Enotna Lista
| Der Artikl is im Dialekt Owaöstareichisch gschrim worn. |
D'Enotna Lista (haaßt „Einheitslistn“, Åbküazung: EL) is, so ia Söibstbeschreiwung, d'Einheitspartei vu de Käantna Slowenen. Seit 2003 is da Voasitznde vu da EL da Vladimir Smrtnik. D'EL is 1991 aus'm Klub vu de slowenischn Gemeinderäte entstãndn, dea wieda 1973 entstãndn is, wia si vaschiedene slowenische Gemeinderåtsfrakzionen zsãmmgschlossn håm. Seit 1950 schãu kandidian slowenische Listn rögimäßig auf da Gemeindeebne. Aa deitschspråchige Ned-Slowenen kinan bei da EL Mitgliad sei und midåawatn. Da Sitz vu da EL, de in 24 Gemeindeoaganisazionen untateud is, is in Klångfuat.
Da Ãnteu vu Käantna Slowenen ãn da Käantna Bevöikarung reicht ned fia a Grundmandat, des ma zum Einzug in'dn Lãndtåg brauchd. Im zwoaspråching Gebiet is d'EL åwa in vüi Gemeinderäte vatretn, momentan stöid's 47 Gemeinderåtsmidgliada. In mãnche Gemeindn gibt's eigene Listn, de åwa unta da EL vaeint san. In Globasnitz und in Zöi stöid d'EL in Vizebuagamoasta und in Bleiberg an Stådtråt. Duach Kooparazionen mid de Grean und mi'm LIF woa d'EL vu 1986 bis 1999 im Nazionalråt vatretn; 2008 bei da Wåih hãm's s'LIF untastützd, bei dem da Voiksgruppmvatreta Rudolf Vouk da Käantna Spitznkandidat woa, s'LIF håd's åwa ned in's Parlament gschåfft.
2009 håd d'EL zum eastn Måi a Büagamoastawåih gwuna: In Båd Eisnkåppi håd da Josef Smrtnik vu da EL d'Stichwåih geng an SPÖ-Kandidatn mid 50,4 % fia si entscheidn kina. Da Smrtnik is damid da easte Büagamoasta in da Nåchkriagszeid, dea vu ana slowenischn Listn gstöid wiad.
D'EL åawat eng mid de Südkärntna Bauan (Skupnost južnokoroških kmetov) zsãmm, de bei da Lãndwiatschåftskãmmerwåih 2006 7,4 % vu de Stimmen gschåfft håd und so zwoa Mandate kriagt håd.
Seid 2006 is d'Enotna Lista a Voimitgliad vu da Eiropäischn Frein Allianz.
