Thomas Vanek
Aus Wikipedia
 |
Der Àrtikl is im Dialekt „Owaöstareichisch“ gschriem worn. | |
Da Thomas Vanek (geboan am 19. Jänna 1984 in Badn bei Wien) is a östareichischa Eishockespüila, dea wås momentan in da noadamerikanischn Profiliga NHL fia'd Mãnnschåft Buffalo Sabres spüid. Im Joa 2007 is a åis Sportla vum Joa vu Östareich auszeichnt woan.
Inhoitsvazeichnis |
[dro werkln] Vum Flüchtlingskind zum NHL-Spüila
Da Thomas Vanek is zwoa Joa nåchdem seine Öitan (da Våda a Tschech, d'Muata a Slowakin) aus da Tschechoslowakei gflücht san in Badn bei Wien auf'd Wöid kemma. Aufgwåxn is a in Zöi ãm See und Graz, wo sei Våda, da Zdeněk Vanek (aa a Eishockespüila) sein Varein ghåbt håd.
Mid 14 Joa is a im 98a-Joa in'd USA gãnga, wo a sei Karriere bei da Sioux Falls O'Gorman Highschool (Sioux Falls Stampede) in da Uni-Liga USHL gstart håd. In seim letztn Joa duat håd a in 53 Spüile 91 Punkte gmåcht (davã 46 Goi); damid håd a d'Toaschütznweatung vu da gãnzn Liga gwunga und außadem woa a damid drittbesta Voalånggeba. Schãu im Joa (2001) davoa is a in'd östareichische Junioanmãnnschåft fia'd WM aufgstöid woan und duat glei zum bestn Stüama gwöihd woan. 2002 is a åis easta Eiropäa zum Varein vu da University of Minnesota kemma.
2003 hãm dn dãun de Buffalo Sabres bei de Entry Drafts in da eastn Rundn åis fümftn Spüila ausgwöihd. 2003 und -4 håd da Vanek wieda bei da Junioan-WM midgspüid. 2004 is a s'easte (und bis iatst anzige Måi) bei ana A-Wöidmoastaschåft dabei gwesn, wo a in 6 Spüile 2 Goi und 5 Voalång zsãmmbråcht håd. In da Zwischnzeid håd a bei seim Varein in Minnesota in 2 Joa 113 Punkte daglãngt und is da 73. Spüila vu da Uni woan, dea a dreistöllige Punktezåih zsãmmbråcht håd. 2004/05 is a in'd AHL kemma zu de Rochester Americans, fia de a in 79 Spüile 73 Punte vazeichnt håd, wås da zweitbeste Weat vu da Liga gwesn is. D'Saison drauf håd a in Sprung in'd NHL gschåfft, wo a bei de 82 Partien im Grundduachgãng netta oa Måi ned midspüin håd deafn.
[dro werkln] Vum Neiling in da Liga zum bestvadeanadn Eishockespüila vu da NHL
In dea eastn Saison in da NHL is a auf 25 Goi und 23 Voalång kemma, håd åwa im Playoff nåch'm Grundduachgãng weng seine nimma so konstantn Leistungen netta netta 10 Måi spüin deafn. In de zehn Spüile håd a åis easta Östareicha üwahaupt a Goi im NHL-Playoff gschossn, nämli ãm 28. Aprüi 2006 geng de Philadelphia Flyers.
In seim zweitn Joa bei de Sabres håd a glei zu de bestn Spüila vu da gãnzn Liga gheat: Åis easta Östareicha und åis easta vu seina Mãnnschåft seid 1980 håd a d'Plus-Minus-Weatung gwunga, mid 30 Goi bei de Heimspüile woa a da beste Toaschütze im eingnen Stadion. Außadem woa a mid 43 Goi da beste vu de Sabres und da fümftbeste vu da Liga. Mid seim Klub håd a de eastn zehn Spüile vu da Saison ålle gwunga, womid's an Rekoad vu de Toronto Maple Leafs eigstöid hãm. Ãm 9. Dezemba håd a åis east zweita Spüila in da Gschicht (nåch'm Brian Rolston) im Penaltyschiaßn mid am Schlågschuss troffn. Schlussendli is a in's NHL Second All-Star Team gwöihd woan und sei Mãnnschåft håd in Grundduachgãng gwunga.
Wia im Voajoa is sei Varein in's Conferenence-Finale kemma. In dem Joa håd da Vanek in jedm Spüi mitmåcha deafn und is auf 6 Goi und 6 Voalång kemma; s'große Züi, in Stanley-Cup, hãm's åwa vaföihd. Im Juli 2007 is da Vanek zu am Restricted Free Agent woan, worauf eam de Edmonton Oilers an 7-Joas-Vatråg um 50 Millionen US-Dolla ãubotn hãm. Seine Sabres hãm åwa s'Voarecht ghåbt, eam zude söibn Kondizionen zum ghoidn, wås's aa dãu håm. Damid is da Vanek da bestvadeanade Spoatla vu Östareich woan und fia a Zeidl (so de Spüilagweakschåft NHLPA) da mid'm Daniel Brière und am Scott Gomez bestvadeanade vu da Liga. 2007 is a außadem åis easta Eishockespüila zum Spoatla vum Joa vu Östareich auszeichnt woan.
Im eastn Joa mid am Millionenvatråg håd's da Vanek zwåa zum eastn Måi in seina Karriere in da NHL ned in's Playoff gschåfft, håd åwa wia im oa davoa ålle Spüile im Grundduachgãng absolviad und am 12. Februa 2008 åis easta Östareicha in da Liga an Hattrick gschossn. Im Rest vu da Saison san nu drei weidare Hattricks dazua kemma und außadem sei hundatsts Goi in da Liga. Seine 36 Goi, de 19 Goi in Üwazåih und seine 9 Siegestoare woan wieda da beste Weat vu de Sabres.
Weu a de Playoffs vapasst, håd a dafia s'easte Måi seid längara Zeid de Möglichkeid ghåbt fia'd östareichische Nazionalmãnnschåft bei ana WM midzspüin. Desweng woa a in Innsbruck bei da B-WM dabei und håd beim Wiedaaufstieg in'd A-WM midghoifn.
[dro werkln] Privats
Ãm 16. August 2007 håd im Thomas Vanek sei Freindin, d'Fiance Ashley Karner, a Baby kriagt, des wås's Blake Thomas Vanek gnennt håm. Im Summa 2008 mechtn da Thomas und d'Ashley heiratn.
[dro werkln] Weblinks
- Sei offizielle Intanetseitn
- Da Vanek in da hockeydb.com
- NHL.com: Spielerprofil
