Watzmo

Aus Wikipedia

Watzmo
Watzmo, im Vordagrund de Kirchturm vo Berchtsgoan
Hechn	2.713 m ü. NN
Lage	Deutschland (Bayern)
Gebirg	Berchtesgoana Alpn
Geographische Lage	Koordinaten: 47° 33' 19" N, 12° 55' 24" O 47° 33' 19" N, 12° 55' 24" O
Erstbesteigung	im August 1800 vom Valentin Stanič
Normalweg	vom Watzmohaus (47° 34' 16" N, 12° 56' 3" O)
Watzmo-Ostwand

Da Watzmo (hochdeitsch: Watzmann) is as zentrale Bergmassiv in de Berchtsgoana Alpn. Er liegt im Südostn vo Obabayern im Nationalpark Berchtsgoan in de Gmoandn Ramsau und Schönau am Kenigssee. Des bekannte Massiv håt sein Kulminationspunkt in da Watzmo-Mittelspitzn, de mit ihre 2713 m Hechn aa da hechste Punkt vom Landkreis Berchtesgoana Land ist. Vo da bekannten Ansicht vo Berchtesgoan aus, mitm „Großen Watzmo“ rechts und am „Kloana Watzmo“ (Watzmoweibi) zur Linken, dazwischn de Watzmo-Kinda, kimt de Watzmosagn. De Watzmo-Ostwand guit ois hechste Wand vo de Ostalpn.

Inhoitsvazeichnis 1 Gipfen 2 Watzmosage 3 Alpinismus 3.1 Watzmoübaschreitung 3.2 Watzmo-Ostwand 3.2.1 Höchste Wand vo de Ostalpn? 4 Anderne Gipfe vom Watzmomassiv 4.1 Kloaner Watzmo (Watzmoweibe) 4.2 Watzmokinda 4.3 Greastoa 4.4 Hirschwiesn 4.5 Mehra Gipfe 5 Zwoat-, dritt- oda vierthechsta Berg in Deitschland? 6 Zum Lesn 7 Zum Horcha 8 Weblinks

[dro werkln] Gipfen

Iwan Watzmograt is de Mittelspitzn (2713 m, Hauptgipfe vom Watzmo) mit da Südspitzn (2712 m, friara aa: Schönfeldspitzn) und am Hocheck (2651 m) verbundn. Abgseng vo dene drei dominierenden Erhebunga san vor allem da Kloane Watzmo („Watzmoweibi“, 2307 m) und de Watzmokinda bekannt.

Da Watzmo is nåch de Gipfen vom Hochkenigstock (bis 2941 m) de hechste Erhebung vo de Berchtesgoaner Alpn, de zu den nördlichen Koichoipn zäin. Da Zuagang erfolgt meist von Nordn, vom Ramsauer Ortsteil Wimbachbrücke oder aus da Hinterschönau vom Parkplatz Hammerstiel über das Watzmohaus (1928 m). Ramsau bzw. Schönau lieng ois Talorte üba 2000 Höhenmeta unta dem Gipfe – damit weist da Watzmo fia de Ostalpn a recht a bemerkenswerte Hechndifferenz auf, de sogar alpnweit oft nur vo Viertausenda iwatroffa werd.

[dro werkln] Watzmosage

Heifig auf Fotos und Buidl zoagt werd de Ansicht von Nordn; vo links nach rechts sigt ma r as Watzmoweibi, de Kinda und an Großn Watzmo (der aus de Hauptgipfen besteht) ois nemanander aufgreihte „Familie“. Da Sage nach is des Land friara vom grausama Kenig Waze oda aa Wazemo beherrscht worn, der mit seim Weib und de Kinda Furcht und Schrecken vabreitet håt. Wiara a Bauernfamilie mit seine Ressa dastampft håt, håt'n de Bäuerin verfluacht, daß da Herrgott eam und sei Familie zum Stoa verwandeln soll. Danach håt si d Erdn aufdo, Feia gspuckt und an Keni und sei Familie zu Stoa verwandelt.

Ludwig Ganghofer håt Motive vo da Watzmosagn für sein historischn Roman Die Martinsklause hergnumma.

