Haderndampfa

Aus Wikipedia
Der Artikl is im Dialekt Obaboarisch gschriem worn.

Ois Haderndampfa, manchmoi a ois Lumpnkreiza werdn im Scherz Foitboote bzeichnet.

A Foitboot is a Boot des ma zleng ko, im wesentlichn bstehts aus a flexibln Bootshaut und am zerlegbarn Innengrüst. De Bootshaut werd aus Gummi, PVC oda Hypalon fürs Untaschiff und am Textilstoff (desweng Hadern oda Lumpn) fiars Vadeck gmacht. S' Grist is meistns aus Eschn- oda Birknsperrholz, manchmoi a aus Aluminium. S' gibt a Foitboote aus zsammklappbarn Kunststoffplattn, des han dann aba koana Haderndampfa. A Schlauchboot ko ma zwar a zsammlegn, des nend ma aba ned Foitboot und a ned Haderndampfa.

Foitboote han vo da Idee hear Kopien vo de Eskimo, de des Fej vo Viecha iaba a Grist aus Walknocha spanna, um Kajaks zum baun. Da Kajak is aa oane vo de typischn Baufoaman vo am Foitboot. Fost grod a so gibts aba aa Seglboot, Kanadier, Ruadaboot und Dingis. Bekannt is voa oim de Firma Klepper z'Rosenheim fias Foitbootbaun. Sea vabroat san Foitboot fia de Freizeit kurz nachm Zwoatn Wejdkriag gwesn, wei mas a ohne an Auto transportian hod kenna, wos jo no koana ghobt hod, zsamglegt ko mas ganz guat im Zug oda im Bus mit auf a Roas nehma. A vui wichtige Expeditionen han mit Foitbootn durchgführt woan.