Kastell Rengschbuach-Kumpfmühl

Des Kastell Rengschbuach-Kumpfmühl am Rätischn Doanalimes.

As Kastell Rengschbuach-Kumpfmühl woar a Remischs Hilfstruppn-Kastell an da Doana-Grenzn, des vo da Zeit umara 80 bis zou de Markomannenkrejge um 172 ume dou gwen is, und fir d'Grenzkontrolln zouständig woar. Ols Nachfolga vo de kloin-Kastelle vo da Claudischen-Linie vo Oberstimm bis Linz, woar'as Kastell Rengschbuach-Kumpfmühl - zamma mit am Doana-Kastell, des in dem wos heint d'oitstodt vo Rengschbuach is glenga woar - oine vo de easchtn groußn Siedlunga im Gbiet vo Rengschbuach.

In da mittn vo mehrane Vakehrswech woar'as heitige Gbiet vo Rengschbuach, am neadlichsten Punkt vo da Doana, wichtich firn Handel. Mittlfrankn, Obafrankn und da Boarische Wold, neadlich vo da Doana, han zou Remerzeitn bis zou de Markomannenkrejge niad dicht bsiedlt gwen, und san desweng vo de Rema ols niad gfährlich ogseng worn.

D'easchte Hilfstruppn im Kastell Rengschbuach-Kumpfmühl woar dej Cohors III Britannorum equitata, umara 120 houd de Cohors I Flavia Canathenorum milliaria sagittariorum as Kastell grejßer gmocht, und is dabliem bis zou da Zeit um 150, wou dej nach Straubing ganga is, und de Cohors II Aquitanorum equitata civium Romanorum bis zou de Markomannenkriage dou stationiert worn is.

Gschicht vom Kastell Rengschbuach-Kumpfühl

D'easchtn Hilfstruppn-Kastelle im Gbiet vo Rengschbuach wern zou da Regierungszeit vom Claudius dou gwen sei, a wenn des nur a Hypothesn is, vo dera ma si no niad ganz gwiss is. Vo Obastimm bis Linz woarn kloin-Kastelle an da Remischn Grenzn installiert gwen, vo dene ma zwoa an da Mündung vo Naab und Reng, im heitign Rengschbuach vermuta tout.