Latein im Boarischn

Latein im Boarischn (Bairisch Latein) moant de lateinischn Iwarestln und Ausdrick in da heitign Boarischn Sproch. Lateinische Fremdweata wean ned behondlt, nua Lehnweata.

Im Gebiet vo Bayern und Esterreich wor im 3. und 4. Joarhundat Latein de Vakeassproch. Latein hod owa aa voa und noch dea Zeit a grosse Roin in da Region gspuit. Vo nam Eifluss vom Latei is oanigs im Wortschotz vo Boarisch dahoidn bliem bzw. zan Tei aa iwa ondare romanische und germanische Sprochn dazua kema.

Dees easchte Lehnwoat, wo in de germanische Sproch eiganga is, deafat Kaisa (vo Caesar) gwen sei. Afgrund vo da Aussproch woass ma, dass dees scho im 1. Joarhundat voa unsara Zeitrechnung gwen sei muass, weis ae in Caesar spoda mit Umlaut ausgsprocha woan is und s C wia Z und nimma wias boarische ai bzw. wias K, wiar in da klassischn Zeit.

Boarisch - Latein - Tabejn

Oi Begriff soin meafoch belegt sein. Wann dees ned da Foi is, muass a Beleg gnennt wean.

Boarisch	Heakumft (Latein)	Synonyme und Omeakung
akkrat, aggradd	accuratus = gwissnhoft, sorgfejti	genau, gwissnhoft
Brezn	bracchium = (Unter-)Orm	Weis wia kreizte Orm auschaut.
Buttn	buttina = Floschn, Gfäß; buttis, buttia (vulgärlat.) = Fassl, Kruag, Korb	Trogegfäß fia Weimba (aus Hoiz), aa fia ondare Hoizbehejta (fassl- und wannaoartig) vgl. Bottich, engl. Bottle
Butzal, Butzerl	pusillus = winzig	"kloans Kind", "Saigling", "Baby" (neiboarisch); owa aa "neaviga Typ"
dorkln, torkeln	torculare = kejtan (de Kejta/Torkl draan)	schlingan, woggln, schwankn;
fad	fatuus = bled, kindisch, gschmocklos; iwas franz. "fade" za uns	odroschn, gschmocklos, longweili, vastaubt. uninteressant
Enzian	gentiana = Enzian; ahd./oboar. encian	Heakumft vo gentiana unbekonnt
Faschiats, Faschierts	farcire = stopfn; iwa frz. "farce" Füllung	Hockfleisch, Brad; vo faschian (duachn Fleischwoif draan)
fei	finis = End, Grenz; iwa afr. fin	bestimmt, gwiss, wiakle, owa, do; fei steigat, vasteakt, wiazt...
griawe, griawig	creber, -bra, -brum = zoireich, haifig, b. Abl.: reich an	gmiatle, nett, liab, lebhoft, leiwand, s passt ois
Gspusi (mfn)	sponsus, sponsa = Valobta, Valobte (za spondere = gelobn, vasprechn)	Liabsta, Liabste; Liabschoft, Liaison, Flirt
Guglhupf, Gugelhupf (m)	cuculla = Kapuzn, Menchskuttn	Kapuzn deshoib, wei si da obare Tei vom Kuchn wia ra Kapuzn hebt ("hupft")
Gurgl, Guagl, Gurgel (m)	gurgulio = Luftrean, Schlund; ahd./oboar. gurgula	Hois, Schlund
Kaisa (m)	Caesar = C. Julius Caesar, got. kaisar	ejtasdes lateinisches Lehnwoat im Germanischn
Kistn (f)	cista = Kostn fia Kloada, Biacha oda Gejd	Truhn
Most	(vinum) mustum = junga Wein, Most (za mustus = jung, frisch, nei)	Obstwein
rar (si rar mocha)	rarus = sejtn	sejtn, knopp, vgl. "Raritet"
Pfund (n)	pondo = a Pfund Gwicht, pondus = Gewicht, got. pund	500 Gramm, a hoibs Kilo; vgl. aa de Schimpfweata (Steigerunga): "Pfundshamme", "Pfundssau (-erei)"
pfundig	schaug: Pfund; studentisch: voi gwichtig, daraus hod si de Bedeitung "berig" entwicket	berig, prima, klasse; vgl. "Pfundskerl" (prima Kerl), "Pfundsgaudi" (Riesngaudi)
Ploo (Plahe, Blahe), Plochn, Plochad	floccus = Woiflockn	Plane (hod si aus Ploo entwicklt!)
Proll (m)	proletarius = Besitzlosa mit vui Kindan	Gscheada, Asi, Gmoadepp
pressiern, pressian	pressare = pressn, druckn; iba frz. presser	dränga, treibm, eilig sei
Radi (m)	radix (-icis) = Wuazl	Rettich
Riwisl, Ribisel (f)	ribes = Johannesbial, iwa it. zu uns; uaspr. vom arab. ribas (Rhabarba)	Johannesbial, Haunsbia; vgl. aa cs. "rybiz", ungar. "ribszke"
Semme, Semmel (f)	similia = fein gmohlans Woaznmej; ahd./oboar. semela	Gebeck aus fein gmohlan Woaznmej (d.h. a Voikornsemme gibts ned)
Servus, Serwas, Sers	servus = Deana, Sklav; vo servare = beobochtn, beochtn	Gruaß im Sinn vo: "I bin dei Deana!"; vgl. serviern, Service
Spezi, Spezl (m)	amicus specialis = da bsondare Freind	Habara, enga Freind, Stammtischbruada
vamoledeien	maledicere = vafluachn ("malus" = schlecht, "dicere" = redn)	schlecht reden, vafluachn; s Gegntei vo "gebenedeit" (Kiachsproch)
Weila, Weiler	villari (ml.) = Gheft; vo villa = Herrnhof; ahd./oboar. wilari	kloane Siedlung; 3 - 15 Oanzlgheft (friara fia de Sippm-Mitgliada)
wif	vivus, -a, -um = lebendig	schlau, afgweckt, af Droht, vgl. aa Substantiv "Wifzagg"

