Eiserner Vorhang
Da sogenonnte Eiserne Vorhang wor a Grenzn de sich durch gonz Europa zwischn da sowjetischn Zone (Sowjetunion / Warschauer Pakt) und em westlichn Toal vu Europa durchzogn hod (NATO / Europäische Union). In Deutschland wor des sogor nid lei a oafoche Grenzn, sondan a Maua de Ostdeutschland (DDR) strikt vu Westdeutschland (BRD) trennt hod. Zu dea Teilung is es eigntlich scho währnd des Zwoatn Weltkriags (Zweiter Weltkrieg) kemman, wo sich do scho obzeichnt hod, wia und vu wem Deitschlond und de Stootn de Hitler davua bsetzt kopt hod, bsetzt und kontrolliert wean wuatn. Durch de Teilung durch en Kriag is also da sogenonnte Ostblock entstondn und bemerknswert is, dass Churchill, des gonze um den Kaltn Kriag (Kalter Krieg) scho 4 Tog noch Ende des Zwoatn Weltkriegs, am 12. Mai 1945, vorausgsechn hod, wia nua unschwea in sei Rede vom "Iron Curtain = Eiserner Vorhang" z akennen is, übrigens hod de Rede den Begriff "Eiserner Vorhang" stork geprägt. Obwohl Österreich, wenns die Besotzungszonen noch gongen wa a teilt wean hatt miassn, is es in Österreich nid dazua kemman, weil sich da österreichische Stoot dazua bereitakläat hod a neutrale Holtung (Neutralität) in dem Konflikt onznemman. Des hod schlussendlich dazua gfiat dass die Besotzer scho 1955 wieda obzogn san und nuamea die Ostgrenze Österreichs (an die Tschechoslowakei, Ungarn, und Jugoslawien) dicht woa stott a inneröstarreichische Grenzn. In Deutschland is die Teilung in 2 Stootn am 7. Oktober 1949 beschlossn wuan (DDR - BRD). Die long onholtende Ormut im Osten hod dazua gfiat, dass sich viele DDR-Bürga dazua entschlossen hobn in die BRD zu flian (Westflucht) wesholb ma knopp 12 Joa spata, am 13. August 1961, ugfongan hod a Mauer z baun, de olle Stootn des Warschauer Paktes umschliaßt sodass neamnd illegal mea eini oda aussi ku. Die Wiedavaeinigung vu West und Ostdeutschland is mit dem Fall der Mauer am 9. November 1989 kemmn und damit wor a da Kolte Kriag eigntlich wieda vorbei und a die Grenzübawochung zwischn ondare West- Ost- Grenzstootn hod sich donn noch dem Zsommenbruch da Sowjetunion unta Michail Gorbatschov stork glockat.
