Heide Schmidt

Der Artikl is im Dialekt Owaöstareichisch gschrim worn.

D'Heide Schmidt (2008 in Wean)

D'Heide Schmidt, auf'd Wöid kemma åis Heide Kollmann am * 27. Nowemba 1948 in Kemptn im Allgäu, is a östarreichische Politikarin (vu da FPÖ und späda vum LIF) und Juaristin.

Heakunft und Ausbüidung

Nåchdem si iare Öitan scheidn låssn håm is's im 1950a-Joa mid iara Muata und iara Schwesta vu Kemptn nåch Wean üwasiedlt. Nåch da Matura im 66a-Joa håd's an da Uni Wean Rechtswissnschåftn studiad und duat ian Dokta gmåcht. Nåchdem aa si si scheidn håd låssn, håd si si in Nãm vu iam Ex-Mãu ghåidn. Bis '88 håd's åis Ghüifin in da Voiksãnwåitschåft z'Wean gåawad und si woa in dea Zeid beim ORF in ana Beråtungssendung tätig. Ungefäa zu dea Zeid aa håd's a Sozial- und Wiatschåftswissnschåftsstudium gmåcht.

Politische Laufbãh

in da FPÖ

D'Heide Schmidt woa seid'm 73-Joa Mitglied vu da Freiheitlichn Partei. '88 is's duat Genaralsekretäarin woan und vu'm 90a-Joa bis '93 woa's d'Stöivatretarin vum Bundesparteiobmãu, dea zu dea Zeid da Haider Jörgl woa. 1992 is's außadem, auf Wunsch vu'm Haider, d'FPÖ-Kandidatin bei da Bundespräsidentnwåih gwesn und håd åis easte Frau in da Gschicht vu östareichische Bundespräsidentnwåihn a zwoastelligs Eagebnis zsãmmbråcht (16,4 %).

Vu 1987 bis '90 woa's a Mitgliad vu'm Bundesråt und vu '90 bis '99 vu'm Nazionalråt (vu'm 93-aJoa weg åwa schãu nimma fia'd FPÖ). Vu 1990 bis '94 woa's außadem de dritte Nazionalråtspräsidentin.

s'Liwarale Forum

Am 4. Februa 1993 håd si d'Schmidt mid iare Parteikolleng Friedhelm Frischenschlager, Klara Motter, Thomas Barmüller und ãndare vu da FPÖ losglöst. Des woa a Reakzion auf a vu'm Haider ãngstrengts Voiksbegehrn üwa'd Ausländapolitik, des da liwarale Flügi um'd Schmidt ned midtrång håd woin. Vu da FPÖ unta'm Haider hãm si si außadem in eanara EG-Politik, beim Mindaheitnschutz, bei da Ausländaintegrazion und im politischn Stil untaschiedn. De Gruppm um'd Schmidt håd desweng s'Liwarale Forum (Liberales Forum, LIF) gründet.

Vu 1993 bis 2000 woa d'Schmidt dãun d'Bundessprecharin vu'm LIF, des 1994 und 1995 bei de Nazionalråtswåihn in Einzug in'dn Nazionalråt jeweus gschåfft håd. In Wean, Niedaöstareich und in da Steiamoak håd's s'LIF jeweus in'dn Lãndtåg gschåfft. 1998 is d'Schmidt nu amåi bei da Bundespräsidentnwåih ãutretn, wo's desmåi 11,1 % gschåffd håd.

1999 is's LIF unta da Schmidt dãun åwa knåpp an da 4-Provenz-Hüadn gscheitad und desweng aus'm Nazionalråt gflong. Auf des auffi håd si d'Schmidt aus da Tågespolitik zruckzong, de danåå Voasitznde vu'm Institut fia a offene Gsöischåft (Institut für eine offene Gesellschaft) woan, ana parteiunåbhänging Privatstiftung, de duach a Iniziative vu da Schmidt entstãndn is.

Im Juli 2008 is d'Schmidt in'd Tågespolitik zruckkemma, indem's d'Spitznkandidatin vu'm LIF fia'd Nazionalråtswåih gmåcht håd. Am 23. Septemba håd's nåch'm Rücktritt vum Alexander Zach åis Bundessprecha des Ãmt intarimistisch üwanumma. Weu s'LIF bei da Wåih am 28. Septemba åwa netta 2,1 % gschåfft håd und desweng ned wieda in'dn Nazionalråt kemma is, håd s'Schmidt si am 30. Septemba endgüitig aus da Politik zruckzong.

Weblinks

• Literatur vo und iwa Heide Schmidt bei DNB und Bibliotheksverbünden: DNB; BVB (nur vo)
• Biografie, Kontaktangaben und Debattenbeiträge ab 1996 von Heide Schmidt im österreichischen Parlament
• Heide Schmidt Blog
• Institut für eine offene Gesellschaft

Commons: Heide Schmidt – Buidl, Videos und/oda Audiodatein

D Artike basiat auf ara frein Ibasetzung vom söim Artike in da Wikipedia auf Deitsch in da Version vom 25. Novemba 2008. A Listn mid de Autorn vo drentn konst da do aa oschaugn.