Schaug aa

• Jiddisch im Boarischn

Biacha und Beleg

• Duden. Herkunftswörterbuch. Etymologie der deutschen Sprache. 4., nei beorbatete Aflog. Dudenverlag: Mannheim/ Leipzig/ Wean/ Zürich 2007. ISBN 978-3-411-04074-2
• Christoph Gutknecht: Lauter blühender Unsinn. Erstaunliche Wortgeschichten von Aberwitz bis Wischiwaschi. 3. Aflog, C.H. Beck, Minga, 2003.
• Adam Härdl: Lateinische Überreste im bairischen Dialekt. Dr. Erwin Rauner Valog, Augschburg, 2008 (Neiaflog). ISBN 978-3-936905-38-0
• Gerald Huber: Lecker derbleckt: Eine kleine bairische Wortkunde. Societäts-Verlag, Frankfurt/Main, 2008. ISBN 978-3797311009
• Kluge. Etymologisches Wörterbuch der deutschen Sprache. Bearbeitet von Elmar Seebold. 24., eaweidate Aflog. de Gruyter, Berlin/ New York 2002. ISBN 3-11-017472-3
• Konrad Rossberg: Deutsche Lehnwörter in alphabetischer Anordnung. BiblioBazaar, 2008 (Reprint vo da Easchtaflog: Leipzig 1881). ISBN 978-0559170898
• Stefan Sonderegger: Althochdeutsche Sprache und Literatur. 3. Auflog, de Gruyter, Berlin/ New York 2003. ISBN 3-11-017288-7
• Karl-Wilhelm Weber: Romdeutsch. Warum wir alle lateinisch reden, ohne es zu wissen, 3. Aflog, Eichborn, Frankfurt a.M., 2006. ISBN 978-3-8281-4747-4
• Otto Wittstock: Latein und Griechisch im deutschen Wortschatz, 3. Aflog, Berlin (Ost), 1982