
• Kindagårtn St. Peter und Paul
• Schui fir Darf- und Landesentwicklung

Biacha iba Diahappn

• "Kleiner Kunstführer Nr. 829: Thierhaupten" von Hugo Schnell, Schnell & Steiner (1966)
• "Topographische Karten Bayern, Bl. 7431: Thierhaupten" Bayerisches Landesvermessungsamt (1988)
• "Mein Thierhaupten" Gedichte von Gerlinde Ortegel Rita Fischer, (1998)
• "Geschichte, Sanierung und heutige Nutzung des Klosters Thierhaupten. Dauerausstellung der Heimatpflege des Bezirks Schwaben. Katalog." vo Peter Fassl, Bezirk Schwaben (2000)
• "Thierhaupten. Ehemaliges Benediktinerkloster" von Karin Hösch, Gregor Peda (Illustr.), Kunstverlag Peda Gregor (2001)
• "St. Peter und Paul Thierhaupten, ehem. Benediktinerabteikirche, heute kath. Pfarrkirche" von Gertrud Roth-Bojadzhiev und Anton Brandl, Schnell & Steiner (2005)
• "Der oide Hos" vo Adalbert Mayr
• "Halbzeit" vo Adalbert Mayr (2005)

Im Netz

Commons: Diahåppn – Buidl, Videos und/oda Audiodatein

• Diahåppn: Woppmgschicht vom Haus vo da Bayrischn Geschicht

Städt und Gmoandn im Landkreis Augschburg

Adlsriad  | Allmannshofa  | Aystettn  | Biberbåch  | Bobingen  | Bonstettn  | Diahåppn  | Diedorf  | Dinkelscherm  | Ehingen  | Ellgau  | Emersacker  | Fischach  | Gablingen  | Gersthofa  | Gessertshausn  | Gråm  | Groaßaitingen  | Heretsriad  | Hiltenfingen  | Horgau  | Kenigsbrunn  | Kloaaitingen  | Klosterlechfeld  | Kühlenthal  | Kutzenhausn  | Langenneufnach  | Langerringen  | Langweid am Lech  | Meitinga  | Mickhausn  | Mittelneufnach  | Neisäß  | Nordendorf  | Obaottmarshausn  | Oidnmünsta  | Sådtberng  | Scherstettn  | Schwabminga  | Untameitingen  | Ustersbåch  | Walkertshofa  | Wehringen  | Welden  | Westendorf  | Zusmarshausn