Der Bulle von Tölz: www.mord.de

Der Artikl is im Dialekt Obaboarisch gschriem worn.

Foig der Serie Der Bulle von Tölz
Originaltitl	www.mord.de
Produktionsland	Deitschland
Originalsproch	Deitsch/Boarisch
Läng	92 Minutn
Oitasfreigob	FSK 12
Einordnung	Staffel 6, Foig 1 29. Foig insgesamt
Easchdausstrohlung	4. Oktoba 2000 auf Sat.1
Stab
Regie	Hans Werner
Drahbuach	Tobias Siebert
Produktion	Ernst von Theumer junior
Musi	Kristian Schultze
Kamera	Falko Ahsendorf
Schnitt	Susanne Hartmann
Bsetzung
Ottfried Fischer: Hauptkommissar Benno Berghammer Katerina Jacob: Hauptkommissarin Sabrina Lorenz Ruth Drexel: Resi Berghammer Michael Lerchenberg: Prälat Hinter Udo Thomer: Polizist Anton Pfeiffer Lisa Fitz: Martina Scherer Florian David Fitz: Florian „Flo“ Scherer Franz Hanfstingl: Dr. Schmiedle Angela Hobrig: Doris Janker Fritz Egger: Gerhard Schillinger Eva-Maria Höfling: Eva Schillinger Markus Böker: Conny Rauscher Lara Joy Körner: Trixi Rauscher
► Episodnlistn

www.mord.de is a deitscha Feansehfuim van Hans Werner ausm Joar 2000 noch on Drahbuach van Tobias Siebert. Es is de 29. Foig vo da Krimiserie Da Bulle vo Däiz midm Ottfried Fischer ois Hauptkommissar Benno Berghammer. Da Fuim is zun easchtn Moi am 4. Oktoba 2000 af Sat.1 ausgstroit worn.

Handlung[Werkeln | Am Gwëntext werkeln]

De neie Filialleitarin vo da „Alpenländischen Kreditbank“, Doris Janker, findt an Computafochmo Conny Rauscher tod im Internetcafé vo seina Frau Trixi. Ea is midm Hintakopf gegana Tischkantn ums Lem kemma. De Kommissar Benno Berghammer und Sabrina Lorenz stochan zeascht im Nebe, wei no unkloar is, ob’s a Unfoi oda a Tötungsdelikt woar. Vo de befrogtn Peasona ko si neamd vorstejn, warum ebba an Conny Rauscher umbringa soid. Sei Frau is Nutzniaßarin vo seina Lemsvasicharung vo oana Million Mark, und se hod a gschlampads Vahäitnis mid iam Stommkundn Florian Scherer, dea wo si ob sofort um de Afträg kimmad, wo no da Conny Rauscher eigfadld hod. Fia on dringadn Tatvadocht glongt des oba ned.

D’Resi Berghammer arrangiat ibas Internet a „Blind Date“ fia ian Sohn Benno im „Café Edelweiß“ mid da Martina Scherer. Aa se hod as Treffn ned sejba eigfadld, sondan ia Sohn Florian. De zwoa Vakuppltn vastengan si recht guad, oba da Kommissar kimmt boid hinta da Martina ia großes Problem: Se is spuisichti und hod eascht vor kuazm 300.000 Mark valorn. Da Spoarkassnvorstond Dr. Schmiedle gibt unta Druck zua, doss da Gerhard Schillinger, da Vorgänga vo da Doris Janker, de gleiche Summe vauntreit hod. Wei ma si Sorgn um s Image vo da Bank gmocht hod, hod ma de Soch vatuscht; ois Wiedaguadmochung hod da Schillinger sei Haus on de Bank ibaschreim miassn. De Kriminala glam ned on an Zuafoi, oba da Gerhard Schillinger streit jegliche Vabindung mid da Martina Scherer ob. Nochdem da Berghammer und de Lorenz as Grundstick valossn hom, foart da Schillinger zua Schererin und wui vo ia wissn, wohea de 300.000 Mark kemma san, wo se im Casino vaspuid hod. Zeascht wuis eam nix song, wia ra iara oba mid on Kredit vo 100.000 Mark winkt, varots eam, doss as Gejd vo iam Sohn kriagt hod. Aft nimmt ea si an Florian vor und untastejd eam, doss ea si in de Bank neighackt, s Gejd obzong und es so ausseng lossn hod, wia wonn ea, da Schillinger, es Gwen warad, wei ea sejba koan Kredit ned kriagt hod. Wia de Kommissar dazuakemman, fordad da Schillinger, doss an Florian vahoftn, wei ea de Bank bstoin hod. Da Florian gibt zua, doss eas fia sei Muada gmocht hod. Da Benno Berghammer rodt an Gerhard Schillinger, doss ea emfois a Gständnis obleng soid. Da Schillinger sogt, doss koa Obsicht ned gwen is. Ea hod an Conny Rauscher im Vadocht ghobt, doss ea as Gejd obgriffn hod, wei ea s Computasystem vo da Bank installiat und si demnoch sehr guad auskennt hod. Bei on Bsuach im Internetcafé hod ea si a Gständnis dahofft, oba da Rauscher hod arrogant reagiat und eam und sei Famij ausglocht. Aft is da Schillinger narrisch worn und hod eam an Stessa vasetzt.

Hintagrund[Werkeln | Am Gwëntext werkeln]

Gfuimt worn is z Däiz, z Gaißach (Friedhof) und z Greawoid (Casino);^[1] ois Schaublotz fia de „Pension Resi“ homs as Hollerhaus Irschnhausn heagnumma.