Münzn vu Maine
| Der Artikl is im Dialekt Owaöstareichisch gschrim worn. |
D'Münzn vu Maine (englisch: Maine Penny, deitsch: Münze von Maine) is a noawegischs Pfennigstickl aus da Regiarungszeit vum Olaf im Drittn. Es is im Joah 1957 bei da archäologischn Ausgråbung vu ana åidn Indiana-Siedlung bei Naskeag Point, an da Penobscot Bay im US-Stååt Maine gfundn woan. De Münzn is's bis heid anzige präkolumbische Fundstick ausm Bereich vu de Noadischn Lända, des wos vu da Wissnschåft übawiegnd ois präkolumbisch ãneakãnnt wiad. Da Runenstoa vu Kensingtn in Minnesota wiad beispülshoiba übawiegnd ois Föischung ãngseng. Weidare Fundstick in Noadamerika gibt's netta in Kanada, bsundas im Gråbungsföid vu L'Anse aux Meadows.
De Münze is zwischn 1065 und 1080 n. Chr. gschlång woan, mea wia 50 Joah nåch da letztn vu de Vinland-Reisn, de duach Noadische Sågn und Chronisten üwaliefat woan san. Vu dem hea riaht aa de Vermutung, dass's aa späda nu Kontakte zwischn Norweng und Amerika gem hod. S'Gråbungsföid Goddard bei Naskeag Point in Maine wiad auf de Zeit vu 1180–1235 datiert und ma geht davã aus, dass duat autochtone Väika aus ebm dea Gegend glebt hom.
Weil de Münzn in ana Gråbungsstättn ãn da Küstn gfundn woan is, kinat ma glaum, dass d'Wikinga bis duat hi kemma san und dass's d'Münzn då hoid valuadat oda eitauscht hom. D'meistn Foascha san då oba ãndara Meinung: Weil de Münzn jå s'oanzige Fundstickl in dem großn Gråbungsföid, des aus Noadeiropa heastãmmt, gengan de davã aus, dass de Münzn vu indianische Bewohna zu dem dåmois großn Hãndlsplåtz bråcht woan is und dass de de duat söiba eitauscht hom. De Theorie untastützt de Tåtsåch, dass ma duat aa aundare Såchn ausgråm hod, de ausm hechan Noadn vu Amerika duat hibråcht wean hom miassn, so zum Beispü Weakzeig, des ma Inuits aus da Dorsetkuitur zuaoadnet. Oiso nimmt ma aa ã, dass d'Münzn vu Maine auf Håndlswege vu Labrador oder Neifundlãnd aus schliaßli nåch Maine kemma is.
