Feiawehr
Aus Wikipedia
 |
Der Artikl is im Dialekt Obaboarisch gschriem worn. | |
De Feiawehr is a Huifsorganisation, de de Afgob hod, bei Brändn, Unfäin, Ibaschwemmungen und andan Katastrophn Huif z'leistn; d.h. Menschn, Viecha und Sochn z'rettn, z'schitzn und z'bergn. Haptafgob is oba s'Rettn.
Wei in de letztn Joahzehntn de Zoih vo de Bränd stoak zruckganga is, ibanimmt de Feiawehr imma stäaka Afgobm, de iba s'traditionelle Brandleschn aussegenga.
Damid de Feiawehr schnej kimmt, gibts Notruafnumman: 112 in Deitschland , 122 in Östareich, 115 in Sidtirol.
Inhoitsvazeichnis |
[dro werkln] Berufsfeiawehr
Es gibt in Bayern siem Berufsfeiawehrn (BF): in Augschbuach, in Fürth, in Inglstod, in Minga, in Niamberg, in Rengschbuach und in Würzburg. Berufsfeiawehrla sei hoasd, dass ma, im Gegnsatz zua Freiwillign Feiawehr, fia sein Dienst zoid werd und Beamter is. Nadiale hod jeda Berufsfeiawehrla a spezielle Ausbildung und muas seine Aufgam voi und ganz beherrschn. A Berufsfeiawehr hod a bestimmtes Einsatzgebiet und muas bei greißere Unglücke mit ausrucka.
In Österreich gibts sechs Berufsfeiawehrn: in Graz, Innsbruck, Klagenfurt, Linz, Salzburg, Wean.
[dro werkln] Freiwillige Feiawehr
De meistn Feiawehrn san de Freiwillign Feiawehrn (FF/FFW). In d'Freiwillige Feiawehrn ko eigentlich jeda iitredn, der bei Hochwossa, Vakehrsunfälle oda Brände ned nua zuaschaung wui, sondern ganz vorn mit dabei sei und mithejfa mechad.
Duach reglmassigs Üm is de Einsatzbereitschaft jedazeit gewährleistet. As Können vo da aktiven Mannschaft werd in da Regl alle zwoa Joa durch Leistungsprüfugen prüft.
[dro werkln] Pflichtfeiawehr
Wenn in oana Gmoa zweng Freiwillige zamkemma, dann muass da Bugamoasta a Pflichtfeiawehr (PF) ausruafa. Do miassn dann alle Leid vo 18 bis 60 mitmocha. Greglt is des in Baiern im Bayrischn Feiawehrgsetz.
[dro werkln] Jugendfeiawehr
Damit aba da Fortbestand vo a Freiwillign Feiawehr gsichert is, hod ma de Jugendfeiawehr (JF) eigfiaht. Durch vaschiedene Werbeaktionen ko ma Jugendliche fiad FFW gwinna. In da Jugendfeiawehr wern de Jugendlichn (meistens vo zwäif bis 18) vom Jugendwart, mit dem Zui, eanare Mitmenschn in Notlagng hejfa zu kenna, ausbuidt. Durch de reglmassign Ausbuidunga und Übunga sans optimal drauf voabereitet.
Rund 7500 Jugendliche in ungefähr 660 Jugendgruppm vo de Freiwillign Feiawehrn in Bayern wern do auf a sinnvolle Aufgab mit Perspektivn vorbereitet. De Jugendlichen san in a Gemoaschaft eibundn, in dea Teamgeist, Kamaradschaft und Verantwortungsbewusstsei gfrogt san.
In Östareich gibts de Feiawehrjugend. Im Gegensotz zua deitschen Jugendfeiawehr is d'Feiawehrjugend(-gruppe) ka eigena Organisation, sondan a Tei/Gruppn vo da Feiawehr. Bis vor a poar Johr hot ma erst ob zwäif zua Feiawehrjugend geh kina, iatzt is ma vo zehn bis 15 (in maunchn Bundeslända 16) dabei und tritt daun zu de Aktivn iwa.
Damit dann no a weng a mehr Schwung ins Jugendfeiawehrlebm kimmt, ko ma an vaschiedene Wettkämpf, gloane Wissenstests und Leistungsprüfungen midmocha.
