Pazifik

Höhnkortn vom Pazifischen Ozean

Kortn

Da Pazifische Ozean, aa Pazifik oda Stilla Ozean, is vom Ferdinand Magellan ois "friedlich - pazifis" benånnt woan, wei da Ozean noch em Kap Hoorn bei Argentinien und Chile so ruawig is, wos ålladings, im Gegnteil, ned aufn gonzn Ozean zuatrifft. Eigentlich is a eha stüamisch und schlågt oft hohe Wön.

Da Pazifische Ozean is da greaste vu olle drei Ozeane (Pazifischer Ozean, Atlantischer Ozean, Indischer Ozean) und eastreckd si vum Nordn, vo de Aleuten, bis zua Antarktis (Südpolarmeer) im Südn, und im Westn die gånze ostasiatische Küstn, de südostasiatischn Inslgruppn (Indonesien, Papua-Neuguinea) und die Ostküstn vo Australien entlång bis in Ostn, de gesåmte Westküstn vom Amerikanischn Kontinent entlång.

Insgesomt arreicht a dånn a Gesåmtowaflächn vo 166,24 Millionen km² (mid de Nebmmeare sogoa 181,34 Millionen km²), wos ungefea 35% da gånzn Erdobaflächn ausmåcht. Owa da Pazifik is ned neta da greßte sondan a da tiafste Ozean vo da Wöd, und üwahaupt befindt se des tiafste Loch vo da Erdn im Pazifik, des wos da Marianengråbn mid 11.034 Meta Tiafn is.

Wirtschoftlich gsechn is da Pazifische Ozean heit es wichtigste Gewässer, weil do die greastn Handelsvabindungen laffn (Nordamerika - Asien, Asien - Europa (üwan Panamakanal), hauptsächlig ausglöst durch de Position vo de ostasiatischn Stååtn ois Billigproduktionslända, oiso ois Lända de si ideal fian Export eignen.

De Insln im Pazifik låssn si genarell in de drei Gebiete Mikronesien, Polynesien und Melanesien untateiln.