Roland Girtler

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
Da Girtler Roland(2010)

Da Girtler Roland (* 31. Mai 1941 Wean-Ottakring) is a esdaraichischa Soziolog und Kuituaantropolog. Ea is bekaunt fia saine fün Biacha iwa soziale Raundgrupn und wai a oft im Feansen zan seng is, wo a ois oana fu de wenigstn Wissnschoftla öfentli im Dialekt ret.

Sai Lem[VE | Weakln]

Da Girtler Roland is 1941 in Wean, im 16. Hib, auf d Wød kema ois Bua fum schbedan Launddokda Dr. Roland Girtler und den saina Frau da Leopoldine, de a a Dokdarin woa. Sai Kindhaid hod a in Schbidoi am Bian, in Owaesdaraich, fabrocht, wo a a in d Foikschui gaunga is. Fum 1951a Joa bis 59 is a ins Gimnasium fum Glosda Gremsminsda gaunga, wo a a d Matuara gmocht hod. 1967 hod a zan Schdudian augfaungt an da filosofischn Fakuldet in Wean, wo a Etnologi, Uagschicht, Filosofi und Soziologi gmocht hod. Ois Schdudent hod a si a Zuabrod fadeant ois Biafiara, hod am Noschmoak goawat und woa Fümkompars. 1971 hod a sain Dokda in Filosofi gmocht und 1979 is a Brofessa auf da Hauptuni in Wean woan.

Ea is in Esdaraich recht bekaunt weng de fün Biacha de a gschrim hod, saine dailwais recht unkonvenzioneln Foaschungsmetodn und wai a weng saine Gschicht a oft im Feanseng bai Talkshows und Dischgria-Sendungen woa. Ea hod si mid da soziologischn Eafoaschung fum Lem fu Vagabundn bscheftigt, mid n Lem fu de kloan Bauan in friana Zaid und eanara oidn Schbroch. A bsondas Foaschungsdema fum Girtler Roland san a nu de oidesdaraichische Foiksgrupn fu de Landla in Rumenien.

Aunleslich fu saim 65a, is eam a d Festschrift "Die Wahrheit liegt im Feld" gwidment woan. Unta aundam is a a baim Corps Symposion Wien dabai, ana schlogendn Schdudentnfabindung de wo zum Kösener Senioren-Convents-Verband (KSKV) dazua ghead.

Sai Foaschung[VE | Weakln]

Am Aufaung fu de 70a Joa woar a in Indien auf Fødfoaschung untawegs, iwa de "demokratische Institution des Panchayat". Iwa des hod a im Joa 1971 a a Buach aussa brocht. Dano woar a in Indien a nu in Gudscharat (Gujarat) und in de Slams fu Bombay (haid Mumbai). Schbeda hod a si owa a mim Lem fu de bessa gschdöde bscheftigt, wia Arisdogratn und Bolitika. Wida dahoam woan saine soziologischn Foaschungsobjekt Wüdara und Jaga, d Raundgrupn in da Grosschdod, wia Huan, Sandla und Ganofn.

Schbeda hod a si mid n Lem fu de Beagbauan bscheftigt und Biacha driwa gschrim, genau so wia iwa Schmugla, Bolizisdn, Launddokdan und Glosdaschila. Oane fu saine unkonvenzioneln Foaschungsmetodn woa a, das a oiwai neta mim Radl untawegs is und duachs Laund foad. So hod a fü Laid kena gleand und dabai fia sai Foaschung reschaschian kina. Oane fu saine waidan Radlduan hod eam a noch Rumenien gfiad, wo a de im 18. Joahundat ausgwaundate esdaraichische Foiksgrupn fu de Landla kena gleant hod und schbeda fü iwa de gschrim hod.

Sai aktuels Foaschungsgebid is d Kultuasoziologi, soziale Raundgrupn und da Bauanschdaund in Esdaraich und Rumenien. Saine oagineln Fødfoaschungsmetodn san a in da akademischn Szene intressiad fafoigt woan. Unta aundam hod a a saine Metodn genau dokumentiad und fest gschrim, damid si Schdudentn und aundane Foascha drau hoidn kinan.

Sai Kariea[VE | Weakln]

Da Girtler Roland is haid aussaoadentlicha Brofessa am Insdidut fia Soziologi an da Weana Hauptuni. Zwischn 1973 und 1975 hod ar a auf da Mingana Uni untaricht. Said n Joa 2000 lait a s Musem fia „Wilderer im Alpenraum – Rebellen der Berge“, wos in Sankt Bangraz bai Hintaschdoda is, in dea Gegend fu Owaesdaraich, wo a sai Kindhaid fabrocht hod.

Auszaichnungen[VE | Weakln]

  • Esdaraichischs Eangraiz fia Wissnschoft und Kunst, I. Klass (2002)

Saine Publikazionen[VE | Weakln]

Beleg[VE | Weakln]