Michel Houellebecq

Da Houellebecq Michel

Da Houellebecq Michel (sågn duad ma Wellbäck Mischell) is a franzesischa Schriftschdöla, dea in de 1990a Joa a boa recht skandalöse Biacha gschrim håd, de åwa wödwaid rechte Bestseller woan san. Said dém güt a ois õana fu de wichdigsdn haid léwadn Schriftschdöla. Auf d'Wöd kema is a am 26. Februar 1956 oda 1958 af Reunion, ana Insl im Indischn Ozean de wo zu Frãnkraich ghead. Haid lébt a åbwegslnd in Ialãnd und auf da kanarischn Insl Lanzarote. In saine Romane bscheftigt a si moasdns auf a weng a zynische Oat mid'n Zãmlém fu de Laid in da modeanen Gsöschåft. Dabai schraibt a oft recht frech iwa de Hippies und 68ga, iwa Politik, iwa Religion, in Feminismus und oft iwa s'Schnaksln.

Saine Biacha

Saine Biache san in ole méglichn Schbråchn iwasézt woan. As easchde wås eam a bai ins berühmt gmåcht håd, woa Elementarteilchen des 1998 auf Daidsch aussakema is. In dém ged's um zwoa Briade, fu dénan da õane Karriere ois Mikrobiologe måcht und da zwoate a weng a schmiariga Typ is, dea de gãnze Zaid an s'Budan denkt, åwa bai de Waiwalaid ned fü raisst. De zwoa untaschiadlichn Briada, de ned fü Kontakt hãm, bringt åwa s'Schicksåi oiwai wida zãm. Wås de zwoa fabint is, das oi zwoa drunta laidn, das eana Muata a weng egoistisch woa und si um de Buama ned fü kümmat håd und liawa schdrawanzn gãnga is. Des Buach is oft ois Åbrechnung mid da 1968a Revolution und mim Feminismus intapretiad woan.

As zwoate Buach, wås auf Daidsch aussa kema is, woa Ausweitung der Kampfzone. Då ged's um zwoa Hawara, de fia a franzesische Software-Firma oawatn und auf Gschäftsroas auf s'Lãnd gschikt wean. De zwoa kenan si oagentli goa ned so guad, åwa daduach, das's mearane Wochan midanãnd oawatn miassn und gmõansãm in faschidane Hotö schlåfn, leanan si si oiwai béssa kena und kriagn so a fü fum Privatlém fum ãndan mid. De zwoa rén fü iwa Waiwagschichdn und ins Buff geh. In Wiaklichkaid san åwa oi zwe schwa frustriad und in da Hãndlung ged's mid êa oiwai waida beagå. In Daidschlãnd und Östaraich is des Buach Plattform foa oim daduach bekãnt woan, wai's in da Feanseh-Sendung fum Marcel Reich-Ranitzky (Das Literarische Quartett) driwa grét und gschdridn hãm.

As dritte Buach, wås bai ins zan Bestseller woan is, woa Plattform. In dem ged's wida recht fü um's Schnaksln und wia de Sexualität oiwai meara zu am Gschäft wiad, ned nua in da Prostitution, sondan a duach Nåkate in da Weabung, duach Schéhaidsoparazionen und iwahaupt. Da Houellebecq schraibt åwa néd, das de Gsöschåft wida wéka kema soid fu dém Irrwég, sondan ea schlågt in dem Roman recht provokant fia, das ma dén Wég gãnz radikal bis zan End ge soitadn. Dés Buach is déswéng oft ois Åbrechnung mim Kapitalismus intapretiad woan. Bsondas das a in dem Buach positiv iwan Sextourismus schraibt, is zu am Skandal woan.

Lisdn fu olle Romane

• Suche nach Glück. Gedichte, (La poursuite du bonheur, 1992) DuMont, 2000, ISBN 3-7701-5357-X.
• Ausweitung der Kampfzone (Extension du domaine de la lutte, 1994). Rowohlt, 2000, ISBN 3-499-22730-4
• Lebendig bleiben. (Rester vivant, 1997), Die Schöpferische Absurdität (In: Interventions, 1998/Die Welt als Supermarkt, 1999) und Pariser Beton (In: Literaturen, 6 (2005) 9), DuMont, 2006, ISBN 3-8321-7970-4.
• Elementarteilchen (Les particules élémentaires, 1998), List, 2001, ISBN 3-548-60080-8
• Die Welt als Supermarkt (Interventions, recueil d'essais, Flammarion, 1998). DuMont, 1999, ISBN 3-7701-4972-6
• Wiedergeburt. Gedichte, französisch-deutsch. (Renaissance, Flammarion, 1999) DuMont, 2001, ISBN 3-7701-5359-6.
• Plattform (Plateforme, 2001). Rowohlt, 2001, ISBN 3-499-23395-9
• Le sens de combat. Der Sinn des Kampfes. Gedichte, französisch-deutsch. DuMont, 2001, ISBN 3-7701-5358-8
• Gegen die Welt, gegen das Leben (Contre le monde, contre la vie), Dumont, 2002, ISBN 3-8321-5531-7
• Suche nach Glück (La poursuite du bonheur) (Taschenbuchausgabe). Rowohlt, 2003, ISBN 3-499-23172-7
• Lanzarote. Rowohlt, 2004, ISBN 3-499-23644-3. (Frankreich: Flammarion, 1999)
• Die Möglichkeit einer Insel (La possibilité d'une île, 2005), Dumont, 2005, ISBN 3-8321-7928-3
• Michel Houellebecq, Stephen King (Hrsg.), H. P. Lovecraft: Against the World, Against Life (2005).
• Volksfeinde: Ein Schlagabtausch (Ennemis publics, 2008), gemeinsam mit Bernard-Henri Lévy, Dumont 2009, ISBN 978-3-8321-9518-2
• Ich habe einen Traum (Interventions 2, 2009), übersetzt von Hella Faust; DuMont Verlag, Köln 2010 ISBN 978-3-8321-9592-2
• Karte und Gebiet (La carte et le territoire, 2010) übersetzt von Uli Wittmann; DuMount Buchverlag, Köln 2011, ISBN 978-3-8321-9639-4