Siagsdorf

Der Artikl is im Dialekt Obaboarisch gschrim worn.

Siagsdorf
Basisdatn
Bundesland:	Bayern
Regierungsbeziak:	Obabayern
Landkroas:	Traunstoa
Koordinatn:	47° 49′ N, 12° 39′ O
Hechn:	615 m ü. NN
Flächn:	55,20 km²
Eiwohna:	8064 (31. Dez.. 2006)
Bevejkarungsdichtn:	146 Eiw. pro km²
Sonstige Datn
Postleitzoi :	83313
Vorwoi:	08662
Kfz-Kennzeichn:	TS
Gmoaschlissl:	09 1 89 145
Gmoagliadarung:	6 Ortsteile
Adress vo da Gmoavawoitung:	Rathausplatz 1 83313 Siagsdorf
Hoamseitn:	www.siegsdorf.de
Politik
Buagamoasta:	Thomas Kamm (UW)

Siagsdorf (amtli Siegsdorf) is a Gmoa mit 8.023 Eiwohna im Beziak Obabayern (Bayern) im Landkroas Traunstoa.

Erdkund

Siagsdorf liegt in da Planungsregion Südostoberbayern sidli vom Cheamsee.

Es existiern de Gemarkunga Eisenärzt, Hammer, Haslach, Hochberg, Obasiagsdorf, Untasiagsdorf und Vogling.

Gschicht

Siegsdorf im heitign Obabayern hod zum Rentamt Burghausen und zum Landgericht Traunstoa vom Kurfiarstntum Bayern ghert. Im Zug vo de Vawoitungsreformen im Kinereich Bayern san mit am Gmoa-Edikt vo 1818 de Gmoandn Oba- und Untasiagsdorf und aa Eisnärz und Voglingenstandn. De heitige politische Gmoa is 1934 ausm Zsammaschliaßn vo Oba- und Untasiagsdorf entstandn.

Eiwohnaentwicklung

Auf'm Gebiet vo da Gmoa san 1970 6.020 Eiwohna, 1987 dann 7.219 und im Jåhr 2000 8.023 Eiwohna zäit worn.

Zu de Einwohna ghörn natürli aa de Vereine. Dovo gibts in Siagsdoaf so vui, daß s ned olle do aufgführt wernd. Aba erwähnenswert is sicha, daß s alloa 5 Trachtenvereine im Gmeindegebiet gibt. In alphabetischer Reihenfolge: GTEV Eisenärzt: D´Arzter, GTEV Hammer: D´Sulzberger, GTEV Heutau: D´Heitauer, GTEV Hochberg: D´gmiatlichen Hochberger, GTEV Siegsdorf: D´Siegsdorfer. Außerdem natürlich FFWen in olle Ortsteile, Bienenzucht- und Gartenbauverein, Gewerbe- und Fremdenverkehrsvereine, Arbeiter-, Säger- und Krankenunterstützungsverein, Bruderschaften, Blechmusi, Sportverein mit ESC und oim wos dazuaghört, Bauerntheater und Bauernverbänd, Schützen, Kaninchenzuchtverein B 104, ..., insgesamt so an de 70.

Weil de wirtschaftliche Lage im Ort so guad is, wochst de Gmoa kontinuierlich und stabil. Trotzdem is aa do a gewisses "Aussterben" vo oide Beruf feststeibar: Im Ort werd nimma gschlacht und aa nimma bocha. Echte Bäcker und Metzga gibts aba no, grod liefan s vo Neukira bzw. Ruapading oo, bzw. beziang s Fleisch ausm Schlachthof (soweit i woas).

Politik

Buagamoasta is da Kamm Thomas vo da UW ois Nachfoiga vom Maier Franz (CSU).

De Gmoasteiaeinahmen warn im Jåhr 1999 umgrechnet 3513 T€.