[dro werkln] Alpinismus

De Mittelspitzn is wahrscheinli im August 1800 erstmois vom Slowenen Valentin Stanič erstieng worn, aa wenn andane Quelln bereits 1799 ois Jåhr vo da Erstbesteigung nennan. De erste Überschreitung vom Großen Watzmo (Hocheck, Mittelspitzn, Südspitzn) is 1868 vom Ramsauer Bergführa Johann Grill, am Kederbacher, und Johann Punz durchgeführt worn. De zwoa ham aa an Gipfe vom Kloana Watzmo im Jahr 1852 ois erste dastiegn. De Watzmo-Ostwand is zum erstn Moi 1881 ebnfalls vom Johann Grill durchstieng worn.

[dro werkln] Watzmoübaschreitung

Oane vo de lohnendstn und eindrucksvollstn Gratübaschreitunga vo de Ostalpn is de Übaschreitung vom Watzmo, kurz „Watzmoübaschreitung“ ghoaßn. Dabei wern de drei Gipfen vom Hauptkamm, Hocheck, Mittelspitzn und Südspitzn vo Nordn nach Südn übaschrittn. In da Regel werd de Tour so durchgführt, daß ma am ersten Tåg vom Tal (d Wimbachbruckn, da Parkplåtz Hammerstiel, de Kenigssee-Rodelbahn oder St. Bartholomä kumman ois Ausgangspunkt in Frag) zum Watzmohaus (Alpenvereinssektion Minga, 1928 m, 169 Schlafplätz, oft voi belegt) aufsteigt, da dann übernacht und am nächstn Tåg de Überschreitung ogeht.

Vom Watzmohaus wandert ma zerscht zum Hocheck auffe, übawindt na an exponierten und ziemlich langa Grat (d hechste Erhebung is de Mittelspitzn) und erreicht dann d Südspitzn. Vo da Südspitzn, wo da Grat endt, führt a gacher Weg durch recht beeindruckende alpine Landschaftsformen abi ins Wimbachgriaß, an groussn Schuttstrom, auf dem ma auf aram oafacha Wanderweg parallel zum Watzmostock wieda nach Nordn in d Zivilisation zruckwandern ko. Alle Etappn zsamgrechnet braucht ma in ebba 12 bis 17 Stunden reine Gehzeit.

Bis zum Watzmo-Hocheck verlangt da Weg nur seltn de Zuhilfenahme vo de Händ und is fia an jedn konditionsstarkn Bergwandara ohne gressare Probleme zum moastern. Am Hoacheck-Gipfe werd's aba schwieriga. De Markierunga führn knapp untahalb, manchmoi aa direkt auf da Gratschneid üba de Mittel- zur Südspitzn, oft mit sagnhafte Ausblick direkt in de Ostwand und zum Kenigssee abi. Durch de vuin Begehungen san de Felsn ziemli speckig und entsprechend rutschig.

[dro werkln] Watzmo-Ostwand

[dro werkln] Höchste Wand vo de Ostalpn?

De Ostwand vo da Watzma-Südspitzn, auch Bartholomäwand ghoaßn, is oane vo de berühmtesten und bekanntesten Fäiswändt vo de Alpn. Obs aa de hechste Ostalpnwand is, is umstrittn, af jeden Foi san 1800 Meta Wandhechn, de wo in da Literatur oftmois vorkeman, niedriga wia de 1900 Meter, de da Alpenvereinsführer „Julische Alpn“ fia de Westwand vom Montasch (2754 m) oogibt. Es stellt si de Frag, was no ois Felswand und was „nur“ ois Steilflankn bezeichnet wern ko. Mit Sicherheit übertrifft de Watzmo-Ostwand d Nordwand vom Hochstadel (2680 m) in de Lienzer Dolomiten (ca. 1300–1400 Meter Wandhech), d Südwand vom Birnhorn (2634 m) in de Leoganger Stoaberg (ca. 1400–1500 Meter Wandhech) und de Nordwand vom Triglav (2864 m) in de Julischen Alpn (ca. 1500 Meter Wandhöhe) und is – vielleicht nach da Montasch-Westwand – mindestens de zwoathechste Wand vo de Ostalpen.

[dro werkln] Anderne Gipfe vom Watzmomassiv

[dro werkln] Kloaner Watzmo (Watzmoweibe)

Da wichtigste Gipfe vom Watzmomassiv nach den Hauptgipfe vom Großen Watzmo is da Kloane Watzmo, aa Watzmoweibe (2307 m) ghoaßn. Da einfachste Weg afn Gipfe fiart von da Kührointalm vo Nordn üba de Kederbichel (eiszeitliche Moräne) aufn Grat, der si bald zua ana Klettastell vaengt.

