Rüsten (Fertigungstechnik)

Aus Wikipedia
Der Artikl is im Dialekt Obaboarisch gschriem worn.

Ois Rüstn werd in da Fertigungstechnik de Arbad bzeichnet, de ma macha muas bis ma auf na Maschin a anders Drum fertign ko. De Rüstzeit is oiso de Arbeitszeit, de vabraucht werd zwischn am letztn oidn Drum bis ma d' Serienfertigung vom neichn Drum olaffa lossn ko.

S' ghead oiso as Abrüstn vo de vorherign Werkzeig und Vorrichtunga genauso dazua wia as Eibaun, Vamessn und Eifahrn vo de neichn Werkzeig und Vorrichtunga.

Rüstn muaß ma fia a Serie nua oa moi. Des is mid a Grund warum große Serien, oiso a Massnfertigung wirtschaftlich is. A aufwendigs Rüstn ko de Fertigungszeitn optimiern. Umkehrt kos bei gringe Stückzahln und Einzlstück günstiger sei, daß ma a oafache Maschin eisetzt, wo as Rüstn oafacha is, obwoi ma da ned des Einsparpotenzial fia de Fertigungszeitn hod.