Sturmi

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.

Da hailige Sturmi, a Sturmius oda Sturm gnend (* um 705 woaschainli in Lauriacum, Owaesdaraich; † 17. Dezemba 779 in Fulda) woa a bajuwarischa Adeliga, Schüla fum Hailign Bonifaz, Mönch und Missionar bai de Saxn und Frisn und is da Gründa fum Glosda Fulda in Hessn, fu dem a da easchde Obt woa. 1139 is a fum Bobst Inozenz II. hailig gschbrocha woan.

Sai Lem[VE | Weakln]

Da Sturmi woa a bajuwarischa Mönch, dea woaschainli aus Lauriacum/Loach baim haidign Enns in Owaesdaraich hea woa und mid da bajuwarischn Heazogsfamilie fu de Agilolfinga fawaunt woa. Des is owa haid aus de Beleg neama mid lezda Sichahaid bewaisboa. Ois sai Gebuatsjoa wiad maistns 705 augem, maunchmoi a 720 oda kuaz dafoa.

Ois junga Mau hod a auf jedn Foi ums Joa 735 in Hailing Bonifazius, an angl-segsischn Missionar, kena gleant und si eam augschlossn und is ins Glosda Fetzlar im haidign Hessn zua Ausbüdung bain Obt Wigbert gschikt woan. Doat in da Gegend hod a 736 de Ainisidelai Haerulfisfeld (haid Bad Hersfeld) grünt und is 739 oda 740 zum Pfoara gwaid woan [1].

Gründung fu Fulda[VE | Weakln]

Wai de bajuwarische Hoamad fum Sturmi zu deara Zaid schau grisdianisiad woa, is a 744 fum Bonifaz beaufdrogt woan, in da Gegend fu Eichloha imheitingHessn a Glosda zan gründn. Da Grund rund um des naiche Glosda woa a Gschenk fum frenkischn Hausmoa (maior domo) Karlmann an dn Hailing Bonifaz. In de Ruinen fu am oidn kiniglichn Hof, dea ungefea 50 Joa dafoa fu de Saxn zaschdead woan is, hod da Sturmi an da Fuat iwa de Fulda des naiche Glosda earicht.

Roas noch Italien[VE | Weakln]

In de Joa drauf woa da Sturmi fu 747 bis 748 in Italien um doat de Mönchsregln fum Hailing Benedikt fu Nursia zan schdudian. Ea woa im Glosda am Monte Cassino, im ødastn Benediktina-Schdift und danoch a nu in Rom baim Bobst, fu dem a diarekt ois Obt fum naichn Glosda Fulda aigsezt woan is. Da Bobst Zacharias hod a d Benediktina-Obtai Fulda diarekt im Vatikan untaschdöd (Exemtion), wos schbeda nu fia Konflikt mim Bischof fu Mainz gsoagt hod [2], [3]

om: da Bonifaz bai da Dauf fu Haidn, unt: da Bonifaz wiad fu Frisn daschlong

Dod fum Bonifaz[VE | Weakln]

Da Plan fias Glosda Fulda woa, das des a Zentrum fu da grisdlichn Missioniarung fu de Saxn wean soid. Da Bonifaz is owa schau boid drauf im Joa 754 baim Fasuach d Frisn im niadan Laund zan Grisdndum zan missionian, fu denan daschlong woan. Daduach hod da Sturmi sain ainflusraichn Mentor faloan und da Bischof Lullus fu Mainz wia a da Bischof fu Ütrecht haum d Unobhengigkait fum Glosda Fulda in Frog gschdöd. Da Obt Sturmi hod si owa so waid duachsezn kina, das d Laich fun Bonifaz in Fulda begrom wiad. Daduach is des Glosda a Woifoatsoat woan, sogoa fia Pilga aus da angl-segsischn Hoamad fum Bonifaz. [4]

Intrign geng eam[VE | Weakln]

Im Joa 763 hod da Bischof Lullus fu Mainz in Pipin den Jingan, in naichn Kini fu de Frankn, iwazaigt, das a in Sturmi obsezt und Fulda eam untaschdöd. [5] Auf des aufi woa da Sturmi zwoa Joa im Exil in da Normandi, bis a 765 rehabilitiad woan is und ois Obt noch Fulda zruk ghoidn woan is. 774 is des Glosda sogoa untan diarektn Schuz fun Pipin sain Nochfoiga, in Koal in Grosn, gschdöd woan.

Saxn-Mission[VE | Weakln]

D Missioniarungsfasuach bai de Saxn san in da Zwischnzaid ned bsondas eafoigraich gwen, foa oim a wai d Franken untam Pipin und a untam Koal in Grosn iwa 30 Joa an brutaln Griag geng eana gfiad haum. Wia da Koal da Grose ausn Laund fu de Saxn wida ozong is um in Sidfraunkraich geng de islamischn Mauren zan kempf, hod s glai wida a Rebelion fu de Saxn gem und d Missionare han a fadrim woan.

779 is da Koal da Grose zruk in da Gegend gwen und hod de rebelischn Saxn a naichs Moi besigt. Bai dem Fødzug woa da Sturmi peasönlich dabai, is owa gach drauf graung woan und am 17 Dezemba 779 in Fulda gschdoam.

Um 796 hod da Eigil, in Sturmi sai Nef und fiata Nochfoaga ois Obt fu Fulda, d Lemsgschicht fum eam aufgschrim und a d Dradizion fu de Faialichkaidn zu saim Dodesdog aigfiad.

Gschichtliche Bedaitung[VE | Weakln]

  • Da Hailige Sturmi güt haid ois Apostl fu de Saxn, a waun a ned bsondas eafoigraich woa bai da Missioniarung fu denan, aus aungebane Gründ. Saine Reliquien wean gemainsaum mid denan fum Hailing Bonifaz nu oiwai in Fulda aufbewoad und sai Dodesdog woa laung a Faiadog bai de Benediktina in Fulda, Padaboan und Wiazbuag, owa a bai de Benediktina-Glesda in saina boarischn Hoamad.
  • Duch de Fabindung zan Hailing Bonifaz, dea aigentli aus Englaund woa und Winfrid oda Wynfrith ghoassn hod, und eanare gemainsaumen Missioniarungsfasuach bai de Saxn und Frisn, woan de zwoa a fia d Kiacha in Englaund wichtig und wean haid nu faead, sowoi fu da katholischn ois wia a fu da anglikanischn Kiach.
  • Es is a de Famutung aufgschdöd woan, das de Intrign gengan Sturmi im Joa 763 mid n Konflikt fum bajuwarischn Heazog Tassilo III. mim Koal in Grosn zaumhengt. Genau in dem Joa is nemli da Schdraid zwischn denan ausbrocha und da Tassilo hod si gwaigat mid de Frankn in an Griag geng Aquitanien zan ziang. Da Sturmi, dea jo a a Bajuware woa, soid beschoidigt woan sai, das a mea zan Tassilo ois wia zu de Fraunkn hoit. De Teori schdaumt fum Hisdoarika Ludwig Oelsner [6]
  • Da Hailige Sturmi eaklead a de enge Fabindung fum Glosda Fulda zua bajuwarischn Region, bsondas in da Zaid fu da Gründung. Des is a a Indiz dafia, wia im Glosda Fulda a Dext entschdee kina hod, dea gmischt Oid-Segsisch und Oid-Boarisch is, nemli s berümte Hildebrandsliadl.


Beleg[VE | Weakln]