Legio X Gemina

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
S Legionszaichn fu da X Gemina

D Legio X Gemina (Zwilings-Legion Numa 10) woa oane fu de 4 römischn Legion, mid denan da Julius Caesar im Joa 58 foa Grisdus Galien earowat hod und woa a bai da Invasion fu Britanien dabai. Schbeda woa de Legion in Vindobona (Wean) schdazioniad, wo s bis zum End fum Römischn Raich blim is, owa a oiwai wida in Ausanaundasezungen waid weg fu da Donau involviad woa.

Gschicht[VE | Weakln]

Da Galische Griag[VE | Weakln]

Galien zua Zaid fum Julius Caesar

De Legio X Gemina ged auf a ödane römische Milideaainhait zruk, nemli de X Equestris. Dea Naum dait drauf hî das de Legion mid Ressa ausgrist woan is und ois Kavalari fawent woan is. Auf jedn Foi hod de X Equestris a wichdige Roin gschbüd baim Griag fum Julius Caesar in Galien und es wiad gsogt, das des sogoa sai liabste Ainhaid woa, wai s so eafoigraich woa. De zente Legion woa bai da Schlocht bai Sabis geng de belgischn Nervia dabai (57 foa) und bai da berümtn Schlocht fu Gergovia (52 foa), wo de Röma gengan galischn Vercingetorix kempft haum und a Nidalog aischdeka miassn haum.

De Legio X Equestris woa a bai da römischn Invasion fu Britanien dabai. Noch dem Galien komplet besigt woan is woa de Legion in Caesar waida drai untagem und hod auf saina Saitn im Biagagriag geng sain Konkuarentn in Pompeius kempft, unta aundam bai de Schlochtn fu Pharsalus (in Grichnlaund, im Joa 49 foa Grisdus) und Munda (in Schbanien, im Joa 45 foa Grisdus). Noch Sig fum Julius Caesar gengan Pompeius is de X Equestris aufglest woan und de Vetaranen han in Galien augsidlt woan und haum Laund in da Gegend fu da Colonia Narbo Martius (haid Narbonne) griagt.

Untam Augustus[VE | Weakln]

Kampanien fu de Röma geng de Kantabria und Astuaria im Joa 26 und 25 foa Grisdus
Schdömpi fu da Legio X Gemina, gfundn in Wean am Judnbloz

Noch da Eamoadung fum Julius Caesar im Joa 44 foa Grisdus is de zente Legion fum Octavian im Joa 42 wida reaktiwiad woan und hod auf saina Saitn im Baigagriag geng de Caesar-Möada in da Schlocht fu Lepidus kempft und unta Marcus Antonius bai da Schlocht fu Philippi. Danoch woa s baim Marcus Antonius saim Fødzug geng de Partha im Ostn dabai und is doatn bai da Schlocht fu Actium gschlong woan. Auf des aufi hod wida da Octavianus s Komando iwa de Legion iwanuma und hod de Vetaranen bai Patras in Grichnlaund augsidlt. D Legionea haum owa gengan Octavian rebeliad und hod desweng in Bainaum Equestris faloan. Nochdems mid naiche Ainhaitn faschdeakt woan is, is de zente Legion untam Naum X Gemina (Zwilingslegion) naich grünt woan.

Wia da Octavian daun Kaisa woan is und si ob daun Augustus gnend hod, is de Legio X Gemina fu eam in am risign Fødzug in Schbanien geng de Kantabria aigsezt woan. Kantabrien woa oane fu de lezdn Regionen fu Schbanien de nu ned unta da Kontrole fu de Röma woa und de an recht schdoakn Widaschdaund glaist haum. Desweng hod da Augustus ned neta de X Gemina sondan nu 7 aundane Legionen doat im Noadn fu da ibearischn Hoibinsl zaumzong und so in am laungen Griag de Kantabria besing kina. Nochn endgültign Sig fu de Röma is de X Gemina in Schbanien schdazioniad blim, in da Brovinz Hispania Tarraconensis und Vetaranen fu ia woan unta de easchdn Bewona fu da naichn Schdod Caesaraugusta (haid Zaragoza).

