Watzmo
| Der Artikl is im Dialekt Obaboarisch gschrim worn. |
Koordinaten fehlen! Hilf mit.
| Watzmo | |
|---|---|
 Watzmo, im Vordagrund de Kirchturm vo Berchtsgoan |
|
| Heh | 2.713 m i. NN |
| Loge | Deutschland (Bayern) |
| Gebirg | Berchtesgoana Alpn |
| Easchtbesteigung | im August 1800 vom Valentin Stanič |
| Normalweg | vom Watzmohaus (47° 34' 16" N, 12° 56' 3" O) |
 Watzmo-Ostwand |
|
Da Watzmo (standarddeitsch: Watzmann) is as zentrale Bergmassiv in de Berchtsgoana Oipn. Er liegt im Sidostn vo Obabayern im Nationalpark Berchtsgoan in de Gmoandn Ramsau und Schönau am Kenigssää. Des bekannte Massiv håt sein Kulminationspunkt in da Watzmo-Mittlspitzn, de mit ihre 2713 m Hächn aa da hächste Punkt vom Landkroas Berchtesgoana Land is. Vo da bekanntn Osicht vo Berchtesgoan aus, mitm „Großen Watzmo“ rechts und am „Kloana Watzmo“ (Watzmoweibi) zua Linkn, dazwischn de Watzmo-Kinda, kimt de Watzmosagn. De Watzmo-Ostwand guit ois d'hächste Wand vo de Ostoipn.
Inhoitsvazeichnis |
Gipfen [dro werkln]
Iwan Watzmograt is de Mittelspitzn (2713 m, Hauptgipfe vom Watzmo) mit da Sidspitzn (2712 m, friara aa: Schönfeldspitzn) und am Hocheck (2651 m) verbundn. Obgseng vo dene drei dominierenden Erhebunga san vor allem da Kloane Watzmo („Watzmoweibi“, 2307 m) und de Watzmokinda bekannt.
Da Watzmo is noch de Gipfen vom Hochkenigstock (bis 2941 m) de hächste Erhebung vo de Berchtsgoana Oipn, de wo zu de närdlichn Koichoipn zäin. Da Zuagang erfoigt meist vo Nordn, vom Ramsauer Ortstoal Wimbachbruckn oder aus da Hinterschenau vom Parkblotz Hammerstiel iba as Watzmohaus (1928 m). Ramsau bzw. Schönau lieng ois Talorte iba 2000 Hächnmeta untam Gipfe – damit woast da Watzmo fia de Ostoipn a recht a bemerkenswerte Hächndifferenz af, de wo sogar oipnweit oft nur vo Viertausenda iwatroffa werd.
De Watzmosogn [dro werkln]
Haifig auf Fotos und Buidl zoagt werd de Osicht vom Nordn; vo links nach rechts sigt ma r as Watzmoweibi, de Kinda und an Großn Watzmo (der aus de Haptgipfen besteht) ois nemanander aufgreihte „Familie“. Da Sog nach is des Land friara vom grausama Kenig Waze oda aa Wazemo beherrscht worn, der mit seim Weib und de Kinda Furcht und Schrecken vabroadt hod. Wiara a Bauernfamilie mit seine Rässa dastampft hod, hodn de Baierin vafluacht, daß da Herrgott eam und sei Familie zum Stoa vawandln soi. Danach hod si d Erdn afdo, Feia gspuckt und an Keni und sei Familie zu Stoa vawandlt.
Ludwig Ganghofer hod Motive vo da Watzmosagn für sein historischn Roman Die Martinsklause hergnumma.
Alpinismus [dro werkln]
De Mittelspitzn is wahrscheinli im August 1800 erstmois vom Slowenen Valentin Stanič erstieng worn, aa wenn andane Quelln bereits 1799 ois Joor vo da Erstbesteigung nennan. De erste Ibaschreitung vom Großen Watzmo (Hocheck, Mittelspitzn, Sidspitzn) is 1868 vom Ramsauer Bergfiara Johann Grill, am Kederbacher, und Johann Punz durchgeführt worn. De zwoa ham aa an Gipfe vom Kloana Watzmo im Joor 1852 ois erschte dastiegn. De Watzmo-Ostwand is ebmfois as erschte Moi 1881 vom Johann Grill durchstieng worn.