Recht markant is de Westwand, de scho vui Tausend Wandera, de beim Aufstieg zum Watzmohaus de Falzalm erreichan, beeindruckt hat. De fast senkrechte Wand is (abgseng vo da Südspitz-Ostwand) de bedeutendste Kletterwand am Watzmo.

[dro werkln] Watzmokinda

De Watzmokinda schliaßn as Watzmokar am obern End ab (da Sage nach san's sieme; es san aba nur fünfe ois eigene Gipfel ausprägt: 1. Kind 2247 m, 2. Kind 2230 m, 3. Kind 2165 m, 4. Kind (Watzmo-Jungfrau) 2270 m, 5. Kind 2225 m). Sie san am leichtesten von Nordn aus'm Watzmokar zum erreicha.

[dro werkln] Greastoa

Da Greastoa is mit 1304 Metern Höhe da kleanste und aa da Gipfe vom Watzmomassiv, der wo am leichtastn zum Dasteing is. Er erhebt si üba da Schönau und is übaran Wanderweg entweda vom Parkplatz Hammastui oda vo da Kenigssee-Rodelbahn aus zum dareicha. Wenige Minutn untahoib vom Gipfe is a bewirtschafte Hüttn, as Greastoahaus.

[dro werkln] Hirschwiesn

De Hirschwiesn (aa Hirschwieskopf), 2114 m, is da südlichste Gipfel vom Watzmomassiv und stellt de Verlängerung vom Felsgrat dar, der von da Watzmo-Südspitze südlich abakimmt. Vom Trischübel (1765 m), am Nahtpunkt zwischn Watzmo und am Stoanan Meer, führt a markierda Pfad durch a gachs Grasgelände auf de kloane Gipfehochflächn mit de zwoa Gipfe, de wenige Minutn auseinanderlieng.

[dro werkln] Mehra Gipfe

Wenga seina Kompaktheit und da gringa Flächn håt da Watzmostock nur no wenig weiterne Gipfe:

• Großer Hachelkopf (2065 m)
• Griaßspitzn (2257 m)
• Mooslahnerkopf (1815 m)
• Falzköpfl (1928 m)

[dro werkln] Zwoat-, dritt- oda vierthechsta Berg in Deitschland?

De weit verbreitete Meinung, da Watzmo waar nach da Zugspitz (2962 m) da zwoathechste Berg vo Deitschland, hoit ara gnauern Übaprüfung net stand. Im Wetterstoagebirg gibt's tatsächlich mehra wia drei Erhebunga, de hecha san wia er. De meistn davo san im Zugspitzmassiv. Net alle geltn aba ois eignständige Gipfe, weil s oft nur a paar Meta aus aram Grat ausserschaun. Da Schneefernerkopf (2875 m) erhebt sich aba ois a eigna Gipfe üba da Schneefernerschartn (2699 m) und håt somit eigentlich as Prädikat ois zwoathechster Berg vo Deitschland vadient.

Weil aba da Schneefernerkopf zum Zugspitzmassiv ghert, kon aa da Hochwanner (2746 m) ois zwoathechsta Berg vo Deitschland betrachtet wern. Er is durchs Reintal, Gatterl und Feldernjöchl recht deitlich vom Zugspitzmassiv trennt. Er buidt mit'm Wetterstoahauptkamm a eigns Bergmassiv. Wenn ma se oiso nur ganze Bergmassiv oschaugt, na stäid ma fest, daß außar am Zugspitzmassiv alloa da Hochwanner hecha is wia da Watzmo.

[dro werkln] Zum Lesn

• Höfler, Horst: Watzmann. Mythos und wilder Berg. Zürich 2001
• Rasp, Franz: Watzmann-Ostwand. München 3. Aufl. 1990
• Schöner, Hellmut: 2000 Meter Fels. Ein Watzmann-Ostwand-Buch. Leipzig 1955
• Schöner, Hellmut; Kühnhauser, Bernhard: Alpenvereinsführer Berchtesgadener Alpen. München 18. Aufl. 2003

[dro werkln] Zum Horcha

Der Watzmann ruft, a Heaspui vo Wolfgang Ambros, Manfred Tauchen und Joesi Prokopetz

[dro werkln] Weblinks

• A paar zuasätzliche Informationa
• Infos und GPS-Daten vo da Watzmoübaschreitung
• Bodnerhebunga in de nördlichen Koikalpn vom statistischen Bundesamt