Manti

Der Artikl is im Dialekt Owaöstareichisch gschrim worn.

Voabereitete Mantı auf am Blech

Mantı mid Joghurt und ana Soß aus Butta und Paprikapuiva

Manti (tüakisch Mantı) san kloane mid Faschiadn oder Gmias (zum Beispüi Linsn oda Küawis) gfüide Teigtåschn.

De Manti kemman aus da tüakischn Kuchi und göitn åis a bsundare Spezialität vu da Provinz Kayseri. Duach de kulturelln Vabindungen, de s'Osmanenreich mid seine Nåchbåan ghåbt håd, san de Manti mid da Zeid aa nåch Russlãnd, in'd Ukraine und nåch Zentralasien (u. a. Usbekistan) kemma. In China kennd ma a åbgwãndlte Foam, de Bapao hoaßt.

Bei Mantis wean kloane Yufka-Toag-Quadrate (Kantnläng 1 bis 2 Zanti) mid da Füllung (Lammpifaschiads, Zwüifin, Knofi, Pinienkean, Minzn) belegt und dãun gschlossn und in Såizwåssa gart, in Russlãnd und Asien in am Dãmpfkochtopf. Seavian tuad ma's mid ana rohn Soß aus Joghurt, Knofi und Minzn und ana woamen Soß aus Öi oda Butta mit Paprikapuiva oda glei mit brådne Paprikas.

A bosnische Variantn wiad mid dem Joghurtbaz, gwüafite Paradeisa, Pedasüi und ana woamen Butta-Paprika-Soß gessn. In da Tüakei kennt ma des åis Beyaz Mantı.

Im Netz

•  Commons: Manti – Sammlung vo Buidl, Videos und Audiodateien