Manali-Leh-Hochstråßn

Der Artikl is im Dialekt Owaöstareichisch gschrim worn.

Ãm Weg zum Rohtang-Påss staut si si wieda måi

Oft entstengan de Staus, weu's an LKW üwalån håm

D'Manali-Leh-Hochstråßn (englisch: Manali-Leh-Highway oda aa Leh-Manali-Highway) is a 477 Kilometa lãnga Vakeahsweg im indischn Himalaja, dea wås de Städt Leh im Bundesstååt Jammu und Kashmir und Manali in Himachal Pradesh vabindn tuad.

Bekãnnt is dea „Highway“ voa åim desweng, weu ma auf eam üwa mearare vu de hechstn befåahbåan Påssstråßn vu da Wöid drüwa foahn muaß, so zum Beispüi üwa'n Rohtang-Påss (3.978 m), in Baralacha-Påss (4.892 m), in Lachulung-Påss (5.059 m) und in Tanglang-Påss (5.325 m). Da letzte vu de iatst aufglistetn is sogåa da zweithechste Påss auf da Wöid, üwa den ma mit am Kråftfåahzeig drüwa kimmt.

D'Manali-Leh-Hochstråßn bringt an vu Manali im Kullu-Tåi in'd Region Lahaul und Spiti und nåch Ladakh. De Stråßn is netta offn, wãn'd Road Construction Company vu da indischn Armee in Schnee wegga bråcht håd und wãn de Schädn vum Winta behom san, åiso im Summa zwischn Juni und Mitte Septemba. Åwa aa in dera kuazn Zeid muaß åiwei ãn da Stråßn gåaweit wean, weu de dünne Bitumen-Deckn ausbessat wean muaß und de Schädn vu de Eadrutsche behom wean miaßn.

Damid ma's üwa de gãnze Streckn mid ålle Pässe drüwa schåfft, braucht ma mid am Auto in da Rögi mindestns zwoa Tåg. Ãndare Vakeahsmittl, de wås si ãnbietn san de Fåahradln, fia wås ma åwa gscheid a Kondi midnehma soit. Außadem gibt's aa an rögimäßing Busvakeah. Weu da Luftdruck in dea teuweis extremen Hechn schã oag niadrig is, muaß ma åwa mid eikalkulian, dass an d'Hechnkrãnkheid dawischn kã.