Legio XIIII Gemina

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
S Legionszaichn fu da Legio Quartodecima Gemina Martia Victrix

D'Legio XIIII Gemina Martia Victrix (Zwilingslegion Numa 14, sigraich duachn Griagsgot Mars) woa oane fu de römische Legionna, de's am lengstn gem hod und de laung in Carnuntum schdazioniad woa, wo's bis zan End fum Remischn Raich im 5. Joahundat duach Beleg belegt is.

Gschicht[VE | Weakln]

D'Legio XIIII Gemina Martia Victrix is im Joa 41 foa Grisdus fum Octavianus ausghom woan. Da Bainaum Gemina (Zwiling auf Latain) dait drauf hii, dass dabai zwoa römische Ainhaitn, des foahea schau gem hod, zaum glegt woan san. Ma glaubt, das oane dafau de 14. Legion sai kintad, de im Joa 52 foa Grisdus in da Schlocht fu Alesia in Galien dabai woa. Da Bainaum Martia Victrix (sigraich duachn Griagsgot Mars) is untam Kaisa Nero dazua kema, noch da sigraichn Schlocht geng d'Boudica (60 oda 61 noch Grisdus), de a keltische Rebelion in Britanien augfiad hod. S Legionszaichn fu da XIIII Gemina woa da Odla (aquila).

In da Zaid wo da Octavianus ois Kaisa Augustus regiad hod, woa de Legion am Rain schdazioniad. Se muas oane fu de zwoa Legionen gwen sai, de noch da fia d Röma katasdrofaln Varusschlocht fum Lucius Nonius Asprenas zua Fataidigung noch Castra Vetera (baim haiding Xantn) falegt woan is. Fum Joa 14 noch Grisdus woas ma dass in Mogontiacum (Mainz) woa und doat de oanzige fu fia Legionen am Mitlrain woa, de mid'n Aid aufn Kaisa Tiberius zuagwoat hod (Tacitus, Annalen 1, 37).

Invasion fu Britanien[VE | Weakln]

Britanien ois römische Brovinz

Saidn Joa 9 noch Grisdus woa de XIIII Gemina in da Germania Superior in Mogontiacum (Mainz) schdazioniad und woa oane fu de fia Legionen de in da Zaid fum Kaisa Claudius im Joa 43 noch Grisdus untam Genaral Aulus Plautius an da römischn Invasion in Britanien bedailigt woa. De Röma haum si dabai noch eafoiglose friane Fasuach untam Julius Caesar und in Augustus endgülti im Südn fu da Insl festsezn kina und schbeda des fu eana bsezde Territorium fagressan kina. Gauns Britanien woa owa nia unta römischa Heaschoft.

Im Joa 60/61 noch Grisdus hod s unta da Kinigin Boudica an grossn Aufschdaund fu da keltischn Befökarung in Britanien gem, noch dem d Röma a wichdigs Druidnzentrum zaschdead haum. Dea Aufschdaund hod si foa oim aufn Schdaum fu de Iceni gschdizt und is owa fu de römischn Legionen nidagschlaung woan. D Legio XIIII Gemina woa oane dafau.

Rebelion am Rain[VE | Weakln]

Obn Joa 68 noch Grisdus woa d 14te Zwilingslegion in da Gallia Narbonensis, im Südn fum haidign Fraunkraich schdazioniad. Im Joa 89 hod da römische Genaral fu de Legionen in Owageamanien, da Lucius Antonius Saturninus, in Mogontiacum (Mainz) a Rebelion gengan Kaisa Domitian in Rom auzetlt, dea fu da Legio XXI Rapax und da XIIII Gemina untaschdizt woan is. Wai owa duach a iwaroschnds Tauweda da gfroarane Rain aufdaud is, haum eam saine geamanischn Fabündetn ned høfn kina und d Rebelion is fum Genaral Aulus Bucius Lappius Maximus nidagschlaung woan. Da Kaisa Domitian hod zua Schdrof de XXI Rapax noch Panonien fasezt und fabodn, das in Zukunft zwoa Legionen im søbn Loga schdazioniad san, damid si si ned wida zu so wos zaum schliassn kinan.

