Der Bulle von Tölz: Das Amigo-Komplott

Aus Wikipedia
Zur Navigation springen Zur Suche springen
Der Artikl is im Dialekt Obaboarisch gschrim worn.
Folge der Serie Der Bulle von Tölz
OriginaltitlDas Amigo-Komplott
ProduktionslandDeitschland
OriginalsprochDeitsch/Boarisch
Läng91 Minutn
OitasfreigobFSK 12
EinordnungStaffel 1, Folge 1
1. Folge insgesamt
Easchdausstrohlung14. Jenna 1996 auf Sat.1
Stab
RegieWalter Bannert
DrahbuachClaus Peter Hant
ProduktionErnst von Theumer junior
MusiKristian Schultze
KameraHanuš Polak
SchnittIngrid Träutlein-Peer
Bsetzung
Episodnlistn

Das Amigo-Komplott is a deitscha Fernsehfuim van Walter Bannert ausm Joa 1996 noch an Drahbuach van Claus Peter Hant. Es is de easchte Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 14. Jenna 1996 af Sat.1 ausgstroid worn.

Handlung[VE | Weakln]

Da Chef van Wossawiatschoftsamt, Franz Dechansreiter, wead im Dampfbad van "Bäderkönig" Dr. Fink tod afgfundn. Ois Todesursoch werd a Heazschlog ognumma; olladings hod da Dechansreiter a Handverletzung, de wo draf schliaßn losst, doss ea probiat hod, de Tir afzmocha. Da Kommissar Benno Berghammer kennt an Todn sei Frau vo friara und ibabringt eara de traurige Nochricht. De Apothekarin Andrea Dechansreiter reagiert gfosst und losst eam wissn, doss de Scheidung kuaz bevorgstandn hod. Do heans a Schiaßerei aus da Wohnung van Todn. Wias nochschaun, is koana mehr zun seng, oba de Wohnung is vawiast worn. Da Kommissar findt a Projektil, des wo si ois Eigenbau fia an Colt vo 1850 außastejt.

Da Benno Berghammer kriagt a neie Kollegin: de Berlina Hauptkommissarin Sabrina Lorenz. Dmid de Preißin Land und Leit kennaleant, nimmt ers glei mid af Ermittlungstour.

Im Bluad van Todn wern Spuan vo Hexagen gfundn, a Substanz, de wo zgleich desinfiziat und betäubt. Ob 50 °C vadampft se und fiat, konzentriert eigschnauft, zun Kroaslafvasong, eascht recht in ana Sauna oda an Dampfbad. Da Benno Berghammer nimmt as Flaschl Hexagen mid, des wo im Bad gfunden worn is.

De Andrea Dechansreiter sogt, doss eana Mo sanft wiara Lampal gwesen is, oba da Kommissar findt außa, doss Franz Dechansreiter doh Feind ghobt hod, drunta a ganze Menge Bauan, de wo er mid an Oschluss an de öffentliche Trinkwossaversorgung zwangsbeglickn wojn hod. Ban Wossawiatschoftsamt grodn de zwoa Kriminala in a Bauandemo und erfoan, doss vui Brunna koa Wossa nimma hergem, wei wega an neien Bad van Bäderkönig Fink da Grundwossaspiagl obgsunka is. Fia de Bauan is ganz kloar da Dechansreiter dro schuid, wei er as Projekt ois unbedenkli eigstuft hod. De Untalong dazua kriagn de Kommissar van Dechansreiter seina Sekretärin, oba as geologische Guatachten is vaschwundn, aa de Kopie davo. Die Befrogung van Prälatn Hinter, dea wo fia de Kiachn a Grundstick an Dr. Fink verkaft hod, bringt de Ermittlunga aa ned weida.

Vo ana Mitoabatarin im Bad kriagt da Berghammer gsogt, doss da Dechansreiter de Masseurin Mahima Sanlong efta gschlong hod. De hod eam vor fimf Joa in Hongkong kenna und liam gleant. Warum ea se gschlong hod, woaß de Mahima Sanlong aa ned. Valossn hods eam ned kenna, wei da Dechansreiter ois zoit hod und wei se a Oabadsealaubnis braucht, de wo se bloß iban Dr. Fink kriagt. Wia's jetzad ohne eanan Sponsor weidageh soi, woaß de Masseurin ned.

Af an Foto ausm Dechansreiter seina Wohnung, afgnumma in Hongkong, siagt ma fimf Persona: Prälat Hinter, Landrat Siegfried Wallner, Dr. Fink, Franz Dechansreiter und Mahima Sanlong. Wei da Landrat Wallner am ehestn ois Täta in Frog kimmt, foan de Kriminala zu eam. Der is middn im Woikampf, hod oba grod a weng Zeit. Ea gibt zua, doss de Roas noch Hongkong van Dr. Fink zoid worn is, sogt oba, doss sei positive Entscheidung iba de Genehmigung van Bad nix damit z doa ghobt hod.

A Klostafrau vazejd im Kommissariat, doss se an Unbekanntn dawischt hod, wia ea in de Papiere van Prälatn Hinter gstebad hod. Da Benno Berghammer probiat ohne Erfoig, noch eanara Beschreibung a Fantombuidl zmocha. Wia de Sabrina Lorenz an Bauan Toni Göbel zoachnd, an Woatfiara vo da Demo, triffts ins Schwoaze. De Klostafrau sogt, doss da Diab bei die Verträg gwen is, wo mindestens fimf Joa zrucklieng.

