Wikipedia:Kriterien fir Berige Artikln

Aus Wikipedia
Wexln zua: Navigation, Suach
Des süiwane Sterndl kennzeichnd in da boarischn Wikipédia unsane bering Artikün.

Damid a Artikü vo da boarischn Wikipédia åis berig auszeichnd wird, muaß a a bår Kriterien erfüin. Dazua ghern inhåitliche und språchliche, åwa à formàle Gschichtln. De Kriterien miaßn beim Bspréchn vo Kandidàtn fir Berige Artikü åiwei beåchted wern. Wånns d'findst, då föid wås bei de Kriterien, oda sunst wås drã ändan mechadst, dånn möid di af da Bspréchungsseitn.

Inhåitliche Kriterien[VE | Weakln]

  1. S'Lemma muaß relevant seî.
  2. Da Artikü muaß àn oda zwà Åbsätz Eîleitung håm, de wås a jéda vastehd (à wånn a si de weidafiahradn Links néd ãschaud, åiso ohne jéds Fåchchinesisch), und wo vaständli erklärd wird, um wås daß's då gehd.
  3. Bsondas wichti is da ållaerschte Såtz, dés muaß a Definizionssåtz seî (Lemma fett gsétzt), der wås kurz und knackig erklärd, wås des Ding is, um dés wås's im Artikü gehd.
  4. Da Text muaß fir an jén vaständlich gschriem seî, ma muaß zumindest dånn åis vasteh, wåmma si de weidafiahradn Links ãschaud.
  5. Ålle wichting Aspekte miaßn im Text zumindest kurz vorkumma. Am Beispüi vo an Artikü üwa a Ståd: Då muaß zumindest jeweus a Åbsåtz drinsteh üwa d'Geografie, d'Leid, d'Gschicht, d'Politik, d'Wirdschåft und d'Infraschtruktur in dera Ståd.
  6. Es muaß da gånze Text an neutràln Ståndpunkt eîhåitn, und es derfm kàne Begriffsbüidungen vorkumma.

Språchliche Kriterien[VE | Weakln]

  1. Ålle Artikü miaßn komplett af Grammatik und Zeichnsétzung durchgånga wern und à af Tippföhla, bevor's berig wern kinnan.
  2. Es muaß om kennzeichnd seî, in wås fir an Dialekt der Artikü gschriem is, und der Dialekt muaß im gånzn Artikü mid ana gleich bleibadn Umschrift eîghåidn wern.
  3. D'boarische Grammatik muaß im gånzn Artikü eîghåidn seî.
  4. Bsondas wichtig is, daß kàne Genitive vorkumman, wei dé gibt's af Boarisch néd.
  5. Fremdwerta miaßn korrekt buchstabierd seî, åiso zum Beispüi New York und néd Niu Joak.

Formàle Kriterien[VE | Weakln]

  1. Da Artikü muaß zan gresstn Deu aus an Fließtext mid gånze Sätz bstehd und néd aus Listn.
  2. D'Gliedarung muaß guad seî, mid néd z'vüi und a néd z'weng Åbsätze und Zwischnüwaschriftn.
  3. Im Artikü muaß's gnuag guade Illustrazionen gém.
  4. Ålle enzyklopädisch relevantn Begriffe, de wås vawendt wern, miaßn valinkt seî.
  5. Zumindest àns vo de Elemente Quöin/Litaratur/Weblinks muaß vorkumma.
  6. Da Artikü muaß thematisch in (zumindest) â Kategorie eîsortierd seî.
  7. Intawikilinks zu åndane Språchausgåm vo da Wikipédia muaß's gém, wånn's den Artikü à in woåndas nu gibt.
  8. Da Artikü soid nåch Möglichkeid néd z'lång seî. Åis Owagrenz göitn ungefähr 30 Kilobyte, wei bei mehr kanntn månke Browser Schwierigkeitn mi'n Lådn håm.
  9. Da Artikü derf néd z'kurz seî. Åis Untagrenz göitn ungefähr åcht Kilobyte, wei bei weniga kã's bassiern, daß a néd amåi a gånze Büidschirmseitn ausfüid.