Johann Grueber

Aus Wikipedia
Wexln zua: Navigation, Suach
Der Artikl is im Dialekt Hausrukfiatlarisch gschrim worn.
A Büdl fu Tibet, wås da Athanasius Kircher nåch da Beschraibung fum Johann Grueber 1667 faöffentlicht håd

Da Johann Grueber (chin. 白乃心, Bái Nǎixīn; * 28sdn Oktoba 1623 in Linz; † 30sdn Septemba 1680 in Sárospatak, Ungarn) woa a Jesuitnpata, roasada Foascha und Missionar in Asien, dea nåchn Oderico fu Pordenone ois eascht zwoata Airopea iwahaupt in Tibet woa und ois easchda bis nåch Lhasa kema is.

Sâi Nãm[VE | Weakln]

In Johann Grueber sâi Nãm wiad oft untaschiadli gschrim. Dé Schraibwais då is de hisdoarische in da Owadaidschn Schraibschbråch, wo ma eam sain Nãm nu nåch da Dialektausschbråch gschrim håd. Dés "ue" schded nemli fia an Diphthong, oiso "Gruaba", und néd fia'n Umlaud "ü", wia mai nåch da heitingn hochdaidschn Schraibkonvenzion filaicht mõana kintad. Dailwais wiad sâi Foanãm in da Literadua a ois "Johannes" ãgém oda sâi Nåchnãm fanaichhochdaidscht ois "Gruber" gschrim.

Sâi Lém[VE | Weakln]

Jugend in Ésdaraich[VE | Weakln]

Iwa sâi Jugend is ned recht fü iwalifat, åwa is wiad oft schbekuliad ob a ned efangelisch dauft woa, wais zu deara Zaid a in Owaésdaraich fü Efangelische gém håd und mitn im 30jarign Griag, wos drunta und driwa gãnga is, wéng schriftlichs iwalifat is. Auf jédn Fåi is a im 1640ga oda 1641ga Joa zu de Jesuitn dazua gãnga und is z'Sãnkt Anna in Wean Noviz woan. Fu 1649 bis 1651 woas ma das a in Graz, Ödnbuag und in Léom Brofessa am doating Jesuitngimnasium woa, befoar a dãn in Graz ãgfãngt håd Teologi zan schdudian, womid a fia Joa schbéda feati woan is und 1655 in Graz sâi Primiz ghåbt håd.

Zu deara Zaid woan d'Jesuitn gråd recht fia d'Géngrefoamazion aktiv und hãm fasuacht, dass d'Laid wida zan katolischn Glaum bringan, wås eana zu mindest auf'n Båbia a glunga is, a wãns daném nu fü hõamliche Protestantn gém håd, dé neta a so dã hãm wia wãn. Daném hãm si d'Jesuitn a recht fü mid de naichn Wissnschåftn bscheftig und hãm eanare guad ausbütn Laid sowoi zan Missionian ois wia zan Foaschn z'waidigst in da Wöd umadum gschikt. Dés håd in Grueber Hãns intressiad und déswéng håd a drum ãgsuacht, das ea a in Osdn gschikt wiad, in de exotischn Lenda in Asien.

Roas nåch Kina[VE | Weakln]

Zu deara Zaid woa fu 1644 bis 1661 da Shunzhi Kaisa fu Kina

Aso is a am 18dn Februa 1656 gemainsãm mid'n émfåis aus Ésdaraich schdãmadn Bernhard Diestel ois Missionar nåch Kina losgschikt woan, mid'n Aufdråg an Wég iwa Lãnd zan suachn, auf dém ma am bésdn fu Airopa nåch Kina kema kã. Ea håd foahea nu mim Jesuitn Athanasius Kircher Kondakt aufgnuma, dea gråd an am Buach iwa Kina goawat håd und dea håd eam aufdrång, méglichst ois genau zan aufschraim und eam schbéda an Bericht zuakema z'låssn. De zwoa hãm si glai auf'n Wég gmåcht und han iwas Osmanische Raich bis nåch Peasien kema. Doat hãms åwa in Isfahan ghead, das in Zentralasien gråd a Griag im Gãng is und ma im Moment auf kõan Fåi doat hî soid und déswéng hãms eanan Plan aufgém miassn und san nåch Südn an'dn Peasischn Goif bis nåch Hormus. Dé Routn woa åwa in Airopa schã lengst bekãnt. Fu doat aus sans auf'n Seewég zeascht nåch Indien und nåch ana lãngen Roas 1658 im poatugisischn Macao ãkéma, wås dåmåis da wichdigste Schdizbunkt fu de Missionar in Ostasien woa.

