Die Sprache
| Der Artikl is im Dialekt fam südöstlichn Niedaöstareich gschrim worn. |
Die Sprache is a intanationale språchwissnschåftliche Zeitschrift, wås 1949 fa drei Indogeamanistn in Wean, und zwoa fam Paul Kretschmer, fam Wilhelm Havers und fam Wilhelm Czermak, gründ't woan is. Heitzutåg is Die Sprache, wia sa si so g'heat, peer-reviewt, deis haaßt, daaß jeda eig'schickte Aufsåts fa mindastns zwa faschiedane Leit kontrolliat wiad, ob a eh in Uadnung is. Die Sprache bringt jednfois Beiträg üwa historische und fagleichende Språchwissnschåft, foa oim aus da Indogermanistik. Dabei geht's ned nua um fagleichende Grammatik und Etymologie, sondan aa um Quellenkunde, Epigraphik, språchwissnschåftliche Textintapretatiaun oda aa um kultur- und geistesg'schichtliche Såchn.
Die Sprache eascheint im Falåg Harrassowitz in Wiasbån; noamalaweis gibt's zwa Heifta im Jåhr (genauer: pro Jåhrgaung). Da Herausgeiwa is momentan da Heiner Eichner (ea måcht deis im Auftråg fa da Weana Språchg'saöischåft), und seine Mitherausgeiwa san fümf Leit: da Hans Christian Luschützky, da Robert Nedoma, daun da Oskar E. Pfeiffer und da Chlodwig H. Werba (dei fiare san fa da Uni in Wean), dazua da Klaus T. Schmidt (fa da Uni in Saarbrückn).
