Hofgaschtoa

Der Artikl is im Dialekt Pongaurisch gschrim worn.

Hofgaschtoa Hofgoschtai
Baasisdaaten
Bundeslond:	Soizburg
Pólitischer Bezirk:	Saiger Hons/Pg. (JO)
Flächen:	103,73 km²
Kóordinaaten:	47° 10' N, 13° 6' O
Hejch:	859 m i. A.
Eihwóner:	6727 (15. Mai 2001)
Bevejkerrungsdichten:	65 Eihwóner pró km²
Póstloatzoi:	5630
Vurwoi:	06432
Gmoahkennziffer:	50 402
Gmoahvawoitung:	Kurpromenade 2 5630 Bad Hofgastein
Webseiten:	www.badhofgastein.at
Politik
Burgermoaster:	Benedikt Lang (SPÖ)
Gmoahrout: (2004)	13 SPÖ, 8 ÖVP, 1 FPÖ, 3 LBH
Loug vah da Gmoa Hofgaschtoa
Hofgaschtoa im Winter

Hofgaschtoa, im Ortsdialekt Hofgoschtai (Hochdaitsch: Bad Hofgastein) is a Morktgmoa im Pongau, im Soizburger Lond, in Esterraich, mid 6.727 Aiwoner und is a berimte Kur- und Wintersportgmoa.

Geografie

De Gmoa lig im Gaschtoanertoi im Pongau im Soizburger Lond.

Katastralgmoana

Katastralgmoana bzw. Ortstoae vo Hofgaschtoa sand:

• Onger (Anger)
• Hofgaschtoa (Hofgastein)
• Broatnberg (Breitenberg)
• Godaunern (Gadaunern)
• Horbouch (Harbach)
• Hoassingfäiding (Heißingfelding)
• Louderding (Laderding)
• Vurderschneeberg (Vorderschneeberg)
• Woanatsberg (Weinetsberg)
• Wiadn (Wieden)

Nouchbargmoana

Nouchbargmoana vo Hofgaschtoa sand:

• Boud Goschtoa
• Dorfgaschtoa
• Grossoul
• Rauris im Pinzgau

Gschicht

De Gschicht vo Hofgaschtoa raicht bis in d' Rämerzaid zrucke. Da Ort is douzmois as Zentrum vom Sijwer- und Goidbergbau gwen. Hofgaschtoa lig an da broatastn Stäi vom Toi, desweng is's aa zan Hauptort vom Gastoaner Toi woun. Dou houd se aa de erscht Pforn vom Toi und da Grichtssitz befundn. So houd da Ort de Bezoichnung „Hof in da Gaschtoa“ kriag, spader is doudraus „Hofgastoa“ woun.

Im Hochmittloiter is Hofgaschtoa as Zentrum vom Wornaustausch zwischn Italien und Esterraich bzw. Daitschlond gwen. Auf dem scho vo d' Rämer ausbauschtn Weg iwer d' Korntauern sand Sidfricht, Wai und onnerne Erzaigniss in säig Gebirgstoi kemma und geng Goid und Sijwer aitauscht woun. De Pfoukirch is 874 ois kloas Kirchai darichtt woun und houd's haidige Ausschaun im 15. Jouhunderscht kriag. As Morktrecht is im 13. Jouhunderscht valichn woun.

Da Vafoi vo d' Goidprais, Naturkataschtrofm, da Asubruch vo da Pest 1574 sowia d' sozioin und religiäsn Ausaranondersetzunga wärnd und nouch'm Droissgjaring Kriag houmd za am välling Niadergong vom Ort gfirt.

A zwoate Bliatn houd Hofgaschtoa ois Hailboud, nouch da Aufhewung vom Erzbiaschtum Soizburg und'm Oschluss an Esterraich daglong. 1820 is de Valaichung vom Thermalwosserbezuagsrecht aus de Quäin vo Gaschtoa durch'n Koaser Fronz I. dafoig. Said'm Jou 1830 werscht's Wosser in ner in etwoa ocht Kolometer longen Thermalwosserloatung aus Gaschtoa nouch Hofgaschtoa transportirscht. Said 1936 firt da Ort d' Bezaichung „Boud (Bad)“ im Ortsnoum.