Watzmoibaschreitung [dro werkln]
Oane vo de lohnendstn und eindrucksvollstn Gratibaschreitunga vo de Ostoipn is de Übaschreitung vom Watzmo, kurz „Watzmoibaschreitung“ ghoaßn. Dabei wern de drei Gipfen vom Haptkamm, Hocheck, Mittlspitzn und Sidspitzn vo Nordn nach Sidn übaschrittn. In da Regel werd de Tour so durchgfiahrt, daß ma am ersten Tog vom Toi (d Wimbachbruckn, da Parkplotz Hammerstiel, de Kenigssee-Rodelbahn oder St. Bartholomä kumman ois Ausgangspunkt in Frag) zum Watzmohaus (Alpenvereinssektion Minga, 1928 m, 169 Schlafplätz, oft voi belegt) aufsteigt, da dann übernacht und am nächstn Tåg de Überschreitung ogeht.
Vom Watzmohaus wandert ma zerscht zum Hocheck auffe, übawindt na an exponierten und ziemlich langa Grat (d hechste Erhebung is de Mittelspitzn) und erreicht dann d Südspitzn. Vo da Südspitzn, wo da Grat endt, führt a gacher Weg durch recht beeindruckende alpine Landschaftsformen abi ins Wimbachgriaß, an groussn Schuttstrom, auf dem ma auf aram oafacha Wanderweg parallel zum Watzmostock wieda nach Nordn in d Zivilisation zruckwandern ko. Alle Etappn zsamgrechnet braucht ma in ebba 12 bis 17 Stunden reine Gehzeit.
Bis zum Watzmo-Hocheck verlangt da Weg nur sejtn de Zuhilfenahme vo de Händ und is fia an jedn konditionsstarkn Bergwandara ohne gressare Probleme zum moastern. Am Hoacheck-Gipfe werd's aba schwieriga. De Moakiarunga fiahn knapp untahalb, manchmoi aa direkt auf da Gratschneid üba de Mittel- zur Sidspitzn, oft mit sognhafte Ausblick direkt in de Ostwand und zum Kenigssää abi. Durch de vuin Begehungen san de Felsn ziemli speckig und entsprechend rutschig.
Watzmo-Ostwand [dro werkln]
Hächste Wand vo de Ostoipn? [dro werkln]
De Ostwand vo da Watzma-Sidspitzn, auch Bartholomäwand ghoaßn, is oane vo de berihmdasten und bekanntasten Fäiswändt vo de Oipn. Obs aa de hächste Ostalpnwand is, is umstrittn, af jeden Foi san 1800 Meta Wandhächn, de wo in da Literatur oftmois vorkeman, niedriga wia de 1900 Meter, de da Alpenvareinsfiahra „Julische Alpn“ fia de Westwand vom Montasch (2754 m) oogibt. Es stejt si de Frog, was no ois Felswand und was „nur“ ois Steilflankn bezeichnet wern ko. Mit Sicherheit ibertrifft de Watzmo-Ostwand d Nordwand vom Hochstadel (2680 m) in de Lienzer Dolomiten (ca. 1300–1400 Meter Wandhech), d Sidwand vom Birnhorn (2634 m) in de Leoganger Stoaberg (ca. 1400–1500 Meter Wandhech) und de Nordwand vom Triglav (2864 m) in de Julischen Alpn (ca. 1500 Meter Wandhächn) und is – vialleicht nach da Montasch-Westwand – mindestens de zwoathächste Wand vo de Ostoipn.
Anderne Gipfe vom Watzmomassiv [dro werkln]
Kloaner Watzmo (Watzmoweibe) [dro werkln]
Da wichtigste Gipfe vom Watzmomassiv nach den Hauptgipfe vom Großen Watzmo is da Kloane Watzmo, aa Watzmoweibe (2307 m) ghoaßn. Da einfachste Weg afn Gipfe fiart von da Kührointalm vo Nordn üba de Kederbichel (eiszeitliche Moräne) aufn Grat, der si bald zua ana Klettastell vaengt.
Recht markant is de Westwand, de scho vui Tausend Wandera, de beim Aufstieg zum Watzmohaus de Falzalm erreichan, beeindruckt hat. De fast senkrechte Wand is (abgseng vo da Südspitz-Ostwand) de bedeutendste Kletterwand am Watzmo.
