Sid Meier

Aus Wikipedia
Wexln zua: Navigation, Suach
Der Artikl is im Dialekt Hausrukfiatlarisch gschrim worn.
Da Meier Sid.

Da Sid Meier (auf d'Wöd kema 1954 in Detroit, Michigan) is a amearikanischa Kombjutaschbü-Brogramiara fu dem a boa fu de bekauntastn Schdrategi-Schbü wia de Civilization-Searie schdauman. Nochdem a laung fia de Fiama Microprose goawat hod, hod a 1996 mid saine Kolegn, in Jeff Briggs und in Brian Reynolds, a aigene Fiama grünt, nemli Firaxis Games. Unta Kombjutaschbü-Fraind güt da Sid Meier haid praktisch schau ois Legendn. Haid duad a owa moastns neama söwa brogramian, sondan is fia s'Konzept und fia d'Ide fum Schbü zuaschdendi, wos ma in Amearika a Creative Director hoast.

Sai Lem[VE | Weakln]

Da Sid Meier hod in Michigan Gschicht und Infoamatik schdudiad und hod auf an Atari 800 zan easchdn Moi a weng zan umadumbrogramian augfaungd. Im 1981ga Joa hod a in Bill Stealey kena gleant, dea a schau a weng a Eafoarung mid Kombjutaschbü ghobt hod und gach drauf haum de zwoa d'Fiama Microprose grünt und augnfaunga aigane Iden fia Kombjutaschbü zan entwükin und zan famoaktn.

Bai Microprose han daun in Sid Meier saine bekauntasnd Schü aussa kema, wia Silent Service, Pirates!, Railroad Tycoon, Civilization und Colonization. De Schbü woan domois a grossa Eafoig, obwoi de domoling Kombjuta waid ned aso guad woan wia haid und a de Schbü desweng grafisch nu recht oafoch woan. D'Strategischbü fum Sid Meier woan owa recht guad konzipiad und woan a hisdoarisch recht genau und haum desweng an Haufn Fens ghobt. Drozdem is d'Fiama Microprose im 1994ga Joa in finanziele Schwiarigkaidn kema und is fu Spectrum HoloByte aufkauft woan. Auf des aufi is da Bill Stealey wega gaunga und zwoa Joa schbeda is a da Sid Meier wek.

Im 1996ga Joa hod da Sid Meier daun gemainsaum mim Jeff Briggs, am aundan Vetaran dea schau bai Civilization dabai woa, a naiche Fiama grünt, nemli Firaxis Games. Doat san daun noch lengara Zaid naiche Iden fum Sid Meier umgsezt woan und ois Kombjutaschbü aussa kema, wia Sid Meier's Gettysburg! und Sid Meier's Antietam!, de oi zwoa um Schlochtn im amearikanischn Biagakriag gengan. Schbeda han daun naiche Veasionen fu ödare Schbü aussa kema, de auf d'naiche bessane Kombjutadechnik aubasst woan und a de Gschicht waida ausbaud haum. Soichane Schbü fu Fireaxis han zan Baischbü Sid Meier's Alpha Centauri (1999), Sid Meier's Civilization III (2001), owa a s'naiche Sid Meier's Pirates! (2004) und Sid Meier's Railroads! (2006). S'ola naichasde Schbü fu Firaxis Games is Civilization Revolution, wos im Juni 2008 aussa kema soid und wida a Foatsezung fu da Civilization-Seria wean wiad.

Da Sid Meier lebt haid mid saina Frau, da Susan, und mid saim Buam, in Ryan, in Hunt Valley, Maryland. Saine Schbü haum oiwai nu an Haufn fu Fens und said 1999 is a sogoa ois zwoata Schbüentwikla iwahaupt in de Academy of Interactive Arts and Sciences' Hall of Fame aufgnuma woan. Da easchde woa da Japana Shigeru Miyamoto fu Nintendo. Im Jena 2008 hod aussadem de CMP Game Group bekaunt gem, das da Sid Meier an Lifetime Achievement Award griagt, dea auf da Game Developer's Conference iwaraicht wean soid.

Bretschbü Foabüda[VE | Weakln]

D'Ide fia a boa fu denane Schbü hod da Sid Meier fu Bretschbü ghobt, de fum Francis Tresham eafundn woan san und bai da Fiama Hartland Trefoil Ltd. aussa kema san. Es gibt zan Baischbü a Bretschbü des Civilization hoast und in da Grundschdrukdua so enlich is wia s'Kombjutaschbü fum Sid Meier, hoid neta ned aso komplex. S'Schbü Railroad Tycoon basiad auf'n Aisnbau-Schbü 1829 fum Tresham, wos a im Kombjutaschbü daunkboa augem wiad und a fia's Schbü Pirates!, wos d'Gschciht fu de Piaratn in da Karibik in da Kolonialzaid noch schbüd, gibt's a Bretschbü-Foalog de Spanish Main hoast. Nochdem d'Kombjuta-Veasionen fu de Schbü komeaziel recht eafoigraich woan han, hod's natiali Diskusionen gem wegam Copyright fu da uaschbringlichn Ide dazua und desweng hod Microprose a im 1998ga Joa d'Bretschbü-Fiama Hartland Trefoil Ltd. kauft.

Saine Schbü[VE | Weakln]

  • Floyd of the Jungle (1982), Jump'n'Run
  • Chopper Rescue / Air Rescue (1983), Actionsschbü
  • Hellcat Ace (1982), Flugsimulazion
  • Spitfire Ace (1983), Flugsimulazion
  • Solo Flight (1984), Flugsimulazion
  • F-15 Strike Eagle (1985), Flugsimulazion
  • Crusade in Europe (1985), Strategi-Schbü
  • Conflict in Vietnam (1985), Strategi-Schbü
  • Decision in the Desert (1985), Strategi-Schbü
  • NATO Division Commander (1985), Strategi-Schbü
  • Silent Service (1985), U-Boot-Simulazion im Zwoatn Wödgriag
  • Gunship (1986), Kaumpfhubschrauwa-Simulatoa
  • Pirates! (1987), Strategi- und Action-Schbü in da Piaratnzaid
  • Red Storm Rising (1987), U-Boot-Simulazion
  • F-19 Stealth Fighter (1988), Flugsimulazion
  • Sid Meier's Railroad Tycoon (1990), Wiatschoftssimulazion aus da Aufaungszaid fu Aisnbau
  • Sid Meier's Covert Action (1991), Strategi und Agenten-Adventure
  • Sid Meier's Civilization (1991), Strategi-Schbü
  • Sid Meier's Colonization (1994), Strategi-Schbü
  • Sid Meier's Civilization II (1996), Strategi-Schbü
  • Sid Meier's Gettysburg! (1997), Echtzaid-Strategi-Schbü ausn amearikanischn Biagakriag
  • Sid Meier's Antietam! (1998), Echtzaid-Strategi-Schbü ausn amearikanischn Biagakriag
  • Sid Meier's South Mountain! (199x), Echtzaid-Strategi-Schbü ausn amearikanischn Biagakriag
  • Sid Meier's Alpha Centauri (1999), Strategi-Schbü
  • Sid Meier's SimGolf (2002), Goif-Menedscha-Simulazion
  • Sid Meier's Civilization III (2002), Strategi-Schbü
  • Pirates!|Sid Meier's Pirates! (2004), naiche Veasion fum Piaratn-Klassika
  • Sid Meier's Civilization IV (2005), Strategi-Schbü
  • Sid Meier's Railroads! (2006), naiche Veasion fum Aisnbau-Klassika
  • Civilization Revolution (2008), dawai nu ned aussa kema

Im Netz[VE | Weakln]