Sengaswirdigkeitn

Museen

Siagsdorfa Mammut

• Mammutheum
• Sidostboarisch Naturkunde- und Mammut-Museum
• Pestsäule
• Thannhäuser

De Pestsäuln am Pfarrerberg is erricht worn, damit da Ort vor da Pest gschützt werd. Leida san de Buidln recht verweedert, aba ma ko no seng, daß da Hl. Rochus drauf is und da Hl. Sebastian. De Säuln is in da oban Heiftn vom Pfarrerberg, oiso an da Hauptstroß Richtung Inzell, rechterhand glei wenns gaach werd und da Fuaßgänga vo da Absenkung wieda auftaucht is. A bissl obahoib, so 20 Meta weita, is a glei a Marterl. Durt hod a Fuhrmo sei Lebn lossn miassn, weis de Roß ne dapackt ham mit de Baam hint drauf - und weils umgschmissn ham. Dees Buidl is steht gschützt und ma kos heit no guad seng.

Da Thannhäuser steht mitsamt seiner Lira aufm Brunn am Rathausplotz. Der mitteloiderliche Sänger und Verserlschmid kannt eventuell in Siagsdorf vorbei kemma sei, weil in seine Liada da Venusberg viakimmt. Und den gibts aa in Siagsdorf, und zwar in Untersiagsdorf. Weils Venusberg aba aa im sächsischen Erzgebirge gibt, is da Thannhäuser indirekt fia de Errichtung vonana elektrischn Weihnachtspyramide aufm Siagsdorfer Christkindlmarkt verantwortlich - natürlich erst seit da Zeit noch da Wende.

Bauwerke

• Kloasta Maria Eck
• Katholische Pfarrkira Siagsdorf

De Pfarrkira ist da heilign Muatta Gottes gweiht und hoaßt "Mariä Unbefleckte Empfängnis". Seit 200 Johr, oiso seit 1812, is de Pfarrei selbständig. Dazua ghörn neba etliche Kapeial usw. v.a. de Pfarrkuratie Hammer, de Kuratie Eisnarzt, d Filialkirch St. Johann (in da Heitau) und natürlich s´Kiral in Maria Eck von de Frankziskaner-Minoritn.

S´Bsundere an da Kira in Siagsdorf ist de Decknbemalung. Zum oana findn se durt lilane Embleme, mit Sprichal v.a. ausm oidn Testament inn Auszug. De Farbgebung (weiß und lila) und de kinstlarische Ausführung geitn ois oanzigartig. Zum andern is des Hauptdeckngemälde des größte zsammahengade, wo ma kennt im boarisachn Barock. Dargsteid is da Brand vo Traustoa am 22. August 1704, ois de Panduren de Stood niedabrennt ham. Domois is vo da Stoodkirch praktisch nix übriblibm, bis auf fünf Trimma, de heid no ollawei zum Besichtign han. Da Kopf vom Gekreizigtn an da Außnmauer ghört dazua. Er is mitgnumma wordn nochm Brand und in Woid an an Baam (sogt d´Schui) / in Daxnboch an an Obstbaam (sogn de Chiemgau-Blattl) oighängt worn. Durt hod da Baam, wora aufghängt war, a Rindn außn ume wochsn lossen, damit da Kopf vo insam Erlöser gschützt is. Den Kopf hamms na gfundn und auf Siagsdorf brocht - mitsamt da Rinck. Daß de Figur übalebt hot, guit ois Wunda, und deswegn hots nachad aar amoi a Woifahrt gebm. Da Brand und de Prozession auf Siagsdorf ume sand in dem Gemälde dargsteid.

Bis zur letztn Innenrenovierung is am Hochaltar a Buidl vom Ernst v. Dombrowski ghängt. Dort war de hl. Muatta Gottes auf ana Mondsichel stehad, mit Stern und Sunn übam Kopf drauf. Des Buidl war aba leider in am ned ganz guatn Zuastand - und außerdem hots übahapt ned in de barocke Kira eipaßt. Und deswegn iss an a Museum kemma und ma hot a barocks Altarbuidl stott dessen aufghängt, des äh do war. Drunter is in am Schrein s Heilig Haupt.

