Fritz Dinkhauser

Aus Wikipedia
Wexln zua: Navigation, Suach
Da Dinkhauser Fritz

Da Dinkhauser Fritz (* 16. April 1940 in Innschbrugg) isch a eschdraichischa Bolitikha. Im foln Naum hoasch a Friedrich Josef Lienhard Dinkhauser.

Er isch in Inschbrugg, im Schdottail Wilten afgwogsn. Er hod drai Schweschdrn, oa eltane und zwoa jingane und sai Fotar hot ols Laundesschdelnlaitr baim Rodn Kraiz gorwat und sai Muatr woa Hausfrau. Schul gaungen isch a zersch in d'Hauptschul und nochan daun in d'Obndn-Haundlsakhademi. Ea wolt zersch Schbortla wern und hot Laichtatletikh gmoch, dabai isch a seks Mol Tiarola Maischtr im Haummawerfn worn. In de 60ga Joar hot a daun zum Bobforn gwegslt und isch 1968 im Zwoara- und im Fiarabob bai de Olimpischn Schbil fu Grenoble mitgforn. 1969 wor a a bai da Juniorn-WM in Cortina dabai. Danoch hot a si owa bai am Schdurz schwa falezt und wor sogoar a Zaitl glemt.

Schon in deara Zaid ols Schbortla hot a si bolitisch aungaschiart und isch said 1964 Laundesgscheftsfiara fu da Jungen Generation Tirol gwen, de wo said 1970 Junge ÖVP hoasch. 1971 isch a daun Laundessekretea fum Tiarola AAB worn. Schaun sain Onkhl und Daufpat, da Josef Dinkhauser, wor in Tirol a bekhaunta Bolitikha, dea bai da Wirtschoftskaumma wor und fiar de Volkhsbortai im Nazionalrot gsessn isch und der hot iam in saina Jugend a bolitisch gepreght. In Fritz sai Karriere wor in de 70ga Joar recht erfolgraich, glaichzaitig hot a obr imr weniga Zaid ghob fiar sai Familie und a so isch khemen, das si sai erschde Frau, d'Sigrun, mid der a drai Khinda hod, schaidn lossn hot. Schbetr hot a nu amol ghairat, sai jezige Frau d'Heidi, mid der a a nu amol zwoa Khindr hot. Aso hot a haid a recht zaumgschuasdarte Patchwork-Familie, a Soch wos bai Bolitika aus da ÖVP in Tiarol olwai nu a weng ebs ungwenlichs isch.

Said 1979 wor a Khaummrrod in da tiarola Orbaitrkhaumma, isch dort 1985 Vizepresident worn und 1991 President. Danem wor a fu 1984 bis 1993 a nu Obmaunn fu da Tiarola Gebietskraukhnkhassa. Ols AK-President isch a sowol Obmaunn fum Tiarola Bscheftigungsfarain gwesn, ols a Forschdaundsmitglied fum Konsumentnschutz. 1993 isch a Vizepresident fu da Orbaitrkhaumma esschdraichwaid worn und 1994 Frakhzionsforsizendr fum ÖAAB, olso im Orbraitr- und Aungschdeltnbund fu dar ÖVP.

In Tiarol, wo'd ÖVP d'lengschde Zaid in obsolutr Mearhaid regiart hot, sain de bolitischn Khembf oft wenigr zwischn de faschidanen Boartain, ols wiar zwischn de faschidanen Fligl fu da Volksboartai ausdrogn worn. Da Fritz Dinkhauser wor dabai immr auf da Saitn fum ÖAAB und gengan Ainflus fum Bauanbund, dea in Tiarol tradizionel recht schdorkh isch, obwols gor neamr so fil Bauan gib. Er hot dabai immr eha de chrischtlich-sozialn Posizionen fadretn und wor gegn a wirtschoftsliberale Bolitikh, de mer auf de groasn Firmen schaug und weniga auf denan ianare Aungschdeltn und Orbaitr. Z'letsch wor a fu 2005 bis 2008 a Forschdaundsforsizenda fum eschdraichischn Haupferbaund fu de Sozialfarsicharungstrega.

Bürgerforum Tirol[VE | Weakln]

Im Laundtogswolkhompf 2008 hot a endgültig mid da ÖVP brochn und isch mid oana aiganen Boartai gengan aumtiarendn Laundeshaupmaunn, in Herwig Van Staa, auntretn. De Boartai hot Liste Fritz Dinkhauser - Bürgerforum Tirol ghoassn und isch im Juni 2008 gauns iwaroschend mid 18,35% zwoatschderksde Boartai worn und isch said dem mit 7 Mandatn im Laundtog fadretn. Obwol im Wolkhaumbf efda behaup worn isch, das des Bürgerforum Tirol blos da Staigbüglholtr fia de ÖVP isch, hot de Volksboartai noch da Wol a Koalizion mid da SPÖ gmoch und d'Lischdn fum Dinkhauser isch said dem in Opposizion. Naicha Laundeshaupmaunn isch da Günther Platter.

Nazionalrodswol 2008[VE | Weakln]

Am 8. Juli 2008 hot da Fritz Dinkhauser bekaunt gem, das sai Lischdn a bai de forzoganen Nazionalrodswoln kandidirn wird. Drai Wochn schbetr hot a gsog, das de sel untam Naum Bürgerliste Österreich, nit nur in Tiarol, sondern im gaunzn Laund kandidirn wird, dazua hot a owa in am jedn Bundeslaund zeasch Untaschdüzungsuntaschriftn brauch, insgesaumt 2.600, de a Aunfaung September a ole bainaund ghob hot. Bai da Wol am 28dn Septembr 2008 haubm obr blos 78.119 Laid d'Lischdn Fritz gwelt, wos eschdaraichwaid 1,8% gweschn isch. Damid hots de 4% ned zaumkchriak, de ma mindeschdns brauch damid mar ins Parlament kimp und a s'Grundmandat in Tirol, wos mid 31.311 Schdiman 8,7% kchriak hot, is si nit ausdagaungen.

Im Netz[VE | Weakln]

Spruch: Fritz Dinkhauser – Zitat af Boarisch