Fu doat san de zwoa ésdaraichischn Jesuitn waida und am 2dn August 1659 in Péking ãkéma, wo schã a klõane Grupn fu Jesuitn am Hof fum Kaisa Shunzhi woan. Da Kaisa håd dåmåis a recht a guads Fahötnis mid de fremdn Missionar ghåbt und håd si recht fia de airopeischn Wissnschåftn intressiad. Da aus'n Rainlãnd schdãmade Jesuit Adam Schall fu Bell, mid dém si da Grueber Johann glai ãngfraint håd, woa sogoa Hofastronom fum kinesischn Kaisa und håd gråd an da Fabéssarung fum kinesischn Kalenda mid Hüfe fu modeana Astronomi goawat. In Peking is da Bernhard Diestel im 1660ga Joa gschdoam.

Fum Båbst aus Rom is zu deara Zaid Kritik an'dn Adam Schall fu Bell kema, mid dém Foawuaf, das a si z'fü fu da kinesischn Religion beainflussn låsst und mid saine Foaschungen schã an Åbaglaum praktiziad, dea neama ois grisdlich tolariaboa is. Auf dé Ãnschuidigungen woit si dea natiali fataidign und håd déswéng in Johann Grueber zruk nåch Airopa gschikt. Nåchdém åwa gråd zu deara Zaid de Holenda s'poatugisische Macao fum Wåssa aus belågat hãm, woa da Wég iwas Mea dawai blokiad und aso hãm da Pata Grueber und sâi naicha Beglaita, da belgische Jesuit Albert d'Orville, bschlossn das sés auf'n Lãndwég zruk nåch Indien fasuachn und aso glai de Routn quasi fu da ãndan Sait wia uaschbringli geplant béssa eafoaschn kinan.

Roas nåch Tibet[VE | Weakln]

Da Potala-Palåst in Lhasa, fu dém da Johann Grueber zan easchdn Måi a Beschraibung nåch Airopa bråcht håd

Aso sans fu Peking wéka und hãm fum Kaisa nu an Schuzbriaf und an kinesischn Beglaita midgriagt. Sé hãm si an faschidane Karawanen drãghengt, dé nåch Westn zong san und san so iwa Xian und Xining nåch Tibet glãngt, wos am 10dn Oktoba 1651 in da Hauptschdåd Lhasa ãkema san. Damid woans nåch iwa 300 Joa de easchdn Airopea de nåch Tibet kema san und de easchdn fu dénan gwis is dass in da hailign Hauptschdåd woan. Dafoa woa neta da Oderico fu Pordenone auf ana 12jarign Roas fu 1318 bis 1330 duach Asien iwahaupt schã amåi im tibetischn Hochlãnd, åwa fu dém woas ma ned gwis, ob a bis nåch Lhasa kema is.

Duach eanan Schuzbriaf fum kinesischn Kaisa is de zwoa Jesuitn ealaubt woan, dass a Monad lãng doat blaim deafn. Da Johann Grueber håd doat an Haufn Zaichnungen gmåcht, fu da Schdåd und de Laid dé doat woan, fu tibetische und tatarische Fiaschdn und eanane Waiwalaid, fum Potala-Palåst und fum dåmålign Dalai Lama. Wais åwa kõane Budistn woan, hãms dén nia söwa gseng, sondan ea håd dés blos fu am öffentlichn Büdl åzaichnet. Ãndane Gwön sång, das sé såwa ois Katolikn in Dalai Lama néd aufsuachn woitn, wais néd bai ana haidnischn Zeremoni dabai sai woitn. Sé san åwa fum Vizekini Jaisan sDe-pa fraindli empfãnga woan, fu dém a a a Poatre zaichnet håd und da Pata Grueber håd mid Hüf fu da Astronomi de Låg fu Lahasa mid 29° 6' nöadlicha Breadn bschdimt, wås relativ genau hîkimt.[1] Aso is da easchde detailiade Bericht iwa dés Lãnd im Himalaya z'Schdãnd kema, dea a 200 Joa lãng de õanzige im Westn bekãnte Infoamazionsgwön iwa Tibet woa.

