Glaum in da Stod Soizburg
| Der Artikl is im Dialekt Stod-Soizburgarisch gschriem worn. |
De bei Weitn wichtigane Religion in da Stod Soizburg is s'Gristndum. Soizburg is prägt vo da katholischn Kirchn ois wia ka ondane östareichische Londeshaupstod ned. Des is desweng a so, weis in Soizburg bis am Âfong vom 19. Joarhundat, oiso bis zum End vom Soizburga Fürsterzbistum, ka Trennung gem hod zwischn da Kirchn und im Stoot, wei jo de Erzbischef gleichzeitig geistlichs Owahaupt und Stoodsowahaupt gwen san. Des hod dazua gfihrt, dass zum Beispüi de Evangelischn, d'Judn und de Wiedataifa oiwei a recht a Gfrett mid da Owrigkeit ghobt hom. Bsondas de Protestantnvadreiwung wor do a krasses Beispüi. Bis heid dominiern a Haufn Kirchdirm s'Stodbüid, desweng hod ma Soizburg friara a oft s'"neadliche Rom" oda a s'"Deitsche Rom" gnennd.
Longsom im 18. und donn a weng mehr im 19. Joarhundat hods oiso eascht zum easchtn Moi Möglichkeitn fir ondane Glaumsgemeinschoftn ois wia de Katholikn gem, dasss a weng auflem kinna hom. In da zweitn Höiftn vom 20. Joarhundat, vor oim durch Kriag, durch Vadreiwung und Eiwondarung, iss donn dazua kemma, dasss heidzudog mehr vaschiedene Glaumsrichtunga gibt in Soizburg.
De Katholikn san mid 56 Prozent vo de Stodbewohna oiwei nu de gressane Glaumsgruppn in Soizburg. Organisierd san de Katholikn in da Stod in drei Dekanate und 24 Pforrn, wobei ma song kau, dasss so uma in jem Stodeu a Pforr gibt. Zur evangelischn Kirchn (Augschburga und Helvetisches Bekenntnis zsommgrechnt) ghern uma siem Prozent vo de Stodinga. De Evangelischn homd drei Pforrn in da Stod, und zwar mid de Kirchn in da Neistod (Gristuskirchn), in Taxhom und in Gneis. Fünf Prozent vo de Leid san orthodoxe Gristn (russisch-, rumänisch- und serbisch-orthodoxe Kirchn); fir d'Orthodoxn gibts a Pforr, wo de Kirchn (Maria Schutz) in Müin stehd.
Zu de ondan gristlichn Glaumgemeinschoftn ghern ois zsomm weniga ois wia zwa Prozent vo de Stodinga; des warn zum Beispüi d'Oidkatholikn, de Methodistn, d'Neiapostolische Kirchn, de Mormonen (vo da Kirchn vom Jesus Gristus vo de Heuling vo de Letztn Dog), de Zeing vom Jehova, da Bund vo de evangelikaln Gemeindn und d'Freie Gristngemeinschoft. D'katholische Kirchn hod zsomm mid de orthodoxn Kirchn, da evangelischn Kirchn, da oidkatholischn Kirchn und de Methodistn so ökumenische Orwatskroas; öftas feians a amoi an Gottesdienst midanond.
Siem Prozent vo de Leid in Soizburg sand Muslime, da Islam is damid de gresste Glaumsgemeinschoft außahoib vom Gristndum. Zu de ondan Glaumsgemeinschoftn - Judn, Buddhistn, Bahai und Sikhs und so weida - ghern weniga ois wia a Prozent. Judn gibts heid üwahaupt nur mehr a bissl mehr ois wia 100, owa de feian eanan Gottesdienst nu oiwei in da Synagong in da Neistod.
De Muslime hom so um de zehn Gebedsräume in da Stod, de meistn davo sand in Schoimoos und Gnigü. A so genonnta Gurdwara vo de Sikhs is a in Schoimoos. In da Linza Gossn und in Lehn gibt's zwa buddhistische Zentren. In Lehn is a a Tempüraum (Mandir) vo de Hindus.
17 Prozent vo de Soizburga hom gor ka Religion, bei siem Prozent waß ma ned, wos de fir Glaumsbekenntnis hom.