Eduardo Galeano

Aus Wikipedia

Da Eduardo Hughes Galeano (* am 3. Septemba 1940 in Montevideo, Uruguay) is a Schoanalist, Essayist und Schriftstölla. Seine Schriftn zaang a Mischung vu mearare Litaratua-Gåttungen und san schãu in vüü ãndare Språchn üwasetzd woan. Ea söiwa weahd si dageng, dass ma eam an Historika nennd, ea schriebt åwa damid a an gschichtliche Såchn vu voa oim Lateinamerika erinnan kãu.

Ea güüt åis ana vu de Vafechta vu da Dependenztheorie auf da litararischn Seitn und zeichnt si duach a klåare, oafåche und gwitzde Språch aus.

[dro werkln] Sei Lem

Da Galeano kimmt aus ana vu Eiropa åbstãmmendn, katholischn Familie aus da Mittlklass. Sei Traum åis Kind, dass a a Fuaßbålla wiad, is in mãnche Schriftn außazumlesn. Mid 14 håd a a easte politische Karikatua an'd El Sol vakauft, d'Zeidung vu da uruguayischn sozialistischn Paatei.

Mid 20 is a bei da MARCHA, ana Zeidschrift fia Kuitua und Politik, bei dea aa da Mario Vargas Llosa und ãndare bekãnnte Leid schãu midgschrim hãm, da stövatretnde Schefredaktea woan; späda håd a si aa bei ãndare linkspolitische Bladln eibråcht.

Sei wichtigsts Weak is in seina eastn Fåssung 1971 außakemma: Las venas abiertas de América Latina (haaßt „de offenen Adan vu Lateinamerika“) setzt si mid da Gschicht vu dem Kontinent ausanãnda und zaagt voa oim de kolonialheaschåftlichn Struktuan in neicha und åida Foam auf. Des Weak wiad in da linksgrichtetn Populäakuitua gean zitiad (wia vu da argentinischn Ska-Band Los Fabulosos Cadillacs) oda eawähnd (wia vu da mexikanischn Punk-Band Tijuana No!).

1973 håd si in Uruguay s'Militäa zua Måcht putschd, drum is a im 76a-Joa nåch Spanien in's Exüü gãnga, wo a bis zum End vu da Militäadiktatua vu Uruguay blim is. Üwa de Zeid und s'System vu dea Epochn håd a si gäißat, dass Leid eigspead woan san, damid de Preise frei sei håm kinan. Seid 1985 lebt a wieda in da Hauptståd vu seim Hoamadlãnd. Wia da Tabaré Vázquez 2004 nåch seim Sieg bei ana Wåih åis easta Linka d'Måcht in Uruguay üwanumma håd, håd si da Galeano glei hinta eam gstöd und des mid am Beitråg fia s'Bladl The Progressive klåa gstöd. Ea untastützd außadem d'Unåbhängigkeitsbewegung vu Puerto Rico.

2007 håd a sein Lungenkrebs eafoigreich oparian låssn.

[dro werkln] Auswåih vu seine Weake

• Die offenen Adern Lateinamerikas. Peter Hammer Verlag, Minga ISBN 3-87294-162-3
• Der Ball ist rund. Unionsverlag, Züri, ISBN 3-293-20161-X
• Die Füße nach oben. Peter Hammer Verlag, Minga ISBN 3-87294-842-3
• Geburten. Erinnerung an das Feuer 1. Peter Hammer Verlag, Wuppatåi 1983.
• Die Zeit die spricht. Peter Hammer Verlag, Wuppatåi 2005.

[dro werkln] Weblinks

• Literatur vo und üwa Eduardo Galeano bei DNB und Bibliotheksverbünden: DNB; BVB (nur vo)