Zruk in Indien[VE | Weakln]

S'Tadsch Mahal in Agra, wo da Grueber Johann a Joa blim is

Am 8dn Nofemba hãm de zwoa Lhasa wida falåssn und sain waida iwa'n Himalaya Richdung Indien. Dabai san zeascht nåch Kathmandu in Nepal und dãn åwi ins Flåchlãnd fum Ganges bis nåch Patna. Am 31sdn Meaz 1662 sans dãn in Agra, de ehemålign Hauptschdåd fum Mogulraich, ãkema. Dea Wég fu Lhasa iwa'n Himalaya nåch Agra håd 214 Dåg dauat und doatn is dãn da Albert d'Orville foa lauta Iwaãnschdrengung gach gschdoam. Auf dés aufi is da Pata Grueber a Joa lãng in Indien blim und håd bai am Aufenthåit in Surat, nöadlich fu Bombay in Tirola Jesuitnpata Martino Martini droffn, dea ois Kartograf in Indien untawégs woa und dea eam wichdige Infoamazionen iwa an möglichn Lãndwég zruk nåch Airopa gém håd. Danåch håd a si mim Heinrich Roth zãmdã, an Jesuitnpata aus Schwåm dea in Indien s'Sanskrit schdudiad håd, und gemainsãm san dé zwoa dãn auf'n Lãndwég iwa Peasien und s'Osmanische Raich hõam zua.

Zruk in Airopa[VE | Weakln]

Am 20sdn Februa 1664 hans zruk nåch Rom kema. Doat hãm de zwoa a easchde Zusãmenfåssung fu eanare Ealébnis aufgschrim und in Athanasius Kircher zuakema låssn, dé dea 1667 in saim berümtn Buach China illustrata faöffentlicht håd. De zwoa woitn nåch drai Monad in Rom glai wida zruk Richdung Asien und hãm si offensichtli mid Billigung fu da Oadnslaitung amåi nåch Wean aufgmåcht zum habsbuagischn Kaisa Leopold I. aufgmåcht, dea de Patronanz fia a naiche Roas iwanema soin hed. Fu Wean sans waida iwan Balkan bis nåch Konstantinopl, wo si åwa aussa gschdöd håd, das de naiche Expedizion kompliziad wean kant. In da Zwischnzaid håd nemli de Kund fu eanara Roas in Airopa de Runde gmåcht und da poatugisische Kini Alfonso VI. håd si im Juli 1664 baim Genaral fum Jesuitnoadn driwa bschweat, das a mögliche Lãndroutn nåch Kina dés poatugisische Monopol auf'n Asienhãndl und d'Asienmission untawãndan dad, wås de Poatugisn åwa fum Båbst söwa zuagsichat woan is. Ea håd a damid drot, das a de Jesuitn jéde Untaschdüzung entziagt, wãn sé de Lãndexpedizion nåch Kina néd fabiadn und aso is da Grueber Johann deprimiad und mitlawaile a schwa grãng fu Konstantinopl zruk nåch Italien gfoan. Doat håd a si im Jenna 1666 mim franzesischn Schriftschdöla Melchisédech Thévenot drofn, dea fu eam ois iwa saine Ealébnis in Kina und Tibet wissn woit.

D'lézdn Joa in Ungan[VE | Weakln]

Da Johann Grueber håd dãn in Plan fia a naiche Roas nåch Asien aufgém und is zurk ins Ésdaraichische und is in Simbiang Födkaplan und Bfoara woan. Doat håd a a ãgfãnga das a saine Ealébnis aufschraibt und håd im Hearibscht fu 1669 in Athanasius Kircher s'easchde Kapitl fu saim Buach gschikt. Dés is åwa bai dém nia ãkéma und güt haid ois faschoin, genau so wia de hundatn Skizzn de zaichnet håd néd iwalifat han. Ma woas a ned genau, ob dé Büdl im Athanasius Kircher saim Buach China illustrata fu 1667 auf dénan fum Johann Grueber basian, oda ob si dea dés aus dém sain Bericht söwa zãmdenkt håd. Auf jédn Fåi håd da Pata Grueber sâi Buach nia featig gschrim und is nåchdém a in Trnava in daheitingSlowakai Leara in ana Jesuitnschui woa, 1680 in Sárospatak in Ungan gschdoam.