In Panonien[VE | Weakln]

Nochdem de Zwilingslegion fost a Joahundat in Schbanien woa, is im Joa 63 noch Grisdus noch Carnuntum fasezt woan. De Legio XV Apollinaris, de bis zu dem Zaidbunkt doat schdazioniad woa, is noch Ostn in Griag geng de Partha gschikt woan. In da kuazn Regiarungszaid fum Kaisa Galba (68-69) is de X Gemina wida zruk noch Schbanien fasezt woan, wos de Legionea sicha nua Recht sai hod kina. De naich grünte VII Galbiana Legion hod dawai ian Bloz an da Donau iwanuma

In Geamanien[VE | Weakln]

Germania Inferior an untan Rain

D Legionea fu da X Gemina haum de Zaid in Schbanien owa ned laung genisn kina, sondan de Legion is schau im Joa 70 noch Grisdus fum Kaisa Vespasian an dn Rain noch Germania Inferior gschikt woan. Doat san de rebelischn Batavia kuaz dafoa fu de Röma besigt woan und de zente Legion hod des Laund fu de Batavia befridn soin. Fu 71 bis 103 noch Grisdus woa de X Gemina desweng a im Oppidum Batavorum schdazioniad, am Kastel wos foahea fu da Legion II Adiutrix baud woan is und in da haidign Schdod Nijmengen in Holaund woa. In da Umgebung fu Nijmengen hod ma a fü archeologische Fund gmocht de auf de Presenz fu da X Gemina hîdaitn, wia s Kastel fu Hunerberg, römische Grobschdoana und Züagischdoana fu römische Bautn, de oiwai an Legionsschdömpi drauf ghobt haum.

Schbeda hod de X Gemina ois Dail fu da Arme fu Germania Inferior geng de Rebeljon fum Guvanea fu Owageamanian (Germania Superior) in Antonius Saturnius kempft, dea si gengan Kaisa Domitian gschdöd hod. Aus dem Grund hod de zente Legion gemainsaum mid de aundan drai Legionen fu da Arme, da I Minervia, VI Victrix, und da XXII Primigenia, in Ditl Pia Fidelis Domitiana griagt ("blichtbewust und drai in Domitian"). Noch dem da Domitian gschdoam is, hod d Legion den Ditl owa neama laung waida fawent.

Vindobona[VE | Weakln]

Rest fum römischn Vindobona, am Michaelabloz in Wean, wo de X Gemina fost 400 Joa schdazioniad woa

Im Joa 103 noch Grisdus is de X Gemina wida zruk noch Panonien transfariad woan und zwoa zeascht noch Aquincum im haiding Budapest und schbeda noch Vindobona, im haiding Wean. Vindobon is a fia de negstn Joahundat bis zan End fum Römischn Raich s Hauptquartia fu da Legio X Gemina blim. Fu deara Zaid au woa de X Gemina fia de Bewochung und Fataidigung fu da Donaugrenz fum Römischn Raich zuaschdendi, hod owa drozdem efda bai intane Konflikt um de Foaheaschoft in Rom intaveniad oda Daile fu da Legion san in wichdige Krisdnhead in aundane Daile fum Imperium aigsezt woan - oa so a Krise woa da Bar-Kochba-Aufschdaund in Judea.

In Judea[VE | Weakln]

Im Joa 132 is de zwoate und lezde grosse Revoitn fu de Judn geng de römische Besozung ausbrocha. Unta da Fiarung fum Simon bar Kochba is 60 Joa noch n easchdn grossn jidischn Aufschdaund, bai dem de Röma zan Schlus Jerusalem earowat haum und auf de Ruinen a römische Schdod grünt haum, wida a Rebeljon ausbrocha. Da Auslesa woan schrenge römische Gsez, de geng de Dradizionen fu de Judn gricht woan. Obwoi da Aufschdaund am Aufaung recht eafoigraich woa und de Judn Jerusalem zruk earowat haum und 50 aundane Schdet in Judea bsezt haum, hod s ned laung dauat bis de Röma mid eanara grossn Milideamocht zruk schlong. Unta de Legionen de fia den Griag zaum zong woan san, woan a Obdailungen fu da X Gemina. Soichane Hüfsdrupn, de waid weg fum Hauptquartia fu ana Legion kempft haum, hod ma Vexillationes gnend.

