Franz Jägerstätter

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
Franz Jägerstätter, 1907 - 1943

Da Jagaschdeda Fraunz, geboan ois Huber Fraunz am 20. Mai 1907 in Sankt Radegund, Beziak Braunau; gschdoam am 9. August 1943 in Brandenburg an der Havel, Daidschlaund, woa a iifiadla Baua und Kriagsdeanstfawaigara im zwoatn Wødgriag. Ea is weng Zersetzung der Wehrkraft zum Dod fauadaid woan und im Gfengnis hiigricht woan. Sai Lemsgschicht hod in Esdaraich in de 70ga und 80ga Joa a hefdige Diskusion iwa d Zaid zum Nazionalsozialismus ausglest, mitlawai is a owa sogoa fu da katolischn Kiach søligschbrocha woan (26. Oktoba 2007).

Sai Lem[VE | Weakln]

Jugend und Familie[VE | Weakln]

Da Jagaschdeda Fraunz is am 20. Mai 1907 ois ledigs Kind fu da Dean Rosalia Huawa (Huber) und fum Fraunz Bochmoa (Bachmeier) in Sankt Radegund, des is im Îfiadl im Beziak Braunau, gauns an da Grenz zu Nidabaian, geboan woan. Ea hod a am Aufaung in Naum fu saina Muata griagt und hod desweng Franz Huber ghoassn. Saine Ötan woan z oam zan hairatn und desweng is da Fraunz a bai saina Grosmuata, da Elisabeth Huber, aufgwogsn. Sai laiblicha Fota is im Easchdn Wødkriag gschdoam und im Joa 1917 hod sai Muata daun in Jägerstätter Heinrich ghairat, dea a Baua woa und in kloan Fraunz adopdiad hod. Fia s Lesn hod si da Fraunz zum intressian augfaungd duach sain Schdif-Grosfota, in Matthäus Jägerstätter († 1930), dea recht fü Biacha ghobt hod.

Im Suma 1927 hod a auf am Bauanhof in Teising goawat und danoch bis 1930 ois Beagmau in Aisneaz. Wia sai Schdif-Fota am 8. Mai 1933 one aigne Kinda gschdoam is, hod da Fraunz in Bauanhof geabt. Am 9. Abrü 1936, an am Greeandonasdog, hod a d Franziska Schwaninger ghairat. De zwoa woitn koa Hochzaidsfaia hom und san schdod dem auf Bügafoat (Pilgerfahrt) noch Rom gfoan. D Franziska und da Fraunz haum schbeda drai Dechda griagt, d Maria, d Aloisia und d Rosalia.

Ois junga Mau woa da Jagaschdeda Fraunz a weng a Wüda und hod zum Baischbü ois olaeaschda in saim Oat a Motoara'l ghobt. Ungefea fu da Zaid wo a ghairat hod, hod a si owa fü mid da Religion bscheftigt und fü driwa glesn.

Widaschdaund gengan Nazionalsozialismus[VE | Weakln]

Da Jagaschdeda Fraunz is schau boid zu da Iwazaigung kema, das da Nazionalsozialismus ned mid saina Foaschdölung fum Kristndum zaum basst. Ea woa a da oanzige in saim Oat dea baim Aunschlus 1938 in da Obschdimung dageng gschdimd hod und a ofn im Doaf geng de Nazi gret hod. D Woikomission hod de oanzige Na-Schdim untaschlong und fia Sankt Radegung 100%-Zuaschdimung gmöt. Da Jagaschdeda Fraunz woa owa nia bai iagend oana politischn Grupn dabai und is sogoa kuaz amoi zu ana milidearischn Übung aizong woan.

Wai a mid de Nazi nix am Huad hom woit, hod a si ausn Doaflem ima mea zruk zong, hod Faginstigungen fu da NSDAP ned in Aunschbruch gnuma und hod a nix fia d Boatai gschbent, obwoi a sunst recht groszigig woa. Im Joa 1940 san 10 Bewona fu saim Doaf in am Briaf ois Gegna fum Nazionalsozialismus denunziad woan, unta aundam woa a da Jagaschdeda Fraunz auf deara Listn. Da Biagamoasda hod owa den Briaf ned waida glait.

Kriagsdinstfawaigarung[VE | Weakln]

Noch mearare Aufschib, is da Jagaschdeda Fraunz im Februa 1940 im Oita fu 33 Joa daun doch zum Milidea aizong woan. Wai owa da Biagamoasda fia eam intaveniad hod, is a noch a boa Dag wida auf sain Hof zruk kema. Im Oktoba 1940 is a nu amoi aizong woan, desmoi zua Grundausbüdung noch Enns.