Der Bulle von Tölz: Kochkünste
| Der Artikl is im Dialekt Obaboarisch gschriem worn. |
| Foig der Serie Der Bulle von Tölz | |
|---|---|
| Originaltitl | Kochkünste |
| Produktionsland | Deitschland |
| Originalsproch | Deitsch/Boarisch |
| Läng | 90 Minutn |
| Oitasfreigob | FSK 12 |
| Einordnung | Staffel 12, Foig 6 58. Foig insgesamt |
| Easchdausstrohlung | 11. Jenna 2006 auf Sat.1 |
| Stab | |
| Regie | Wolfgang F. Henschel |
| Drahbuach | Ralph Werner |
| Produktion | Ernst von Theumer junior, Julia Bachmann |
| Musi | Jo Barnikel, Stephan Wildfeuer |
| Kamera | Thomas Meyer |
| Bsetzung | |
| |
Kochkünste is a deitscha Feansehfuim van Wolfgang F. Henschel ausm Joar 2006 noch on Drahbuach van Ralph Werner. Es is de 58. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 11. Jenna 2006 af Sat.1 ausgstroit worn.
Handlung[Werkeln | Am Gwëntext werkeln]
Da Restaurantkritika Kurt Reindl wead vo seina Haushäitarin in da Kuche tod afgfundn. Ea is mid on Brodntheamometa vo hintn dastocha und midm Schädl in kochade Bouillabaisse taucht worn.
De Kommissar Benno Berghammer und Sabrina Lorenz stejn fest, doss da Reindl si etliche Feind gmocht hod, drunta an Spitznkoch Julian Heuberger, wei ea dem sein Ruaf ruiniat hod, und de Feansehkechin Mirella Beck, vo deara wo ea gsogt hod, doss ned kocha ko und im Feanseng goar nix zun Suacha hod. Wia si no dazua außastejd, hod si da Reindl duach Eapressung vo mehrane Leit ausm Gostgweab a Zuabrot gsichad – wea ned zoid hod, hod a schlechte Beweatung vo eam kriagt.
De Sabrina Lorenz findt außa, doss da Felix Gebhardt, dea wo kloanare Orbatn fia d’Mirella Beck in deara iarn Haus und Goartn ealedigt und bei on Feinkostlodn ois Zuasteja orbat, am Dog nochm Moard a Ringlbleamlsoibm kaft hod. Wenn ea da Täta is, kanntas zun Behondln vo Vabrennungan braucht hom, de wo ea si ban Eitaucha van Opfa in de hoaße Suppn zuazong hom kannt. Da Felix Gebhardt sogt, doss ea si bei da Goartnorbat valetzt hod. Fia de Tatzeid hod ea ra Alibi vo seina Oma.
Innahoib vo wenige Dog wead bei da Feansehkechin zwoamoi eibrocha, oba da easchte Eibruch stejd si ois Inszeniarung vo da Mirella Beck und ian Freind und Manager Alex Kroll außa, de wo an Vakauf van neien Kochbiachl okuabln woitn; da zwoate is woahrscheinli echt. Zwischad de zwoa Eibrich hod de Mirella Beck oamoi fian Kommissar Berghammer kocht; dawei hod ebba seine Autoroafn afgschlitzt.
De Kriminala finden außa, doss da Stootssekretär Pollinger si hoamli mid da Mirella Beck in ara Jogdhittn trifft. Es wead gmunklt, doss se iare Kochsendung nua kriagt hod, wei da Stootssekretär an Programmintendantn van Senda kennt. Da Pollinger woit a Pornovideo ausm Vakeah ziang, in dem wo de Mirella Beck in jingare Joar de Haptroin gspuid hod. zeascht gengan olle davo aus, doss de Feansehkechin as hoamliche Gspusi van Stootssekretär is, oba dea stejd kloar, dos d’Mirella sei uneheliche Tochta is. Da Pollinger bstätigt, doss da Kurt Reindl d’Mirella mid dem Video dapresst hod.
Wia da Stootssekretär um a Hoar vo nan Baam daschlong wead, duada’s ois unglicklichn Zuafoi ob, wei da Woid grod ausghoizt wead, oba de Kommissar gengan vo Obsicht aus. Da Benno Berghammer moant, doss’s on Zammahang zwischad an Reindl sein Tod und an Attentat afn Pollinger gem muass. Sei Kollegin tippt af ebban, wo wega da Mirella eifasichtig is. Se san si oba oans, doss’s ebba sei muass, dea wo de Kechin obbgeddisch liabt. Eana heaßesta Kandidat is da Felix Gebhardt. In sein Bastlkella findens Videoafzoachnungan, de wo d’Mirella Beck in Gsejschoft mid vaschiedene Monna zoang. Außadem entdeckt da Benno Berghammer genau des Video, mid dem wo da Kurt Reindl de Feansehkechin dapresst hod. Ea steckt’s ei und mocht si mid da Sabrina Lorenz afn Weg zu an Julian Heuberger sei Restaurant, vo wo grod da Mirella iare 50. Kochshow live ausgstroit wead. D’Resi Berghammer deaf da Kechin zua Hond geh. Bei on Fuimbeitrog geht on da Stej van ogsogtn Spaziagang iban Viktualienmorkt as bschlagnahmte Pornovideo af Sendung. Da Felix Gebhardt draht duach, bedroht d’Mirella Beck mid on Messa und zwingts zun Eisteing ins Auto. Ban Wegfoarn meakt ea, doss de Roafn zstocha san, und fordad a voitankts Fluchtauto. Wia da Benno Berghammer eam sogt, doss da Stootssekretär Pollinger, den wo ea fost umbrocht häd, da Voda vo da Mirella is, gibt da Felix Gebhardt af und losst s Messa foin.
Hintagrund[Werkeln | Am Gwëntext werkeln]
Gfuimt worn is haptsächli z Däiz;[1] ois Schaublotz fia de „Pension Resi“ homs as Hollerhaus Irschnhausn heagnumma.
Kritik[Werkeln | Am Gwëntext werkeln]
De Programmzeitschrift TV Spielfilm schreibt: „Zehn Bullen-Jahre sind genug, dachte sich Katerina Jacob und stieg nach diesem Fall aus.“ Fazit: „Ein Krimi-Knödel ohne rechten Biss.“[2]
Im Netz[Werkeln | Am Gwëntext werkeln]
- Kochkünste in der Internet Movie Database (englisch)
- Kochkünste bei Fernsehserien.de
Beleg[Werkeln | Am Gwëntext werkeln]
- ↑ Kochkünste – derbullevontoelz.de (Memento vom 29. Aprü 2016 im Internet Archive)
- ↑ Der Bulle von Tölz: Kochkünste – Filmkritik bei TV Spielfilm
| Vorherige Foig 14. Dezemba 2005: Der Weihnachtsmann ist tot |
Episodnlistn | Nächste Foig 19. Dezemba 2006: Keiner kennt den Toten |