Venus fu Wilndoaf

Aus Wikipedia
Wexln zua: Navigation, Suach
Der Artikl is im Dialekt Owaöstareichisch gschrim worn.
d Venus fu Wilndoaf

D Venus fu Wilndoaf, haid a ois Frau fu Wilndoaf bezaichnet, is a 11,1 cm hoche kloane Statue fu ana wiablichn Figua. Se is 1908 in Wilndoaf in Nidaesdaraich baim Bau fu da Donau-Ufa-Aisnbau fum Archeologn Josef Szombathy gfundn woan. D Statue is aus da Oid-Schdoazaid (Paleolithicum) und is aus gøbn Koikschdoa (Oolith) gschnizt woa, den s doat in da Gegend gibt, und mid ana rodn Oka-Foab bemoid gwen.

Nochn Fund fu deara Statue hod ma nu a boa recht enliche Statuetn und aundane Fundschdikl doat entdekt. Soichane Frauenfiguan aus da Oid-Schdoazaid wean haid ole midanaund ois Venusfiguarinen bezaichnet.

Uaschbrung[VE | Weakln]

Nochdem ma im Joa 1990 naiche stratigrafische Bodnanalisn fu da Fundschdö gmocht hod, wiad de Venus fu Wilndoaf haid auf 24.000 bis 22.000 Joa foa Grisdus datiad. [1] Ma woas owa oiwai nu recht weng iwa ian genaun Uaschbrung, d Metod wias gmocht woan is und wos de Figua fia kultuarele Bedaitung ghobt hod.

D Venus is a ned realisdische sondan idealisiade Doaschdölung fu ana waiblichn Figua. Ia grosn Busn, ea gschwoina Bauch und ia Venushügi (mons pubis) san bsondas auffellig und kintadn auf a Fruchtboakaidssimbol hiidaitn. Iare kloan Oam san iwa da Brust faschrenkt und si hod koa wiaklichs Gsicht, dafia is ia Kobf mid groasföamige hoarizontale Bandl gschmükt, wos a bsondare Frisua sai kintad. [2] Des dass koa Gsicht hod is fu a boa Archeologn und Filosofn so intabretiad woan, dass d Venus fu Wilndoaf d "Uamuata" unda "Univeasele Muata" doaschdön soid. Des is owa umschdridn.

Da Naum Venus[VE | Weakln]

Da Schbiznaum fu deara Figua, den d Archeologn 1908 dafia eafundn haum, faglaicht d Venus fu Wilndoaf mid klassische Venus Schdatuen aus da antikn Zaid, wos owa haidige Foascha schdoak aunzwaifln und liawa an aundan Naum dafia hom mechadn. Da amearikanische Foascha Christopher Witcombe sogt zum Baischbü, das de iaronische Bezaichnung fu deara Figua ois Venus de foischn Foauatail fu de domolign Archeologn und Wissnschoftla iwa d Kultua in da Schdoazaid widaschbiagit und haid sicha neama so bezaichnet wean darad. Zitat:

"The ironic identification of these figurines as 'Venus' pleasantly satisfied certain assumptions at the time about the primitive, about women, and about taste," Christopher L. C. E. Witcombe, 2003.

Intabretazion[VE | Weakln]

D Fiass fu da Schdatue san aso gmocht, dass ned drauf schdee kau und desweng is a schbekuliad woan, das de Figua eha dafia docht woa, das ma s in da Haund hoit und ned neta fu da Waidn auschaud. Da genaue Zwek fu deara Schdoaschnizarai is owa oiwai nu a unkleade Frog unta de Wissnschoftla.

Da Catherine McCoid und da LeRoy McDermott haum a d Hipotesn aufgschdöd, das d Figua ois Søbst-Poatre gmocht woan is. Aundane Foascha haum festgschdöd, das d Figua aigentli noch untn schaud und desweng koa Gsicht zan seng is. Des gemainsaume fu ole Venusfiguarinen is, dass an schmoin Owakeapa haum, waid iwadriwane Busn, an grosn Hintan und broade Schönki und an grosn Bauch, dea filaicht auf a Schwaungaschoft hiidait. Aussadem komisch obogane Haxn mid unbropoazional kloane Fiass.

Waun des owa a Söbst-Poatre sai soid, kintad des fu da Peaspektifn do wida schdima, wai fia a schwaungane Frau ia aigena Keapa fu om gseng wiakli aso ausschaud. Es gibt schdoake Enlichkaidn zwischn ole fu de Venus-Figuarinen und ana schwaungan Frau fu om gseng.

Natuahisdoarischs Museum[VE | Weakln]

D Venus fu Wilndoaf (Venus I) is haid im Natuahisdoarischn Museum in Wean. Launge Zaid hod ma doat neta a Kopi öfentlich seng kina, wai dea Fund ois so unglaublich weatfoi augseng woan is. Eascht said dem nochn lezdn Umbau a schbeziele Tresoa-Vitrin inschdaliad woan is, kinan d Bsuacha sogoa s Oaginal seng.

Aussadem san an da Fundschdö fu da Venus I a nu aundare enliche Figuan gfundn woan (Venus II und Venus III), de a doat ausgschdöd san.

Enliche Fund in Airopa[VE | Weakln]

aundane Fundoate aus da frian Schdoa-Zaid (Paleolithicum)
blau san de fu Gletscha und Ais bedektn Regionen fu Airopa in deara Zaid

A in aundane Gegendn fu Airopa san Fund aus da frian Schdoa-Zaid gmocht woan, de da Venus fu Wilndoaf dailwais recht enlich han. Zum Baischbü:

  • d Venus fu Balzi Rossi (Italien)
  • d Venus fu Berekhat Ram (Golan)
  • d Venus fu Bouret' (Sibiarien)
  • d Venus fu Brassempouy (Fraunkraich)
  • d Venus fu Dolní Věstonice (Mean/Tschechai)
  • d Venus fu Gagarino (Ukraine)
  • d Venus fu Galgenberg (Nidaesdaraich)
  • d Venus fu Grimaldi (Italien)
  • d Venus fu Laussel (Fraunkraich)
  • d Venus fu Lespugue (Fraunkraich)
  • d Venus fu Kostienki (Ruslaund)
  • d Venus fu Mal'ta (Sibiarien)
  • d Venus fu Savignano (Italien)
  • d Venus fu Tan-Tan (Maroko)

Beleg[VE | Weakln]

 Commons: Venus of Willendorf – Oibum mit Buidl, Videos und Audiodateien