Nutza:Alib/Sepp Forcher

Da Sepp Forcher (* 17. Dezemba 1930 in Rom ois Giuseppe Forcher) is a Soizbuaga Fernsehmoderator vo Südtirola Obstommung.

Geboan woadn is da Soun vo Südtirola Ötan im 1930a-Joa zuaföllig in Rom, wei sei Muata domois grod auf Bsuach bei ihra Schwesta woa. Aufgwoxn is a donn in Sextn in Südtirol, wo sei Vota Hittnwiat woa. Im 39a-Joa hobn seine Ötan donn füa die Aussiedlung noch Deitschlond optiat und san im 1940a-Joa ins Soizbuaga Lond übasidlt. (Östareich hot domois nochm »Onschluss« im 38a-Joa zu Hitlerdeitschlond gheat.) Seit weitare Jugend hot da Sepp Forcher donn oiso im Pongau, in Weafnweng, vabrocht, wo seine Ötan ois Hittnwiatsleit im Tennengau goaweit hobn.

Ois junga Mo hot da Forcher zeast ois Bauoaweita auf da Baustö vom Speichakroftweak in Kaprun im Pinzgau goaweit, donn ois Trega auf vaschiedene Hittn in die Hochn Tauan (Heinrich-Schwaiger-Haus, Oberwalderhittn), owa a ois Höhlnführa in da Eiskoglhöhln im Tennengau und ois Mineraliensuacha. A ois Beagsteiga woara in dea Zeit sea aktiv, zum Beispü woara aufm Mattahoan und aufm Mont Blanc.

Obm 1955a-Joa woa da Forcher donn Hittnwiat, zeast am Beaglondhaus in Grossoal (im Pongau) und obm 59a-Joa am Zeppezauerhaus aufm Untasbeag bei Soizbuag. Obm 66a-Joa woara Hittnvawoita im Dochstoagebiet, obm 71a-Joa Wiat im ›Platzlkella‹ in da Stod Soizbuag.

Vaheirat is da Forcher seitm 1956a-Joa mit da Helli (Taufnom Helena). De zwoa hom zwoa Buam mit Nomen Peter (* 1956) und Karl (* 1959).