Da Bar-Kochba-Aufschdaund is 135 nidagschlong woan und da Simon bar Kochba søwa is dabai um s Lem kema. Vexillations-Obdailungen fu da X Gemina woan owa waida im Ostn und woan zum Baischbü baim Griag fum Lucius Verus geng de Partha im Joa 162 dabai.

An da Deana[VE | Weakln]

Münzn fum Septimus Severus
So woan im 3. Joahundat de römischn Infantri-Legionea an da Donau ausgrüst

A an da Donau hod s zu deara Zaid schdüamische Earaignis gem wo de X Gemina mitndrin woa. Untam Komando fum Kaisa Marcus Aurelius hod de Legion an Fødzug geng de nöadlich fu da Donau sidladn Quadn gfiad und in de Markomanen-Griag fu 166 bis 180 woa s a unmitlboa involviad. De Markomanen han dabai iwa de Grenz aigfoin und han in de Brovinzn Noricum und Pannonia aidrunga und eascht duach an massifn milidearischn Gengschlof fu de Röma wida iwa d Donau zruk drengt woan. Da Marcus Aurelius hod fost sai kaunze Regiarungszaid mid da Krise an da Donaugrenz zan kempfn ghobt.

Im Joa 190 noch Grisdus wiad da Septimus Severus fum Kaisa Commodus zan Genaral fu de Donaulegionen gmocht. Nochdem da Commodus gschdoam is und in Rom den sai kuazzaidiga Nochfoiga Pertinax 193 eamoadet woan is, haum de Donaulegionen in Septimus Severus ois Kaisa ausgruafn und des a mid am Marsch auf Rom duachgsezt. Fü fu de Legionea fu da X Gemina wean auf des aufi in Rom Praetoriana, des woa de Elitedrupn de direkt in Kaisa untaschdaundn is.

Im 3. Joahundat[VE | Weakln]

Bai de faschidanen Mochtkempf im 3. Joahundat untaschdüzt de Legio X Gemina faschidane Kaisa und griagt auf des aufi an Haufn Eanditl wia zan Baischbü Antoniniana (duachn Caracalla oda Elagabalus), Gordiana (fum Kaisa Gordianus III), Deciana (fum Kaisa Decius), Floriana (fum Kaisa Florianus) und Cariniana (fum Kaisa Carinus). Soichane Ditl wean maistns ned laung fawent und waund da jewailige Kaisa gschdoam woa, hod ma a den Bainaum wida blaim lossn.

End fum Römischn Raich[VE | Weakln]

D Legio X Gemina woa bis zum End fum Römischn Raich in Vindobona schdazioniad, owa neta nu in ana reduziadn Gress. A Dail fu da Decima Gemina woa im Magister Militum per Orientem zuadailt und woa im Ostn fum Raich schdazioniad. Dea Dail dea nu in Panonien blim is woa untam Komando fum Dux Pannoniae primae et Norici ripensis, oiso in Genaral fia Westungarn und Donau-Noricum. Maunche Hisdoarika glaum desweng a, das de X Gemina im 5. Joahundat eha in Arrabona, im haiding Györ in Westungarn, schdazioniad woa, ois wia in Vindobona. Danoch faliad si auf jedn Foi de Schbua fu da X Gemina und in da Zaid fum Severin fu Noricum, dea 482 in Favianis in Nidaesdaraich gschdoam is, hod s koane oaganisiadn römischn Drupn an da Donaugrenz mea gem.

Schau a[VE | Weakln]

Beleg[VE | Weakln]