Ban Toni Göbel findn de Kriminala an Colt, dea wo in dem Dechansreiter seina Wohnung obgfeiat worn is, und no mehra Handfeiawoffn; do kimmt da Besitza grod af sein Roß ogrittn. Ea nennt sei im Umbau befindlichs Owesn "Westerntown". Ea is ogfressn, wei da Landrat Wallner eam de Genehmigung vaweigat. Zerscht streit er an Eibruch ban Prälatn Hinter und de Vawiastung vo an Dechansreiter seina Wohnung ob, oba wia da Benno Berghammer eam vaspricht, doss ea gega a Gständnis de Woffn bhoidn deaf, gibt ea de Schiaßarei zua. De Kommissar eafoan van Göbel, doss da Prälat as Grundstick weid unta Preis an'n Dr. Fink vakaft hod. Se konfrontiern an Fink mit de Faktn, oba der weist olle Voawiaf zruck; do nehmans olle Gschäftsunterlong mid. Ban Durchschaung findt de Sabrina Lorenz zwoa Ibaweisunga vo je oana Million Mark af Kontn in Luxemburg. De Empfänga san Prälat Hinter und da Dechansreiter; dem sei Witwe erbt jetzad oa Million Mark plus Zinsn. Af eanan neien Reichtum ogsprocha, sogt de Dechansreiterin, doss se scho imma as Gejd vo eanan Mo vawoitet und aus dera oan Million dawei zwoa gmocht hod. Im Foi vo ana Scheidung häddns as Gejd teit. Es soi oba eh da "Tagesstätte für krebskranke Kinder" fian Neiaufbau zuakemma.

Da Landrat Wallner bsuacht de Resi Berghammer in eanara Pension und sogt, se soi auf eanan Sohn eiwirka, dmid dea de Gschäftsuntalong an Fink zruckgibt. Wei da Kommissar si ned draf eilosst, kimmt oana van Gewerbeaufsichtsamt, dea wo feststejt, doss de Zimma 10 cm z'niedrig san.

Af ana Woiveranstoitung vazejt da Toni Göbel an Kommissar, doss ea dahoam a Schreim van Wallner an Bauunternehma Schwarz hod, wo zlesn is, wem de Firma wirkli gheat. Aus der Hand gem wui er den Briaf ned, oba an Blick neiwerfa derfat ea scho. Da intressiate Benno Berghammer mocht a Treffa mit dem Bauan fia an nächstn Tog uma zwejfe in an Gosthaus aus, oba dea Termin plotzt, wei da Göbel dawei an Briaf an Wallner ibagem und dafia im Eilvafoan de Bewilligung fia "Westerntown" kriagt hod.

Da Benno Berghammer erinnert si dro, doss ea bei ana Befrogung a Foto vo da Mahima Sanlong eanan Bruada gsehng hod, dea wo a Loch im Heaz hod und demnächst operiat wern soi. In da Klinik eafoat da Kommissar vo ana Kranknschwesta, doss de Sanlong an Eigriff sejba zoid. Wia des geh soi, wiad eam kloar, wia ra af da Station de Mahima Sanlong und de Andrea Dechansreiter zamm siagt, de wo gonz oadeiti mitanand befreindet san. De Dechansreiterin vazejt eam, doss aa se sejba vo eanan Mo wia Dreck behandelt worn is.

Wia de Resi Berghammer eanan Sohn am Telefon sogt, doss eara de Betriebsbewilligung entzong worn is, is er saua und wui an Landrat festnehma lossn, oba sei Kollegin hoit dageng, doss's gega'n Wallner koan oanzign Beweis ned gibt. Kuaz drauf ruaft de Berghammerin no amoi o und losst eanan Buam ausrichtn, doss Heaztropfn braucht. Im easchtn Moment grot er wieda in Rage, wei er de Heaztropfn fia unnedi hoit, oba donn hod er af amoi a Eigebung und geht zur Apothekn vo da Dechansreiterin. Dera zoagt er as Flaschl Hexagen und frogt, ob se so wos bsoang kunnt. Se sogt, des miassad ma bstejn. In de Gschäftsuntalong vo da Apothekn steht, doss in letzta Zeit bloß de Mahima Sanlong Hexagen kaft hod; oiso geht da Kommissar no amoi in de Klinik. De Sanlong gibt an Moad zua, oba da Berghammer wui mit da Festnahme woatn, bis da Bruada operiert worn is. Do kimmt de Andrea Dechansreiter dazua und sogt, doss se gwisst hod, doss's so weid kemma wead. Oiso nimmt da Kommissar se wega Beihuif zun Moad aa fest.

De Resi Berghammer und de Sabrina Lorenz hom dawei außagfundn, doss de Pension wega'n Denkmoischutz ned gschlossn wern deaf. Jetzad fiachtn de Kriminala oba, doss de "Amigos" Landrat Wallner, Prälat Hinter und Bäderkönig Fink ungschorn davokemman. Dmid des ned passiat, sammeln da Berghammer und de Lorenz bei eana siemnstellige Spenden fia de "Tagesstätte für krebskranke Kinder".

Hintagrund[VE | Weakln]

Gfuimt worn is z Däiz und im Klosta Schäftlarn;[1] ois Schaublotz fia de "Pension Resi" homs as Hollerhaus Irschnhausn heagnumma.

Kritik[VE | Weakln]

De Programmzeitschrift TV Spielfilm schreibt: „Der Krimi beleuchtet kritisch die politische Provinz.“[2]

Im Netz[VE | Weakln]

Beleg[VE | Weakln]

  1. Das Amigo-Komplott – derbullevontoelz.de
  2. Der Bulle von Tölz: Das Amigo-Komplott – Filmkritik bei TV Spielfilm