Trondheim
| Der Artikl is im Dialekt Niedaboarisch gschrim worn. |
Trondheim?/i is de drittgreßte Ståd in Norwegn. Es wohna 169.000 Leit da und nomåj mehr ois 10.000 Studenten.[1] Fej Leit sågn, dass Trondheim in da Mittn vo Norwegn liegt, aber eigentlich lieg's oiwaj no fast im südlichan Drittel. Aber dannach kimmt hålt nimmer vej.
Trondheim liegt ned direkt am Atlantik, sondern am Trondheimfjord. De Hurtigruten fahrt aa immer nach Trondheim und bei de Turistn is de Ståd recht beliebt.
Inhoitsvazeichnis |
Gschicht[dro werkln]
Trondheim is de erste Hauptståd vo Norwegn g'wen. Da Wikinger Kini Olav Tryggvason hod's 997 n.Chr. gegründet. Dreissg Jåhr späta is a anda Kini, Olav II (Óláfr Haraldsson) 1030 in da Schlacht vo Stiklestad g'storbn und sei Leich is nach Trondheim bracht wordn. Då, wo er begrabn worn is, is as Wasser vo oaner Quelle pletzlich bsunders g'worn und Kranke san wieder g'sund worn. Da hot ma dann an dera Stej a Kirch baut. [2] Den Dom gibt's immer no, des is da Nidarosdom. Deswegn werd da Olva II aa Heiliger Olav (Óláfr hinn helgi) g'nennt. [3] In dem Dom san de meistn Kini vo Norwegn gekrönt wordn und werdn's aa heit no (letzta war da Kini Harald V 1991)[4]
Trondheim hod aa ganz lang Nidaros g'hoaßn, wei da Fluss Nidelva (Nid-Fluss) hoaßt. [5]
Unviseritätsståd[dro werkln]
Trondheim wird aa Universitätsståd g'nennt, wei de a Uni håbn. Friaras håbn's zwoa g'håbt: a technische (NTH - Norges tekniske høgskole) und a geisteswissenschaftliche (AVH - Allmennvitenskapelige høgskole).
1996 håbn se de zwoa Unis zam doa und jetzad hoaßn's NTNU (Norges teknisk-naturvitenskapelige universitet = Norwegns technisch-naturwissenschaftliche Uni). Des Konservatorium und de medizinische Fakultät sand då aa dabei. Des is jetzad de zwoatgreßte Uni vo Norwegen.[6] Wei de Unis friaras åber ned alle zam g'wen san, san de heit aa no in da ganzn Ståd verteilt.
Es gibt aa immer no a Hochschui, des is de HiST (Høgskolen i Sør-Trøndelag). De is wiar bei uns a Fachhochschui.
Oidståd[dro werkln]
De Oidståd vo Trondheim werd "Bakklandet" g'nennt, des hoaßt übersetzt: Hügelland, wei's da an Berg zur Burg auffe geht. Vom Zentrum is durch'n Nidelva Fluss getrennt, und es gibt drei Bruckn de wo vom Zentrum zum Bakklandet gengan.
Im Bakklandet gibt's a Pflastertraß, da fahrt's se ned so guat und auf'd Nåcht derfan gar koane Autos ned fahrn. Alle Haiser san Hojzhaiser und schee bunt g'stricha. Aber aa in da Ståd drinna gibt's no sojche oidn Haiser.
Es gibt aa an Fahrradlift, der is a rechte Attraktion, wei der as Radl an Berg auffe ziagt. Ma muass nua in an Bügel eine stejn und sejba nach laffa.
Obn auf'n Berg steht no aa bisserl was vo da Burg. Des is a weiß Haisal mit kloane Fenster. Bsunders schee is neda. Ansonstn san grod no de Schützngrabn da und aa paar Stoa Kanonan stengan rum. Aber de "Kristiansten festning" is a ganz a guada Platz zum Picknickn und Frisbee spejn.
Umgebung[dro werkln]
De Norweger gengan recht gern in'd Natur ausse und vo Trondheim is gar ned weid. Im Westn gibts a ganz a groaß Gebiet, des wo se Bymarka hoaßt. Des is ned mehra ois a paar ned so hoahe Berg, Wojd und Moor. Aber im Winter is supper zum Langlaffa und im Summer ko ma guat Wandern geh. Da Bus und de Tram brauchan koane 20 Minutn hi und für Familien is des ideal.
Im Südosten is de Estenstadtmarka, de is recht des sejbe, aber mehra Wojd und ned so groaß. Für'n Winter gibts aber recht vej Loipen de wo a Liacht hobn, wej's då ja scho nach'm Mittag finster werd.
Es gibt aa no de Munkholmen Insel. De liegt im Nordn, im Trondheim-Fjord drin. Des is friaras a Kloster g'wen, nåchad a Gfengnis und jetzad is gråd a Museum und Badestrand. Des is aber mehra wås für Turistn.
Språch[dro werkln]
In Norwegn gibt's ja zwoa offizielle Språchn, as Bokmål und as Nynorsk. In Trondheim werd as Bokmål hergnumma. Aber de håbn aa an recht an Dialekt då, der wo Trøndersk g'nannt werd. Des ganze Gebiet då hoaßt nämlich aa "Trøndelag".
As Trøndersk is in Norwegn aa bisserl a so wia in Deutschlånd as Boarische, wei de aa Wörter gern kiazer måchan und manche Laute anders san. Und de åndern Norweger sågn oft, dass ma as Trøndersk ned so guat versteht und de rechte Bauern san.
Beleg[dro werkln]
- ↑ [1]www.trondheim.no - Trondheim today, Datum: 2. Juni 2010
- ↑ [2]Wikipedia: Battle of Stiklestad
- ↑ [3]Wikipedia: Olaf II of Norway
- ↑ [4]www.trondheim.no - Trondheim today
- ↑ [5]Wikipedia: Nidaros
- ↑ [6]Wikipedia: Ntnu (no)
Im Netz[dro werkln]
Commons: Trondheim – Oibum mit Buidl, Videos und Audiodateien- Webseitn vo da Ståd (norwegisch, englisch)
- Webseitn vo da Trondheim Kommune (norwegisch)
- Norges Teknisk-Naturvitenskapelige Universitet (NTNU) (norwegisch, englisch)
- HiST: Sør-Trøndelag University College (norwegisch, englisch)