Donaulimes in Panonien[VE | Weakln]

D Donau im haiding Esdaraich

De XXI Rapax is fum Kaisa Domitian noch Moesia Inferior an da untan Donau im haiding Bulgarien gschikt woan und is doat im Kaumpf geng de Sarmatn im Joa 92 komplet aufgrim woan. Desweng is nu im glaichn Joa ois Easoz de XIIII Gemina fum Rain an de Donau fasezt woan und zwoa noch Vindobona (Wean). Noch am eafoigraichn Griag geng de Sarmatn und da Betailigung am dakischn Griag fum Kaisa Trajan (101-106), bai dem a Grosdail fum haiding Rumenien unta römische Heaschoft kema is, is de Legion wida zruk noch Panonien gschikt woan und zwoa desmoi noch Carnuntum, a boa Kilometa östlich fu Vindobona, wos fia de negstn drai Joahundat s Hauptquartia fu deara Legion blim is.

Untam Kaisa Antoninus Pius (138-161) haum Hüfsainhaitn (vexilationes) fu da 14tn Zwilingslegion in Noadafrika geng de Mauren kempft und de Legion woa a baim Griag fum Lucius Verus (161-169) geng de persischn Partha gauns im Ostn fum Römischn Raich dabai.

Markomanengriag[VE | Weakln]

D römische Ofensifn iwa d Deana geng de Markomanen und Quadn 171-175

Zua glaichn Zaid is de Situazion owa a an da sunst eha ruign Donaugrenz gfeali woan. Im Joa 166 han 6000 Markomannen fum haiding Bemen und nöadlichn Nidaesdaraich aus iwa de Deana driwa und han plündand duach Noricum und Panonien zong. D römische Kavalari hod den Aungrif owa recht schö zruk schlaung kina und im Joa 167 is mid 11 faschidane Schdem a Fridnsfadrog gschlossn woan. Auf des aufi haum de Röma owa d Legio XIIII Gemina fum Ostn zruk an d Deana gruafn und in Italien naiche Legionen ausghom und a Gegnofensife blant. Dabai is owa fum Ostn a Infekzionsgraunghaid midschlept woan, de ois Antoninische Pest bekaunt woan is. Woaschainli woa de a Foam fu Pokn oda Mosan.

Da Lucius Verus is an deara Pest gschdoam und an Haufn Laid in Rom und de Brovinzn a. Da Kaisa Marcus Aurelius (161-180) hod auf des aufi d aloanige Heaschoft iwanuma und fia s Joa 170 an Aungrif auf de Geamanen nöadlich fu da Deana blant. Dea woa owa ned eafoigraich und 20.000 römische Soidodn san dabai gschdoam. Auf des aufi haum de Markomanen a Ofensifn gschdart und han plündand duach Noricum und Panonien zong, wobai sogoa Aquilaea im Noadn fu Italien zaschdead woan is. 171 haum de gschwechtn Röma in Carnuntum an Wofnschdüschdaund mid de Geamanen ausghaundlt.

Schau im negstn Joa san owa naiche Kempf ausbrocha und da Griag geng de Markomanen hod fu do au in Marcus Aurelius sai gaunze Regentschoft dauat. Zan Schlus haum de Röma eana gaunz milidearischs Potenzial zaumzong und haum 10 Legionen (50.000 Soidodn und nu amoi so fü Hüfsainhaidn) an da Donau zaumzong und so de Markomanen zan Schlus komplet besigt. D XIIII Gemina woa oane fu denane Legionen und is danoc zua Bewochung fu da Grenz waida in Carnuntum blim, wo woaschainli a da Marcus Aurelius im Joa 180 gschdoam is.

Milideaputsch an da Donau[VE | Weakln]

A Aureus Goidmünzn fum Septimius Severus zua Ea fu da XIIII Gemina Martia Victrix, da Legion de eam zan Kaisa proklamiad hod, rechts siagt ma in Adla, s Zaichn fu deara Legion

Im Joa 193 is da Kaisa Pertinax in saim Palost in Rom fu da Pretoariana Garde umbrocht woan und da Senatoa Didius Julianus is ois naicha Kaisa ausgruafn woan, wobai da Kaisabostn an den faschdaigat woan is, dea am mearan dafia zoid hod. Des hod de Soidodn in de Brovinz rebelisch gmocht und de Legionen an da Deana, foa oim de XIIII Gemina, haum eanan Genaral in Septimus Severus ois Kaisa proklamiad. Bledawais haum owa a de Legionen in Siarien an aigenen Kaisa ausgruafn (in Pescennius Niger) und de in Britanien a (in Clodius Albinus). De Donaulegionen san auf des aufi mim Septimus Severus bis noch Rom marschiad und haum so duachgsezt, das ea da naiche Kaisa wiad. Da Didius Julianus is in Rom kepft woan und d'XIIII Gemina woa a dabai wia da Pescennius Niger im Ostn fum Septimus Severus bsigt woan is. Danoch hod da Septimus Severus im Joa 197 in ana risign Schlocht a nu in Clodius Albinus gschlaung, dea fu Britanien mid saine Legionen noch Galien zong is. Ob de 14te Zwilingslegion do a dabai woa, woas ma ned. Maunche Hisdoarike glaum, das de Legion im Joa 198 im Födzug geng de Partha gauns im Osdn fum römischn Raich dabai woa, bai dem de parthische Hauptschdod Ctesiphon im haiding Irak aignuma woan is. An oi zwoa Griagsschaublez, in Galien (197) und a in Mesopotamien (198), kaun de XIIII Gemina owa fost ned dabai gwen sai, wai a gaunze Legion iwa so a Disdanz faleng in deara Zaid eha unmegli woa.