Woppm

As Woppm vo da Gmoa is: „Im toaetn Schijdl om in Goid Hommer und Schläge in natirliche Foubm schräg iweranonder kroizt und unt in an sijwern Fäid a naturforwane häizerne Boudwonn.“

Politik

Birgermoaster is said 1999 da Hotelier Long Benedikt (Benedikt Lang). De Gmoavatretung houd 25 Midgliader, doudavo sand 13 SPÖ, 8 ÖVP, 1 FPÖ und 3 LBH (Liste Bad Hofgastein).

Religion

Adolph von Menzel: Fronloichnomsprozession in Hofgaschtoa

• Katholische Pfoukirch za Insare Liawn Fraun auf'm Grias.

De sognonnte Liawfraunkirch, a droischiffige Stoffekirch, is in d' Jou 1498 bis 1507 darichtt woun. Da spitz behäimte Turm stommt aus'm Jou 1602. 's prunkvoie Herzsticke vo da Kirch stäid da prächtige Barockoitou dou, der wous ois's herausrougandste Hauptwerk vom Moier Sepp-Andrä Aise (Josef Andrä Eisl) und vom Bijdhauer Medlhommer Paul (Paul Mödlhammer) gijt. 's Zentrum vom Hochoitou bijdt d' gotische Doustellung vo ner thronatn Madonna, as sogenonnte „Gnoudnbijd vo da Hofermuatter“ aus da Zaid um'ra 1500. De Konzl und d' Saitnoitär stomman aus da erschtn Häiftn vom 18. Jouhunderscht.

• Evangelische Hailskirch (dabaut 1960)

Wirtschouft & Infrastruktur

Hofgaschtoa is a internazional bekonnta Kur- und Wintersportort mid etwoa 145.000 Gäst pro Jou und Kur-, Kongress- und Vaostoitungsairichtungen sowia ner Fuassgängerzone mid Gschäftai, Hotäis, Kaffees und Restaurants. Danem gib's d' Oipm-Therme-Gastoa mi'm Oipm-Kurbark und da said Jouhunderschtn bekonntn Gaschtoaner Radon-Thermalkur.

D' Schigebiat im Gaschtoanertoi biatn 44 Soaebohna und Lift, sowia iwer 200 km Pistn bis auf 2.700 m Hächn.

Doudriwer ausse gib's 120 baierliche Betriawe mid 7.200 Hektar Aimflächn und 28. Aima.

Persänlichkaitn

• Gruawer Bernhard (*12. August 1982 Schwoschzach/Pg.), Schifourer (nordische Kombinazion).
• Hofer Fronz (*27. November 1902 Hofgaschtoa - 1975 Mülheim an der Ruhr) Gauloater vo Tiaroi.
• Grugger Hons (*13. Dezember 1981 Hofgaschtoa), Schirennlaifer.

Ortsnomen im Dialekt

Za Hofgaschtoa kost im lokaln Pongauer Dialekt aa no soung: Hofgoschtoa, Boud Hofgaschtoa, Boud Hofgoschtoa, Hofgastain oder Bod Hofgastain (iwerregional).

Weblinks

Schau aa unter: Portoi Pongau

Commons: Bad Hofgastein – Buidl, Videos und/oda Audiodatein

• Hoamsaitn vo da Gmoa (www.badhofgastein.at)

Stéd und Gmoaner an Pongau

Bihófen | Dorfgouschtoah | Ém | Fijzmóos | Flochau | Forschtau | Goschtoah | Góidégg | Gróssourl | Hyttau | Hyttschloug | Hófgoschtoah | Kloahourl | Mijbouch | Oidenmorkt | Pfourwerfen | Rodstoud | Seiger Hóns | Seiger Méscht | Seiger Veit | Schwouschzach | Untertauern | Werfen | Werfenweng | Wougroah