Watzmokinda [dro werkln]
De Watzmokinda schliaßn as Watzmokar am obern End ab (da Sage nach san's sieme; es san aba nur fünfe ois eigene Gipfel ausprägt: 1. Kind 2247 m, 2. Kind 2230 m, 3. Kind 2165 m, 4. Kind (Watzmo-Jungfrau) 2270 m, 5. Kind 2225 m). Sie san am leichtesten von Nordn aus'm Watzmokar zum erreicha.
Greastoa [dro werkln]
Da Greastoa is mit 1304 Metern Hächn da kleanste und am leichtastn zu dasteingde Gipfe vom Watzmomassiv. Er erhebt si üba da Schönau und is übaran Wanderweg entweda vom Parkplatz Hammastui oda vo da Kenigssee-Rodelbahn aus zum dareicha. Wenige Minutn untahoib vom Gipfe is a bewirtschafte Hüttn, as Greastoahaus.
Hirschwiesn [dro werkln]
De Hirschwiesn (aa Hirschwieskopf), 2114 m, is da sidlichste Gipfel vom Watzmomassiv und stellt de Verlängerung vom Felsgrat dar, der von da Watzmo-Sidspitze sidlich abakimmt. Vom Trischübel (1765 m), am Nahtpunkt zwischn Watzmo und am Stoanan Meer, führt a markierda Pfad durch a gachs Grasglände auf de kloane Gipfehochflächn mit de zwoa Gipfe, de wenige Minutn auseinanderlieng.
Mehra Gipfe [dro werkln]
Wenga seina Kompaktheit und da gringa Flächn håt da Watzmostock nur no wenig weiterne Gipfe:
- Großer Hachelkopf (2065 m)
- Griaßspitzn (2257 m)
- Mooslahnerkopf (1815 m)
- Falzköpfl (1928 m)
Zwoat-, dritt- oda viathächsta Berg in Deitschland? [dro werkln]
De weit vabroadte Moanung, da Watzmo waar nach da Zugspitz (2962 m) da zwoathächste Berg vo Deitschland, hoit ara gnauern Ibapriafung net stand. Im Wetterstoagebirg gibt's tatsächlich mehra wia drei Erhebunga, de hächa san wia er. De moast davo san im Zugspitzmassiv. Net alle gejtn aba ois eignständige Gipfe, weil s oft nur a paar Meta aus aram Grat ausserschaun. Da Schneefernerkopf (2875 m) erhebt sich aba ois a eigna Gipfe üba da Schneefernerschartn (2699 m) und hod somit eigentlich as Prädikat ois zwoathechsta Berg vo Deitschland vadeant.
Wei aba da Schneefernerkopf zum Zugspitzmassiv ghert, kon aa da Hochwanner (2746 m) ois zwoathächsta Berg vo Deitschland ogschaut wern. Er is durchs Reintal, Gatterl und Feldernjöchl recht deitlich vom Zugspitzmassiv trennt. Er buidt mit'm Wetterstoahauptkamm a eigns Bergmassiv. Wenn ma se oiso nur ganze Bergmassiv oschaugt, na stäid ma fest, daß außar am Zugspitzmassiv alloa da Hochwanner hächa is wia da Watzmo.
Wennma aba vom Wetterstoagebirg obsigt, dann konnma an Watzmo ois zwoathächstes Bergmassiv in Deitschland gejtn lossn.
Zum Lesn [dro werkln]
- Höfler, Horst: Watzmann. Mythos und wilder Berg. Zürich 2001
- Rasp, Franz: Watzmann-Ostwand. München 3. Aufl. 1990
- Schöner, Hellmut: 2000 Meter Fels. Ein Watzmann-Ostwand-Buch. Leipzig 1955
- Schöner, Hellmut; Kühnhauser, Bernhard: Alpenvereinsführer Berchtesgadener Alpen. München 18. Aufl. 2003
Zum Horcha [dro werkln]
Der Watzmann ruft, a Heaspui vo Wolfgang Ambros, Manfred Tauchen und Joesi Prokopetz
Externe Links [dro werkln]
Commons: Watzmann – Oibum mit Buidl, Videos und Audiodateien- A paar zuasätzliche Informationa
- Infos und GPS-Daten vo da Watzmoübaschreitung
- Bodnerhebunga in de nördlichen Koikalpn vom statistischen Bundesamt
 |
|
|
| Dea Artikl basiat auf ara frein Ibasetzung vom söim Artike in da Wikipedia auf Deitsch. A Listn mid de Autorn vo drentn konst da do aa oschaugn. |
