Holland (Region)

Aus Wikipedia
(Weidagloadt vo Hollånd (Region))
Wexln zua: Navigation, Suach
Der Artikl is im Dialekt Stod-Soizburgarisch gschrim worn.
Do siachd ma, wo Nord- und Südhollond san in de Niedalonde.
Zwa dypisch holländische Windmüin

Hollond is a Deu vo de Niedalonde, der wos zwischn da Nordsee im Westn und im IJsselmeer im Ostn is. Im Nordn gehds bis zur Insl Texel, im Sidn bis zum Delta vom Rhein, vo da Maas und vo da Schelde. Hollond hod zwa Provinzn: Nordhollond und Sidhollond. In Hollond san de Großstädt Den Haag, Rottadom und Amsterdam, de wos a Deu vo dem Ballungsraum san, der wos Randstad haßt; insgesomt wohnan in Hollond 6,1 Müllionan Leid. Im Westn, an da Nordsee, gibts an da Küstn so Sonddünen, im Ostn, am IJsselmeer, so floche Poida. A Großdeu vo Hollond is untam Meeresspiagü drunta.

Hollond wor a Deu vom Römischn Reich, speda vom Franknreich, donn a Grofschoft vom Heuling Römischn Reich (regierd vom Grof vo Hollond) und vo Burgund. Ob 1581 wor Hollond a wichtige Provinz in da Republik vo de Siem Vaeinigtn Niedalonde, de woss bis zan Joa 1795 gem hod. In da Zeid vom Napoleon I. hods as Kinireich Hollond gem (vo 1806 bis 1810), owa do worn üwahaupt de gonzn heiding Niedalonde dabei. Hollond wor eh schon imma da wichtigste Deu vo de Niedalonde bei da Kuitur, bei da Gsöischoft und bei da Politik; damids ned imma gor a so üwawichtig is, homs es im Johr 1840 in de zwa heiding Provinzn Nordhollond und Südhollond deud.

In Noman Hollond homs as erschte Moi im Johr 866 ois Holtland (Hoizlond, Woidlond) hergnumma fir de Gengt um Haarlem umadum.

Im Sprochgebrauch af Hochdeitsch und a af Boarisch sogt ma oft Hollond, womma eingtli d'Niedalonde mant. Des is scho am End vom 16. Joahundat afkumma, wias de Republik vo de Siem Vaeinigtn Niedalonde gründt hom, und do wor hoid Hollond afoch de wichtigste Provinz. Nu stärka is des owa in Deitschland in 1970er- und 1980er-Joa worn, weu do hom de großn Bauan vo Hollond mid ana urntlichn Werbekampagne gschaud, dass is schlechte Image vom niedaländischn Treibhauszeigs wegbringan. Eana Werbefigur wor do de „Frau Antje“ midn Spruch „Kas und Gmias - Qualität vo Hollond“.