Iwalifat is blos dés, wås da Athanasius Kircher faöffentlicht håd und dés wås da Melchisédech Thévenot aufgschrim håd, nåchdém a in Florenz mid'n Pata Grueber lãng grét håd. Aso is da Johann Grueber lãnge Zaid nia so bekãnt gwén, obwoi saine Bericht aus Tibet fia 200 Joa lãng de oanzige Infoamazion aus easchda Hãnd in Airopa woa.

Sâi Koleg, da Jesuitnpata Heinrich Roth aus Schwåm, is übrigens do nu amåi nåch Asien aufbrocha und am Lãndwég bis nåch Indien kema, wo a åwa schã 1668 gschdoam is.

Hisdoarische Beweatung[VE | Weakln]

Da Potala-Palåst in Lhasa, Athansius Kircher 1667, nåch ana Skizzn fum Johann Grueber

Nåchdém da Johann Grueber söwa kõan Bericht iwa sâi Roas nåch Indien, Kina und Tibet faöffentlicht håd, is de gãnze Aufmeaksãmkaid fu da Nåchwöd auf'n Athanasius Kircher gricht gwén, dea aus de Bericht und Zaichnungen fum Johann Grueber, sowia fu ãndane Jesuitn de in Asien woan, dés berümte Buach "China Illustrata" z'eascht 1667 auf Lådain in Amsterdam aussabråcht håd, fu dém 1670 a franzesische Iwasézung aussa kema is. In deara franzesischn Iwasézung is a a Briaf fum Johann Grueber ådrukt, dén dea an'dn Heazog fu da Toskana gschikt håd.

Sunst san fu eam fia Briaf iwalifat, dé im Neue Well-Bott Nummero 34 im Joa 1726 in Augschbuag und Graz faöffentlicht woan san. A Dail fu saine Ealébnis håd wia schã gsågt a da Franzos Melchisédech Thévenot in saim Buach "China" ainbaud und a da italienische Gråf Aurelio degli Anzi håd in saim Buach "Il genio vagante" (Parma, 1691) im Kapitl III auf da Saitn 331-399 a Zãmfåssung fum Pata Grueber saina Gschicht ådrukt. De umfãngraichn Bericht fu eam söwa und foa oim saine Skizzn und Zaichnungen aus China, Indien, Tibet und Nepal, san åwa laida faschwundn, so waids ned fum Athanasius Kircher iwanuma woan san.

De Dådsåch åwa, das da Johann Grueber gemainsãm mim belgischn Jesuit Albert d'Orville de easchdn Laid aus'n Wesdn woan, fu dénan ma gwis woas, dass wiakli söwa in Lhasa woan, darad a naiche wissnschåftliche Beoawatung fu deara Gschicht schã rechtfeating. Foa dé zwoa woa nemli blos 300 Joa dafoa da Oderico fu Pordenone ois easchda Airopea iwahaupt jémåis in Tibet und nåch eana a 200 Joa lãng neamt mea.

Literadua[VE | Weakln]

  • Johann Gruber, Franz Braumann (Hrsg.): Als Kundschafter des Papstes nach China 1656-1664. herausgegeben und übersetzt von Franz Braumann nach d. Briefen Johannes Gruebers u. d. Berichten seiner Biographen, Athanasius Kircher u. Melchisedech Thevenot, Edition Erdmann, Stuttgart 1985, ISBN 3522607104
  • Franz Braumann: Ritt nach Barantola. Herder Verlag, Wien 1958
  • Athanasius Kircher: Athanasii Kircheri China monumentis, qua sacris, nec non variis naturae & artis spectaculis, aliarumque rerum memorabilium argumentis illustrata. Amsterdami (Amsterdam): Apud Joannem Janssonium à Waesberge & Elizeum Weyerstraet (Jansson a Waesberge & Weyerstraet), 1667

Im Netz[VE | Weakln]

Schau a unta[VE | Weakln]

Fuasnotn[VE | Weakln]

  1. Bundesministerium für Dateiung, Wissenschaft und Kunst: Johann Grueber - Heidnische Anbetungszeremonien, zitiad nåch n'Bruno Zimmel, Die erste Durchquerung Tibets, 1953