Erwähnenswert is aa de neie Orgl, de am 29.4.2012 mit am Pontifikalamt von H.H. Weihbischof Wolfgang Bischof eigweiht werd. Es is a Linder Orgl und ersetzt de oide, de zwar wundaschee war, aba an haufa Register ghobt hod, de klemmt ham, a zwickate Tastatur und a Werk, des mit 2 Sekundn Verzögerung erst ogsprocha hod. Dofia hot si v.a. der extrig gegründete Orgelverein eigsetzt, daß as Dorf a gscheide Orgl griagt.

Pfarrer is da Thomas Graf v. Rechberg, und da Diakon Hans Seipel heift eam. Vorgänger warn Pfarrer Dr. Dieter Gehrlein mit Pastoralreferent Martin Benker und do davor ganz alloa Pfarrer Josef Hartl mit seiner Schwester Mary ois Pfarrersköchin. Hochwürden, Herr Prälat Johannes Waxenberger steht zwar no auf da Internetseitn vo da Pfarrei, is aba leider am 25. Juni 2010 gstorm. Er hod in da Pfarrei sein Ruhestand verbrocht - wenn ma des übahapt so nenna ko. Nebst de reglmäßigen Sunntogsgottesdienste um 8e in da Friah, hod der Prälat aa dafia gsorgt, daß in Siagsdorf a Oidnheim baut und vo de Deitsch-Ordens-Schwestern betriebm wead. Er ruhe in Frieden.

Ökonomie und Infrastruktur

Ökonomie

Es håt 1998 nåch da amtlichn Statistik im Bereich vo da Land- und Forstwirtschaft 79, im produzierenden Gwerbe 1610 und im Bereich vom Handel und vom Vakehr 243 sozialvasicharungspflichtig Bschäftigte am Arbatsort gem. In sunstige Wirtschaftsbereiche warn am Arbatsort 599 Leit sozialvasicharungspflichtig beschäftigt. Sozialvasicharungspflichtig Bschäftigte am Oat håt's insgesamt 2568 gem. Im vaarbeitenden Gwerbe håt's 2 Betriebe, am Bau 17 Betriebe gem. Zudem håt's im Jåhr 1999 145 landwirtschaftliche Betriebe mit a landwirtschaftlich gnutzten Flächn vo 2410 ha, davo warn 286 ha Ackaflächn und 2123 ha Wiesn.

Üba de Region bekannt san de zwoa Mineralwassabrunnen Adelholzener Alpnquelln und Siagsdorfa Petrusquelln, und aa de Firmen Brueckner Maschinenbau GmbH, Nowofol und ECOLAB Engineering GmbH.

Buidung

Im Jåhr 1999 håt's de folgenden Eirichtunga gem:

• Kindagärtn: 225 Kindagartnplätz mit 226 Kinda
• Volksschuin: 1 mit 30 Lehra und 559 Schuikinda

Im Netz

Commons: Siagsdorf – Buidl, Videos und/oda Audiodatein

• Naturkunde- und Mammut-Museum
• Mammutheum
• Stoazeit Siagsdorf
• Der Finstermann - Roman iban Ort Siegsdorf
• Siagsdorf: Woppmgschicht vom Haus vo da Bayrischn Geschicht
• Pfarrei Siagsdorf
• Stadtbrand Traustoa in de Chiemgau-Blattln

Städde und Gmoandn im Landkroas Traunstoa

Anscharing | Bergn | Cheaming | Engeschberg | Fridolfing | Gråmstätt | Grassau | Inzell | Keanberg | Marquartstoa | Nußdorf | Obing | Oidnmarkt an da Oiz | Palling | Petting | Pittnhart | Reit im Winkl | Ruahpading | Schleching | Schnoatsee | Seeon-Seebruck | Siagsdorf | Staudach-Egerndach | Surberg | Tachading | Taching a.See | Tittmoning | Traunreit | Traunstoa | Troschtberg | Übasee | Untawössn | Vachadorf | Waging a.See | Wonneberg