Legio I Noricorum
| Der Artikl is im Dialekt Owaöstareichisch gschrim worn. |
D´Legio I Noricorum (easchde noarische Legion) woa a römische Legion, dé untam Kaisa Diocletian (284-305) in da Brovinz Noricum aufgschdöd woan is und lãng im haiding Nidaésdaraich schdazioniad woa. Zu da easchdn noarische Legion håd a a Flotn fu Schif ghead dé gemainsãm mid ana Rai fu Kasteln de Donau im östlichn Noricum ripense géng Ãngrif fu Geamanen fu da nöadlichn Sait fu da Donau bis ins 5. Joahundat aini bewåcht had.
Zu da Zaid fum Diocletian is d'römische Arme schdoak umbaud und faendat woan. In deara Refoam san an Haufn naiche Legionen aufgschdöd woan, dé åwa fü kleana woan ois wiad dafoa und ois mobile Schbezialainhaidn an da Grenz schdazioniad woan san. Da Oat Favianis an da Donau (mãnchmåi a "Favianiae" gschrim) wiad daduach zum Quartia fia de naiche easchde noarische Legion und damid zu am wichdign Zentrum fum römischn Milidea nöadlich fu de Åipn. Zua glaichn Zaid woa in Lauriacum, baim haiding Ens in Owaésdaraich, schã said 172/173 nåch Grisdus d'Legio II Italica schdazioniad, dé in westlichn Dail fu Noricum ripense bewåcht håd. D'Donauflotn fu da Legio I Noricorum woa a fian westlichn Dail zuaschdendig und håd de II Italica so fum Wåssa aus untaschdüzt.
Aus'n lézdn Joazent fum 3. Joahundat is uns a a Opfainschrift fu am Ofizia fu deara Legion an dn Got Mithras iwalifat. De Inschrift is in Virunum gfundn woan, da dåmåling Brovinzhauptschdåd fu gãnz Noricum und dé néd waid fum haiding Klångfuat in Keantn gléng is. S'Hauptquartia fu da easchdn noarischn Legion woa s'Kastel Adiuvense, wås baim haiding Ibs an da Donau ligt und Favianis, wås dés haidige Mautan an da Donau is.
D'Legio I Noricorum wiad a nu am Ãfãng fum 5. Joahundat in da Notitia Dignitatum ois in Favianiae schdazioniad aufglist und håd a Ainhaitn in da benåchboatn Brovinz Pannonia Prima ghåbt. Fia d'Brovinzn Pannonia Prima und Noricum håd's um s'Joa 400 nåch Grisdus a an gemainsãmen milidearischn Komandantn gém, in Dux Pannoniae Primae et Norici. Danå faliad si åwa de Schbua und am End fum 5. Joahundat woa d'Grenz an da Deana neama bewåcht. In da Zaid fum Severin fu Noricum, dea 482 in Favianiae gschdoam is, håd's de Legion auf jédn Fåi neama gém.
[drå werkln] Schau a unta
[drå werkln] Gwön
- de.Wikipedia: Legio I Noricorum (gseng am 12. Nofemba 2007)
- Groh, Stefan; Sedlmayer, Helga: Forschungen im Kastell Mautern-Favianis - die Grabungen der Jahre 1996 und 1997 , Wien: Verlag d. Österr. Akad. d. Wiss., 2002, 612 S., ISBN 3-7001-3078-3 (Der römische Limes in Österreich, 42)
- www.imperiumromanum.com - Die Legionen des Imperiums: LEGIO I NORICORUM
- Zeitschrift für klassische Archäologie 5 / XII / 1997 Neue Ausgrabungen im römischen Auxiliarkastell Mautern-Favianis und im östlichen Lagervicus (Niederösterreich)
- www.livius.org Legio I Noricorum (Englisch)
- aeiou Österreich-Lexikon Favianis