VI Pia VI Fidelis[VE | Weakln]

S Imperium Romanum mim Galischn Raich im Westn (260 – 273)

In de negstn Joazent woa de XIIII wida in Carnuntum und hod si owa waida in de Nochfoigekempf bai da Bsezung fum Kaisabostn aigmischt. Nochn Dod fum Kaisa Valerian (260) hods zeascht in Ursurpator Regalianus gengan naichn Kaisa Gallienus untaschdizt und schbeda de Saitn gwegslt und in Gallienus geng sain naich Gegna Postumus untaschdizt, dea fu Galien aus ai aigens unobhengigs Westraich aufbaud hod. De Rebelion im Westn is a duachn Ainfoi fu de Alemanen iwan Limes in de Agri Decumates ausglest woan, den de Röma ned fahindan kina haum. Da Gallienus hod de Alemanen im Joa 268 entschaidend Schlaung und zruk drenga kina, is owa unta misdeariöse Umschdend boid drauf søwa gschdoam und a naicha Biagakriag is um sai Nochfoig ausbrocha. De XIIII Gemina woa dabai aunschainend auf da Saitn fum Victorinus (269-271) dea im galischn Westraich regiad hod. Da Claudius Gothicus, dea im Septemba 268 de Gotn bai da Schlocht fu Naissus (s haidige Niš in Seabien) gschlaung hod, hod si owa ois naicha Kaisa duachsezn kina und des Raich woa wida unta oana Haund faaint. Obwoi de 14te Zwilingslegion in dem politischn Duachanaunda oa Moi do und oa Moi doat woa, hod s in Titl VI Pia VI Fidelis griagt (6 Moi bflichtbewust, 6 Moi drai).

Im 5. Joahundat[VE | Weakln]

A Schdömpi auf am Züagischdoa; intressant is, das d'Zoi 14 zu deara Zaid mid XIIII gschrim woan is und ned XIV

Am Aufaung fum 5. Joahundat woa de XIIII Gemina oiwai nu an da Deanagrenz in Carnuntum schdazioniad. In da Notitia Dignitatum, da wichdigstn schriftlichn Beleg fia de Zaid, wiad aussadem nu a Ainhaid mid'n Naum Quartodecimani comitatensis ois untam Magister Militum per Thracias schdead aufglist, wos a Untaainhaid fu da XIIII Gemina gwen sai kintad. Nochdem in de 430a Joa de Donaufront fu de Röma kolabiad is, wiad woaschainli a de Legion aufglest woan sai, oda es haum neta nu kloane Ainhaitn dafau a Zaidl waida exisdiad.

Wos nu intressant is[VE | Weakln]

Duach des, das de Legio XIIII Gemina mearane Moi a im Ostn bai Griagshaundlungen und geng Rebelionen aigsezt woan is, han Soidodn fu deara Legion schau relatif fria mim Grisdndum in Kontakt kema und es san a in Wean und Carnuntum mearane Grobschdoana fu grisdliche Legionea gfundn woan, de zu da Quartodecima ghead haum. Daduch is Carnuntum schau im 2. Joahundat oans fu de frian grisdlichn Zentren im römischn Raich gwen.

In Wean und Umgebung hod ma an Haufn archeologische Fund gmocht de im Bezug zu deara Legion schdenga, owa a in Mainz gibt s Fund aus da Zaid wo de XIIII Gemina im 1. Joahundat doat schdazioniad woa.

Schau a unta[VE | Weakln]

Beleg[VE | Weakln]

Fairytale bookmark silver op.png
Fairytale bookmark silver op.png
Der Artikl gheart zu de berign Artikl in da boarischn Wikipedia.
Fairytale bookmark silver op.png